ڤەكۆلەرەكی ئێزدی پەرتۆكەكێ لسەر جینۆسایدا ئێزيدیان دنڤيست
باسنيوز:
ڤەكۆلەرەكی ئێزدی پشی سێ سالێن ماندیبوون و نڤێسینێ راگەهاند كو پەرتۆكا وی یا هەشت بەرگی یا دیكۆمێنتاری ل دۆر جینۆسایدا ئێزدیان ب دووماهیك هات.
ڤەكۆلەرێ ئێزدی داوود موراد خەتاری، تایبەت بۆ (باسنیۆز) دیاركر، ل گەل دەستپێكرنا كارەساتا شنگالێ ل مەها هەشت ژ سالا 2014، وی دەست ب كۆمكرنا دیكۆمنتێن جینۆسایدا ئێزدیان كریە و دەست ب نڤێسینێ كریە و هەموو بەلگەیێن پێدڤی بۆ ناساندنا جینۆسایدا ئێزدیان د پەرتۆكەكا هەشت بەرگی دا كۆمكرینە و هەر بەرگەك دناڤبەرا 300 بۆ 500 لاپەرانە و ل گەل هندێ ژی 500 سیدی یێن ڤیدیۆیێ ل دۆر جینۆسایدا ئێزدیان كۆمكرینە.
خەتاری ئاشكرا ژی كر، نها نڤێسینا هەر هەشت بەرگان ب دووماهیك هاتیە و د قۆناغا دیزاینێ دایە و نێزیكترین دەم دێ چیتە دقۆناغا چاپكرنێ دا و دێ ژ لایێ سەنتەرێ ڤەكۆلینێن زانكۆیا دهۆكێ ڤە هێتە چاپكرن و گۆت ژی: مەرەما مە ئەوە كارەساتا شنگالێ و ئەوا ب سەرێ ئێزدیان هاتی ب جینۆساید بهێتە نیاسین و بۆ جیهانێ هەموویێ دیاربیت كا چ ب سەرێ كوردێن ئێزدی هاتیە.
ل دۆر ناڤەرۆكا پەرتۆكێ، ئاشكرا ژی كر، د بەرگێ ئێكێ دا بەحسێ (ئێش و ئازارێن خەلكێ شنگالێ ل چیایێ شنگالێ هاتیە كرن و ل گەل دیكۆمێنتێن فەرمی و یادگاری. بەرگێ دوویێ بەحسێ كۆمەلكۆژیا گوندێ كۆچۆ هاتیە كرن. بەركێ سیێ ئێش و ئازارێن رزگاربوویێن ل ژێر دەستێ داعش. بەرگێ چوارێ هندەك گەنگەشەنە ل سەر كارەساتێ. بەرگێ پێنچێ بەحسێ پێشمەرگەیێن چیایێ شنگالێ. بەرگێ شەشێ ئێش و ئازارێن زارۆكێن ئێزدی و بەرگێ حەفتێ بەحسێ 76 كۆمكۆژیێن ئێزدی هاتیە كرن و بەرگێ هەشتێ ژی داتایێن قۆربانیێن ئێزدی د كارەساتا شنگال دا هاتینە كۆمكرن) و هەروەسا مە وێنێن هەموو قوربانیێن شەری ژی ل دووماهیا بەرگێ هەشتێ هەڤپێچ كرینە.
تعليقات