"ژمارا بەربژێران دێ زیانێ گەهینتە ئێزیدیان ل هەلبژارتنێن پەرلەمانێ عێراقێ"
ئێزیدخان نیوز:
گرنگیپێدەركێ كاروبارێ ئێزیدیان راگەهاند:"لسەر ئێزیدیان پێدڤیە بۆ هەلبژارتنێن ئەنجوومەنێ نوونەرێن عێراقێ و پەرلەمانێ كوردستانێ یێن داهاتی،ژمارەكا كێم یا بەربژێران خۆ هەلبژێرن دا كورسیێن كۆتا ژ مە نەچن و نوونەرێ خۆ هەبت".
بریارە هەلبژارتنێن پەرلەمانێ كوردستانێ ل هەیڤا 4و هەلبژارتنێن ئەنجوومەنێ نوونەرێن عێراقێ ل هەیڤا 5یا ئەڤە سالە بێنە ئەنجام دان،ل هەلبژارتنێن چووی یێن پەرلەمانێ 74كەسێن ئێزیدی خۆ بەربژێر كربوو و زەرەرەكا مەزن ل بەلاڤكرنا دەنگێن ئێزیدیان ببوو.
زێدۆ باعەدری،گرنگیپێدەرێ كاروبارێ ئێزیدیان بۆ مالپەرێ(ئێزیدخان نیوز)گۆت:"هەتا نهۆ بارا پتر یا جادا ئێزیدی سیستەمێ هەلبژارتنان نزانن،پەرلەمانێ عێراقێ یاریێن خۆ ب ئێزدیان دكەن و ئێك كورسیا كۆتا ددەنێ و وان بەردەنە ئێك دا دەنگێ ئێزدیا بەلاڤ بن،كەس نەمایە كۆتا نەدایێ و پتر ژ مافێ وان دایە توركمانا و كوردێن فەیلی و برایێن مەسیحی و سابئە ئەز نە دژی وانم و دگەل هندێ مە هەر چینەكا بن دەست چ یا ئایینی یان نەتەوەیی بت بێتە كوتا كرن،لێ نە سەر كیستێ مە مافێ وان بدەنێ و نە ل بەرامبەر یێ مە قوت بكەن و عێراق هەتا یا ساخە شەرمەزاری ئێزیدیانە،چنكو فەرمانا 74ل كوكا ئێزیدخانێ ل شنگال چێبوو و هەتا نهۆ ژی ل باژێرێن ئەرەبێن سووننە كچ وكورێن مە تێنە فرۆتن".
زێدەتر گۆت:"ئیرۆ پەرلەمان و سەرۆكێ پەرلەمانێ عێراقێ سەلیم جبووری وەكو خانم ڤیان دەخیل ئاماژە پێدایی پتر ژ4 جارا هەولدان كری وان نەڤیا بەحسێ ناڤێ كۆتا ئێزیدیا بكەن و بەحسێ ئێزیدیا بكەفتە دروونشتنا پەرلەمانی دا وئەڤە بخۆ دبتە جینۆسایدەكا بێ خوون و یا ڤەشارتی و تاری دوور ژ راگەهاندنێ ل دژی ئێزیدیان".
باعەدری تەكەزكر:"بۆ هەلبژارتنێن پەرلەمانێ عێراقێ یێن داهاتی ئێزیدی دابەشكرینە سەر ناوچەداریا باشیك و قەزا شێخان و تلكێف و شنگال،ئیرۆ یە فەرە ئێزیدی بزانن ژمارا وان چەندە و هەر قاسمی هەلبژارتنا دێ چەند بەر مە كەڤن و یا پێدڤیە گەلەك بەربژێرێن ئێزیدی خۆ هەلنەبژێرن بۆ ڤان هەلبژارتنان،بۆنموونە ل هەلبژارتنێن چووی 74كەسێن ئێزیدی خۆ بەربژێر كربوو و زەرەكا مەزن ل بەلاڤكرنا دەنگێن مە بوو،هندەك كەس و پارتێن ئەرەبی شارەزانە و كاری وانە دڤێن ئێزیدیا ب خاپینن و ژمارەكا مەزن ژ ئێزیدیا هەلبژێرن دا دەنگێ وان بەلاڤ بن و ل دەڤەرێن ئێزیدیا بوسلمان خۆ كێم بەربژێر دكەن و ئەڤە دبتە ئەگەرا هندێ ئێزیدی بێ بەهردبن زجڤاتا پارێزگەهێ و پەرلەمانی".
ناڤهاتی ئەو چەندە ژی رۆنكر:"سەر دام و دەزگەهێن ئێزیدیان یێن فەرمی و نەفەرمی و ئەم هەموو ب ئەركێ خۆ رابن و هەولدانان بكەین كو بەربژێرێن ئێزیدیا كێم بن و هەڤبەشبن و نەهەموو ژ دەڤەرەكێ بن،دا كورسیێن كۆتا ژ مە نەجن و ئێزیدیا ئاگەه ژئێك هەبت و ئێكگرتن و دەنگێ وان لڤێ قۆناغێ دا گەلەك یێ گرنگە".
زێدۆ باعەدری ئاشكەراكر:"بۆ هەلبژارتنێن پەرلەمانێ كوردستانێ یێن داهاتی،سەر ئێزیدیان ژمارەكا كێم خۆ بەربژێر بكەن،داكو مە نوونەرێ خۆ ل پەرلەمانی هەبت".
لدووڤ بریارا دادگەها ئتیحادی بریار هاتیە دان كو ژمارا كورسیێن كۆتا بۆ ئێزیدیان ل پەرلەمانێ بێنە زێدەكرن،لێ پەرلەمانێ عێراقێ ئەو بریارە قەبوول نەكر و رەت كر،ل هەمبەر ڤێ بریارێ پەرلەمانتارێن ئێزیدی هەول ددەن تەعن بكەن و ژمارا كورسییان بێنە زێدەكرن".
كوردێن ئێزیدی پتریا وان نهۆ ئاوارەنە و ل كەمپان و خیڤەتان دا ل پارێزگەهێن هەرێما كوردستانێ و چەند دەڤەرێن دیتر دا دژین،هیڤیا وان ئەوە بەری دەستپێكرنا هەلبژارتنان ئەو گرتیێن ئێزیدی یێن د دەستێ داعش دا ماین بێنە رزگاركرن و ب تایبەت دەڤەرا شنگال ئارامی بكەفتێ داكو ڤەگەرن سەر جی و مالێن خۆ ڤە.
تعليقات