ئێزيدی خۆ بۆ جەژنا سەرێ سالێ ئامادە دكەن
باسنيوز:
بەرپرسێ پشكا رەوشەنبیری ل دەستەیا بلندا بنگەهێ لالش ل دهۆكێ دیاركركو ژبەر پووتە پێدانا ئێزدیان ب سروشتێ و ژبۆ پاراستنا گژ وگیا و تەڤ رووەكا و ژبەركو ئەڤ مەها دەمێ ڤەژین وبووژاندنا هەمووگیاندارایە،ئێزدی دڤێ مەهێ دا جۆتی ناكەن و عەردی ناكۆلن.
شەمۆ قاسم، بەرپرسێ پشكا رەوشەنبیری ل دەستەیا بلندا بنگەهێ لالش ل دهۆكێ بۆ(باسنیوز) دیار كر: "ل رۆژا 18/4 كوردێن ئێزدی دێ رێ ورەسمێن جەژنا سەرێ سالێ گێرن ئەڤ رۆژا بیتە بهنڤەدانا فەرمی بۆ هەموو دام ودەزگەهێن حكومەتا هەرێما كوردستانێ. ئێزدی رێزەكا مەزن دانە هەیڤا نیسانێ ژنهێنان نینە ،چونكو هەیڤا نیسان باوەریا ئێزدیاندا بخۆ بووكا سالێیە و ب جوانترین رەنگ وخەمل یا خەملاندییە و چو بووكا دسەر خۆرا قەبوول ناكەت، ل پەرستگەها لالش،فتیل وچرایا،ل سووكا مەعریفەتێ و ل بەر نیشانگەهێن خاس و چاكا ڤێدخێن دیندارو قەولزان،قەول و بەیتا رێز دكەن و سەما ژی تێتە كێشان".
خویا ژی كر: "كابانیێن مالێ هێكا دكەلینن و رەنگا ورەنگ دكەن،هەروەسان سەكا دپێژن و ب سەردەر وجیناراندا بەلاڤدكەن،و قەستا گۆرستانا گوندی دكەن و خێر وخێراتا ل سەر هەڤدو وبەلنگازا دە بەلاڤدكەن. زەلام ب هەڤرا قەستا نیشانگەهێن خاسێن گوندی دكەن وزیارەتی دبن ل رۆژا جەژنێ هەر ئێزدییەك بەری رۆژ هەلاتێ دەست وچاڤێن خۆ ب خوناڤێ جوانكەت".
ئاشكەرا كر:" دگەل رۆژهەلاتێ،كابانیا مالێ ،قەفتكەكە كولیلكێن نیسانێ وگیایێ بێناڤێ دگەل قالكێن هیكێن رەنگا ورەنگ،ب هەڤیری و هندەك ئاخ ب سەردەریێ‌مالا و خانیان ڤە دكەت زارۆك و گەنج و زەلام،ل كۆلانێن گوندی كۆم_كۆم دجڤن و گەلەك جۆرێن یاریا ب هێكا دكەن، دڤێ رۆژێدا پەزی نادۆشن وبێچیكا بەرددەنە بەرماكا".
دیاركر:" شڤان بەری نیڤرۆ پەزی دئینتە دەهنی،بێریڤان ب پارزوونكێن خۆ وخەلاتێ شڤانی ڤە دچنە بێریێ،دەمێ دگەهنێ پێكڤە چنە شڤانی و گۆپالێ وی پرت_پرت دكەن و وان پرتا ب سەرهەڤدوودا بەلاڤدكەن،پاشی پێكڤە روودنێن و خەلاتێ شڤانی ددەنێ،دەمێ بێریڤان دزڤرتە مال ،هەر ئێك ژ وان وێ پرتا گۆپالی ب مەشكا خۆ ڤە دكەت".
خویا ژی كر:" نەكۆلانا عەردی،دمەها نیسانێدا چونكو هەموو كەسكاتی،دەست ب گەشبوونێ دكەن،ڤێجا كۆلانا عەردی دڤێ مەهێدا ب گونەه دئێتە دانان،تاكو جوانتر روویێ عەردێ بخەملت هێك نیشانا بۆ دورا پەدشای ئەڤ كنیاتە ژی ئافراندی وشكاندنا هێكێ،نیشانا پژقینا دوورێیە و كەلاندنا هێكێ،نیشانا مەیین و جەبرینا عەردێیە، رەنگكرنا هێكێ،رامانا خەملینا عەردێ ددەت و شكاندنا گۆپالێ شڤانی،نیشانا نووژەنكرنا شڤانە و پرتا گۆپالێ ب مەشكێ ڤە بۆ خێر وبەركەتێ‌یە.
ئەو ژی دیاركر كو جەژنا سەرسالێ كەڤنترین جەژنا ئێزدیایە دكەفتە چارشەمبویا ئێكێ ژ مەها نیسانێ ب هژمارا رۆژهەلاتی،كەڤناتیا وێ دزڤرتە دەستپێكا ئافراندنا كنیاتێ،دەمێ پەدشای دور ژ نوورا خۆ نژاندی و ئاخ و ئاڤ و بای و ئاگر ژێ پەیداكرین،و كنیات پێ ئافراندی".
تعليقات