رێكخراوا (R.S.O) بانگەوازیەكێ ئاراستەی جڤاكێ نێڤ دەولەتی و رێكخراوێن ژنان دكەت
ئێزیدخان نیوز:
ب هەلكەفتا رۆژا جیهانی یا ژنان،رێكخراوا (R.S.O)بۆ مافێن مرۆڤی بانگەوازیەكێ ئاراستەی جڤاكێ نێڤ دەولەتی و رێكخراوێن ژنان ل وەلاتی و ژ دەرڤە دكەت،كو زێدەتر پێكۆلێن خۆ بێخنە كار بۆ داوی ئینانا ئازارێن ژن و كچێن مە یێن ئێزدی یێن گرتی و كارێ رژد بكەن بۆ رزگاركرن و ڤەگەراندنا وان.
ئیرۆ رۆژا پێنج شەمبوویێ9ئادارا2018 رێكخراوا (R.S.O)بۆ مافێن مرۆڤی بەیاننامەك ب هەلكەفتا رۆژا جیهانی یا ژنان دانەك ب دەست مالپەرێ ئێزیدخان نیوز كەفتیە، بەلاڤكر و تێدا هاتیە:
ئیرۆ رۆژهه‌شتى ئادارێ،رۆژا جیهانی یا ژنانە،كو ل سەرانسەری جیهانی ئاهەنگ و چالاكیێن گشتی و تایبەت یێن ژنان دئێنە گێران و سازدان،لڤێ رۆژێ رێكخراوا مە رێكخراوا(R.S.O.H.R)جوانترین پیرۆزباهیان پێشكێشی ژنێن جیهانێ و ژنێن ئێزدی ب شێوەیەكی تایبەت دكەت،هیڤیا ژیانەكا ئازاد و خۆش ل جڤاكێن رێزێ ل ژنێ و كەرامەتا وێ یا مرۆڤی دگرن و رۆلێ وێ یێ بەرچاڤ ل ژیانێ دا كو دیاسایان دا ژنێ دپارێزن ژ پشتگوهخستنێ و وەكهەڤی هەبت ل ماف و ئەركان دا،لڤێ رۆژێ ژنێن ئێزدی یێن پتر ژ سێ سال و نیڤان گرتی ل بیر دئینین،هیڤیدارین ئازارێن ژنێن گرتیێن ئێزدی ب داوی بێن یێن هێشتا د دەستێ تیرۆرستان دا تووشی ئازاران دبن،هەروەسا هەڤگرتنا خۆ لگەل ب دەهان هەزاران ژنێن ئاوارە رادگەهینین یێن چەند سالە دخیڤەتێن ئاوارەبوونێ دا دژین.
ل رۆژا جیهانی یا ژنان،بانگەوازیا مە بۆ جڤاكێ نێڤ دەولەتی و رێكخراوێن ژنان ل وەلاتی و ژ دەرڤە،گازیا خۆ دگەهینێ كو زێدەتر پێكۆلێن خۆ بێخنە كار بۆ داوی ئینانا ئازارێن ژن و كچێن مە یێن ئێزدی یێن گرتی و كارێ رژد بكەن بۆ رزگاركرن و ڤەگەراندنا وان بۆ باوەشا خێزانێن خۆ،دیسان رێزگرتن ل رزگاربوویان و قوربانیدانا وان و دابینكرنا ژیانەكا ساخلەم بۆ وان.
ئەم ل رێكخراوا(R.S.O)كو رێكخراوەكا مافێن مرۆڤانە هەڤگرتنا خۆ یا بەردەوام لگەل گرتیان و خێزانێن وان رادگەهینین،سۆزێ ددەینە هەموویان كو دۆزا گرتیان و خێزانێن وان دۆزا ئێكێ یا كار و چالاكیێن مە بت و لسەر ئارمانجا خۆ دێ بەردەوام بین لژێر دروشمێ(گرتیێن خۆ ژبیر ناكین و ناهێلین جیهان ژبیر بكەت).
تعليقات