نڤیسكاره‌كێ ئێزیدی:ئەردەك ل جیهانێ نینە بناڤێ ئێزیدخانێ تەنھا كوردستان نەبت

ئێزیدخان نیوز:

نڤیسكاره‌كێ كوردێ ئێزیدی ئاشكه‌راكر كو قۆناغێن بێن مەترسیترن ژ ڤان كارەسات و كۆمكوژیا بسەرێ مە ھاتی ،سه‌ر نڤیسكارێن مه‌ ڤێ تراژیدیا بسەرێ ئێزیدیا ھاتی ب دروستی ب گەھینن جیهانێ، ژنڤیسكارێن ئێزیدی دئێتە خاستن ئێزیدخانێ چۆل نەكەن و ڤەگەرێن وەلاتێ خۆ،ژبەركو چوونا ئێزیدیا بۆ ئەورۆپا فەرمانەكا دییە لسەر ئێزیدیا دەمێ ئەم بێ وەلات بین ل دنیایێ دێ ئێنە حەلاندن و ژناڤبرن ، ژبەركو ھیچ ئەردەك ل جیهانێ  نینە ب ناڤێ ئێزیدخانێ تەنھا كوردستان نەبت.

نڤیسكارێ ئێزیدی"مه‌هدی حه‌سه‌ن موراد"د دیداره‌كێ دا بۆ مالپه‌رێ(ئێزیدخان نیوز)راگه‌هاند:"پشتی ئەڤ كۆمكوژیا شنگالێ وفه‌رمانا بسەرێ ئێزیدیا ھاتی مللەتێ مە بێ ئۆمێد ببوو،كارەساتەكا گەلەك مەزن بسەرێ ئێزیدیان ھات ئێزیدی ب گشتی كەتنە د رەوشەكا نالەباردا ٩٠% ژ ئێزیدیا دەربەدەر و ئاوارە بوون ملك و ئەملاكێ وان ھاتە تالان كرن و ژن و كچێن مە كەتن دەستێ داعش و رۆژانە ل بازار و قەیسێرێن رەققە و مووسل كرین و فرۆتن پێ د ھاتن كرن ، ژلایەكی دیڤە شەر و كوشتن و چەنگ كەتە وەلاتێ مە ب سەدان خێزان مان بێ سەروەر وسێوی كەتن،تشتێ گرنگ دھاتە خاستن ژ كەسانێن رەوشەنبیر و نڤیسكارا ڤی باری دانێن سەر ملێن خۆ و ڤان تاوانێن بسەرێ ئێزیدیا ھاتین ھەموویا بكەن بەڵگە وبێنە نڤیسین و تۆماركرن ،ژبەر قەدەرا مە ئێزیدیا ھەموو ژیانا مە یە خوون رێژی بوویە و زۆری و زۆرداری ل مە ھاتیە كرن ئەگەر توو بەرێ خۆ ب دەیی دیرۆكێ ٧٣ فه‌رمان بسەرێ ئێزیدیا بەری ڤێ فه‌رمانێ ھاتینە".

ده‌رباره‌ی رۆلێ نڤیسكارێن ئێزیدی بۆ گه‌هانندنا كۆمكوژیا شنگالێ گۆت:"ئەڤە فه‌رمانا ٧٤ بەلكی ب دروستی دئێتە نڤیسین ب دەستێ كورێن نڤیسكارێن ئێزیدی نە بێگانە و نەیار بنڤیسن وەكی وان دڤێت ،لێ ب شێوەكی زۆر باش كورێن ئێزیدی ب راستی رێژەكا زۆر ژ نڤیسكارێن ئێزیدی رۆلەكی بەرز و شایستە د گێران بۆ گەھاندنا ڤێ كۆمكوژیا شنگالێ و زۆری و زۆرداریا ل ئێزدیاتیێ ھاتیە كرن پشتی فه‌رمانا (٣/٨/٢٠١٤) تشتێ گەلەك باش نڤیسكار و ڤەكۆلەرێن ئێزیدی گەلەك ب ھووری بچنە دناڤ ئاواران ودناڤ روودانا دا بگەرێن و تشتێ ھەری باش ب گەھینن وبنڤیسن و تۆماركرن و كارین دەنگێ ڤێ كۆمكوژیا لسەر ئێزیدیان ھاتیە قەوماندن لسەر ئاستێ كوردستانێ وعێراقێ و جیھانێ دا راگەھینن وبەرز راگرن وبنڤیسن و ژ گەلەك ئالیاڤە ،نەخاسمە درێیا ھۆنەری ونیگاركێشانێ وموزیك و ستران گۆتنێ و ھۆزانا و درامێن شانۆگەری دەنگێ كارەساتا شنگالێ د ھەر رێیەكێ دا ب گەھینن جیھانێ ب دروستی وەك ئەركەكی خۆیێ ئێزدیاتیێ وئایینی ب شەڤ و رۆژ كاركرینە و گەلەك تشتێ وندا ئاشكەرا كرینە و گەھاندیە خەلكێ بیانی. ئێزدی ل كوردستانێ".

ئه‌و چه‌نده‌ ژی ئاشكه‌راكر:"نڤیسكارێ ئێزیدی سه‌ر كاودانێن تێدا دژیت و كارەساتا ھاتیە سەرێ ئێزیدیا گەلەك خۆ ماندوكریە و ب بەرپرسیاتی پێنوسێ خۆ ھلگرتیە و نڤیسیە و دوژمن و نەیار ریسوا و شەرمەزار كرینە و بەرسنگێ نەیارێن ئێزدیاتیێ گرتینە ، تشتێ ئەز پێ سەرفه‌راز رێژەكا زۆر ژ كچ و لاوێن ئێزیدیا ژ ھەر دوو رەگەزا بووینە نڤیسكار و ل پتریا رۆژنامە و گۆڤارێن كوردستانێ و عێراقێ د نڤیسن و پتریا بەرھەمێ پەرتۆكا ل ڤان سالێن بۆری نڤیسەرێن ئێزیدینە ئەڤە جیێ دلخۆشیا مەیە ، لێ ئەڤە نابتە داوی بەلكی دڤێت درێژیێ ب خزمەت و خەباتا رەوشەنبیری و ھشیاریا ئێزدیاتیێ ب دەین،ژبەركو ئەڤ قۆناغێن بێن ب دیتنا من مەترسیترن ژ ڤان كارەسات و كۆمكوژیا بسەرێ مە ھاتی ئەو ژی د رێیا رەوشەنبیرا مللەتێ خۆ ھشیار كەین و نەھێلین بكەڤن سەر رێیەكا شاش ،ئەڤ یاھاتی كرن باشە به‌لێ دڤێت بزانین مە ئێزیدیان تشتێ گەلەك گرنگ ل دەستایه‌ یامایی ژ مە نڤیسكارا دئێتە خاستن د رێیا نڤیسین و راپۆرتێن خۆ دا كلتورێ باب و كالێن خۆ داب و نەریتێن خۆ ژی پارێزین وگرنگیێ ب دەین ئێزدیاتیێ وبیر وباوەرێن ئێزدیاتیێ ژی بنە ئەركێ نڤیسكارێ ئێزیدی ل ڤێ قۆناغێ،بۆ بەرسنگرتنا ڤان ئالیان نڤیسكارێ كو دكارت پەیاما ئێزدیاتیێ یا دروست ب گەھینن كو مللەتەك خودێ ناس و ئاشتیخواز وباوەری ب ئێكانە یا خودێ ناسینێ ھەیە، ژبەركو به‌لێ ململانێ یا سیاسی ل وەلاتێ مە بەلاڤكرنا ھزرەكا ئۆلی یا توند ڕەو ژی یا دئێتە پێش ،فەرە ئەم رێ نەدەین ئەڤ پارتێن ئیسلاما توندرەو بنە دەسھەلات ژبەر ئەڤ جۆرە دەسھەلاته‌ مەترسیدارە لسەر ئێزدیاتیێ دڤێت پشتەڤانێن پارتێن علمانی بین و خەلكێ خۆ ھشیار كەین ژ ڤان مەترسیا". 

سه‌ر ره‌وشا ئێزیدیا ناڤهاتی دبێژت:"ئەم بەرێ خۆ ب دەین رەوشا ئێزسدیا ل ئاوارەییێ و دەربەدەرییێ و كۆچبەرییێ ئەڤ چەندە ژی مەترسیەكا دی یە لسەر ئێزدیاتیێ ، ئاوارەبوون و دوركەتن ژ كەتوارێ مرۆڤ تێدا ژیای گەلەك زەحمەتە نەخاسمە شنگالێ داب و نەریتێن خۆ یێن تایبەتمەند ھەبوون ، ژیان و ژیارا خەلكێ مەیێ شنگالێ ل ئاواره‌ییێ و كەمپا و د كاڤلان دا زەرەر و زیانەكا مەزن گەھاندا وان ، گەلەك زەحمەته‌ پشتی ڤێ كۆمكوژیێ كەسایەتیا مرۆڤێ ئێزیدی ھاتیە شكاندن و بكارت بژیت ل كەمپەكێ و دبن چادرەكێ دا ، ژبەر ھەر مالەك دەربەدەر و ئاوارە و مالوێران بووینە چیرۆكەكا چڕگ پڕ ھەیه‌ ، لەوما ژ نڤیسكارێن مە یێن ئێزدی د ئێتە خاستن پتر خۆ ماندوو بكەت و رۆژانە بچتە بن چادرەكێ یا كاڤلەكی و دیدارەكێ دگەل وان ساز بكەت و كا چ ھاتیە سەرێ وان تۆماركەن ئەڤە ئەركێ مەیە ئەم پتر خۆ ماندوو بكەین و ڤێ تراژیدیا بسەرێ ئێزیدیا ھاتی ب دروستی ب گەھینن جیهانێ ،ژبەركو كارەساتێن مەزن ھاتین سەرێ ئێزیدخانێ ج ل دەست دانا سەر و مالێ دنیایێ بت شەره‌ف و ناموس و رەزالەت و رەزیلی بێ خودانی كو ئەڤە سالا چارێ یە د بن كاڤل و چادرا دان دژین ، دگەل ھندئ ژبەر ڤێ مه‌رگه‌ساتێ رێژەكا زۆر ژ ئێزیدیا دەربەدەری دنیایێ بوون چوونه دەرڤەیی وەلاتی ڤێ چەندێ ژی كارتێكرنەكا زۆر ل ئێزیدیان كر ،لەوما ژ نڤیسكارێن ئێزیدی دئێتە خاستن ئێزیدخانێ چۆل نەكەن و ڤەگەرێن وەلاتێ خۆ،ژبەركو چوونا ئێزیدیا بۆ ئەورۆپا فەرمانەكا دییە لسەر ئێزیدیا دەمێ ئەم بێ وەلات بین ل دنیایێ دێ ئێنە حەلاندن و ژناڤبرن ، ژبەركو ھیچ ئەردەك ل دنیایێ نینە ب ناڤێ ئێزیدخانێ تەنھا كوردستان نەبت،ئەو جیێ لالش و خاس و گۆرستانێن مەیە سەرەرای ئەو زۆرداری ل مە دئێتە كرن ،دڤێت ھشیارەكێ بكەین دناڤ جڤاكێ خۆدا و بزانین ئێزدیاتی تەنھا ل كوردستانێ دێ ھەبت".

دبه‌رده‌وامیا ئاخفتنا خۆ دا ئاشكه‌راكر:"ئەركەكی دی یێ نڤیسكارێ ئێزیدی دڤێت بەردەوام دنڤیسینێن خۆدا گرنگیێ ب میتولۆژیا ئێزدیاتیێ ب دەت ولدووڤ بیر و باوەرێن رێیا شیخادی گیانێ من گۆری ولدووڤ رێورەسمێن ھاتینە دانان لسەر بچین و جەژن و ھەلكەفت و داب و نەریتێن ئێزدیاتیێ ھەر گاڤ ساخ كەن و گرنگیێ پێ بدەن چ ل وەلاتی چ ژ دەرڤەی وەلاتی،دگەل ھندێ ھزرا نشتیمان پەروەری و نەتەوەی ھەر گاڤ ژ رەوشەنبیرێن مە دئێتە خاستن د مەژیه‌كێ مرۆڤێ ئێزیدی كەن ،نەخاسمە خورت و لاو كچێن مە و ل ھزرێن توندرەوێن ئایینی نەچن،ژبەر توندرەوی نە دبەرژەوەندا ئێزدیاتیێ دایە ، هه‌روه‌سا سوپاسیا هه‌ر نڤیسكاره‌كێ ئێزیدی دكه‌م ئێك پەیڤ نڤیسی بت بۆ ئێزدیاتیێ".

ل داویێ"مه‌هدی حه‌سه‌ن"دیاركر:"دخازم ھەموو ئەو كچ و ژنێن ئێزیدی ژ دەستێ داعش دا رزگاربن و رۆژا ڤەگەراندنا داوی كچ بته جەژن و سەرسالێن مە ئێزیدیا ،ھیڤیدارم جاره‌ك دن ئێزیدخان ڤەگەرێ سەر كۆكا خۆ وەكی بەری ٢٠١٤ و ئاوارەیی و ھەژاری نەمینت وھەر كەس دناڤ مال و وارگەھێ خۆدا شادبت و دوژمن و نەیارێن ئێزدیاتیێ ریسوا و شەرمەزاربن وھەموو نڤیسكار و رەوشەنبیرێن ئێزیدی دھەر وار و كارەكی دا بەرژەوەندیا ئێزدیاتیێ و مللەتی لبەر چاڤبگرن و ئێك و دوو بگرن و دژایەتیا ئێك نەكەن و ئێكگرتی بن،دا ئەم ھەموو بكارن خزمەتا ئێزدیاتیێ پتر ب كەین و گرنگیەكا تایبەت ب خووندنێ و زانینێ ب دەین".