گەهاندنا هاریكاریان بۆ ئاوارێن ئێزيدی ل عەفرینێ ل ئاستێ پێدڤی نینە/بەختیار قادر
گەهاندنا هاریكاریان بۆ ئاوارێن ئێزيدی ل عەفرینێ ل ئاستێ پێدڤی نینە
بەختیار قادر
كوردێن ئێزيدی ل باژێرێ عەفرینێ ل رۆژئاڤایێ كوردستانێ لژێر هەرەشەیا كۆمكوژیا بكۆم دان و دمەترسیێ دان،ژبەر گرۆپێن سەربازی یێن هێرشی باژێری دكەن خودان هزرەكا ئایینی یا توندرەون هەول ددەن ئێزدیا كۆمكوژ بكەن و دەربەدەر بكەن،ل هەیڤا حوزەیرانا سالا 2017ێ ژی خەلكێ گوندێ عەلیقینو یێ ئێزيدیا هاتە دەربەدەركرن،چنكو تەنها ئەو ئێزدی بوون.
لگۆر زانیاریێن من ب دەست خستین چەندین گوندێن ئێزيدیا ل عەفرینێ دكەڤنە سەر رەخێ گولێن تۆبخانا توركیا ڤە،لەورا چەندین خەلكێ ڤان گوندان ئاوارەی سەنتەرێ باژێرێ عەفرینێ بووینە و چوو ئامارێن راست هەتا نهۆ نینن بۆ دیاركرنا ژمارا وان،لێ هەشت گوندێن ئێزيدیا خەلكێ وان ب شێوەكی تەمام ئاوارەبووینە بەرەف عەفرینێ،بارا پتر ئاوارەی كەس و كارێن خۆ بووینە ل وی باژێری،كو دێ بینی د ئێك مالێ دا سێ خێزان یان پتر دژۆرەكا كچك دا دژین و بێ بەهربوونا زارۆكان ژ قوتابخانێ ژبەر بوردۆمانا بەردەوام،زێدەباری خێزانان هەنە خۆ دهندەك شكەفتان دا ڤەشارتینە بۆ خۆپاراستنێ ژ بوردۆمانا بەرەلایی،سەبارەت گەهاندنا هاریكاریێن هاوارهاتنێ ل ئاستێ پێدڤی نینە پشتی(34)رۆژان ژ هێرشا توركیا بۆ سەر عەفرینێ،تەنها كاروانەكێ تنێ یێ هاریكاریێن هاوارهاتنێ بۆ ئێزيدیێن عەفرینێ هاتیە هنارتن ژبال كۆمەلا تەڤگەرا ئێزدیان ل ئەلمانیا كو كوژمەكێ دراڤی بەخشیە ئێكەتیا ئێزيدیا ل وی باژێری بۆ هاریكاریكرنا ئاوارەیان،ئەڤ كوژمە تێرا هەموو خێزانان ناكەت ژبەر كاودانێن ب زەحمەت یێن باژێر تێرا دەرباز دبت،ل هەمبەر ڤێ رەوشێ دا ب تایبەت گەلەك كۆمەل و مال و سازیێن دیتر یێن ئێزيدیا ب شێوەیەكی گشتی بێ دەنگ ماینە،ژبلی ئەنجام دانا خرڤەبوونان پێدڤیە هەر زوو ئەو هاریكاریێن مرۆڤی كۆم بكەن و بگەهیننە ئێزدیێن عەفرینێ،چنكو ئەو یێ دنالن.
ل ڤێدەرێ سەر ئێزيدیان و سازیێن ئێزيدیا ل سەرانسەری جیهانێ ئیرۆ خودان هەلویست بن و ئێكگرتی بن و ب ئەركێ خۆ رابن،بۆ گەهاندنا دەنگێ ئێزيدیێن عەفرینێ بۆ قورتالكرنا وان ژ كۆمكوژیەكا راستەراست ژهێرشا گرۆپێن رادیكالی یێن هەڤپەیمان دگەل سوپایێ توركیا دا،كو پێدڤیە ئەوهێرش بێتە سەكناندن بەری كو ئێزيدی تووشی تاوانێن دژی مرۆڤایەتیێ بن لسەر دەستێ وان،سەرەرای كو سەر ئاستێ نێڤ دەولەتی داخواز ژ توركیا هاتیە كرن وێ هێرشی ب سەكنینت،بەلێ هێشتا بەردەوامە و هەتا نهۆ ب سەدان كەسێن سڤیل ل عەفرینێ ب شێوەیەكی گشتی بووینە قوربانی.
تعليقات