چالاكیەكا بەرفرەهـ لدۆر كۆمكوژیا ئێزیدیان ل كۆمەلگەها شاریا هاتە گێران
ئێزیدخان نیوز:شاریا
هەوا ئێتیمان چالاكیەكا بەرفرەه ب چەندین برگێن جۆرا و جۆر،ل هۆلا لالش 2 ل كۆمەلگەها شاریا گێرا.
ئیرۆ رۆژا ئینیێ 5/1/2018ب ئامادەبوونا ژمارەكا كەسایەتی و رەوشەنبیر و چالاكڤان و رۆژنامەڤان و كچێن قارەمان یێن ژ دەستێن داعش رزگاربووین و زارۆكێن ئێتیم و جەماوەرێ دەڤەرێ،چالاكیەكا بەرفرەه هاتە گێران.
بەرپرسێ هەوا ئێتیمان"شێخ پاشا" بۆ مالپەرێ(ئێزیدخان نیوز)راگەهاند:"ب هەڤكاری دگەل چالاكڤانان"مەحمود ئەلبرغشی" و"سالم حسێن"ئەڤ چالاكیە هاتە گێران،ل دەستپێكێ پەیڤا بخێر هاتنێ هاتە پێشكێشكرن،پاش سمینارەك لدۆر كۆمكوژیا ئێزیدیان ل شنگالێ بۆ ڤەكۆلەر"داود موراد خەتاری" و "فەلاح حەسەن "ئەندامێ دەستەكا ڤەكۆلینا كەیسا ئێزیدیان ل دهۆكێ گێرا و تێدا بەحسێ دكیۆمێنتكرنا كۆمكوژیێ و قۆناغێن ناساندنا كەیسێ لسەر ئاستێ نێڤ دەولەتی كرن.
لدووڤ دا هۆزانڤان "داود قەیرانی" و كچا وی هۆزانەك لسەر كۆمكوژیێ گۆتن،پاش كچا قارەمان و رزگاربووی لەیلا تەعلو پەیڤەك پێشكێشكر و دیاركر كو ب ڤان جلكێن رەش تووشی چەندین نەخۆشیان بووین لسەر دەستێ داعش،هەروەسا ڤەكۆلەر و نڤیسەر خالد تەعلو برایێ لەیلایێ كو چیرۆكا خوشكا خۆ كریە پەرتۆك دیاركركو(پەرتۆكا لەیلا و شەڤێن نەخۆش)ژ (130)لاپەران پێك دئێت و دەبرینێ ژ نەخۆشیێن بسەر دا هاتین دكەت و ل نێزیك دێ كەفتە بەر دەستێ خووندەڤانان،خواست ژی رەوشەنبیر و نڤیسەر و چالاكڤانێن ئێزیدی چیرۆكێن كچێن رزگاربووی بكەنە پەرتۆك كو گرنگترینن بۆ دكیۆمێنتكرنا وان نەخۆشیان.
پاشا دیاركر:"دبرگەیەكا دی دا كچا رزگاربووی"ئیمان عەبدوللە"بەحسێ چیرۆكا خۆ و خێزانا خۆ كر دەمێ كەفتینە دەستێ داعش و هاتینە دەستەسەركرن و تووشی نەخۆشیان بووین و تەكەز كر كو دیمەنێن دژوار وان دیتینە،ل پێرا هەردوو هۆنەرمەندان"حەماد ئسماعیل" و "نەسرەت ئسماعیل" چەند ستران گۆتن بۆ ئێخستنا گرنژینێ لسەر لێڤێن زارۆكێن ئیتیم و ئامادەبوویان".
بەرپرسێ هەوا ئێتیمان راگەهاند ژی ل داویا چالاكیێ خەلات بسەر پشكداران و كچێن قارەمان یێن ژ دەستێ داعش رزگاربووین و زارۆكێن ئێتیم هاتنە بەلاڤكرن.
تعليقات