ل شنگال دەزگه‌هێ خێرخوازیێ بارزانی ھاريكاريا پێنج ھەزار خێزانان دکه‌ت

باسنيوز:

دوابەدوای دەستپێکی ھەڵمەتی ھاوکارییە خۆراکییەکانی دەزگای خێرخوازیی بارزانی بە ھەماھەنگیی وەزارەتی کۆچ و کۆچبەرانی عێراقی، پێنج ھەزار خێزانی دیکەی لە شنگال ھاوکاری کران.

ڕۆژی سێشەممە 10/10/2017،  دەزگای خێرخوازیی بارزانی کاروانێکی دیکەی ھاوکارییەکانی گەیاندە ئاوارەکان لە شنگال و لەم چالاکییەیدا پێنج ھەزار خێزانی ئاوارە بە ھەماھەنگیی وەزارەتی کۆچ و کۆچبەرانی عێراقی لە کۆمەڵگەکانی (خانەسور  دگورێ) و شارەدێی (سنونێ) سوودمەند دەبن.

ئەم چالاکییە سێیەمین چالاکیی دەزگای خێرخوازیی بارزانییە لە ماوەی ھەفتەیەکدا کە لە شنگال بەڕێوەی دەبات و لە کۆی ھەر سێ چالاکییەکە 13 ھەزار ئاوارە پێداویستیی خۆراکییان پێشکەش کراوە.

دەزگای خێرخوازیی بارزانی، ھاوکاریی جۆراوجۆر بە ھەماھەنگیی ڕێکخراو و ناوەندە جیھانی و ناوچەییەکان پێشکەشی ئاوارە و پەنابەران دەکات، تەنیا لە ماوەی مانگی نۆدا ھاوکاریی خۆراکی پێشکەشی 105 ھەزار و 336 خێزان کردووە.

ھەر لە ڕۆژی سێشەممەدا 10/10/2017، دەزگای خێرخوازیی بارزانی لە سێکتەری پەروەردەدا قوتابخانە بنەڕەتییەکانی نۆ گوند لە سنووری ئیدارەی گەرمیاندا بەسەر کردەوە، جانتا و پێداویستیی خوێندنی پێشکەشی 314 قوتابی کرد.

قوتابییانی پۆلەکانی یەک تا شەشی بنەڕەتی لە گوندەکانی (پیازە جار، سماق، سەید جەژنی، فەتاح عومەر، کانی ماران، کۆڵەجۆی حەمەجان، کارێزەی حەمەکەیفە، کەوا چەرموو و توران شێخ سەلام) لە ھاوکارییەکانی دەزگای خێرخوازیی بارزانی سوودمەند بوون.

لە چالاکییەکانی دەزگای خێرخوازیی بارزانی لە ئیدارەی گەرمیاندا، تا ئێستا 724 قوتابی لە 16 قوتابخانەدا جانتا و پێداویستیی خوێندنیان پێشکەش کراوە.

ئەم ھاوکارییانەی دەزگای خێرخوازیی بارزانی پێداویستیی خوێندنی ساڵێکی قوتابییەکان پڕ دەکاتەوە و پاڵپشتییەکی مادیی باشە بۆ خێزانی قوتابییەکان و مەبەست لێی پشتیوانیکردن و ھاندانی قوتابییەکانە بۆ بەردەوامیدان بە پرۆسەی خوێندن و سەرکەوتنیان.

دەزگای خێرخوازیی بارزانی، ھەر دوێنێ سێشەممە و لە درێژەی ھەڵمەتی ھاوکارییەکانی بۆ قوتابییانی بنەڕەتیی سەرتاسەری ھەرێمی کوردستان، چالاکییەکی بۆ قوتابییانی سنووری پەروەردەی شارباژێر بەڕێوە برد، کە تێیدا جانتا و پێداویستیی خوێندنی پێشکەشی دوو ھەزار و 976  قوتابیی بنەڕەتی پۆلەکانی یەک تا شەش کرد.

بە مەبەستی پشتیوانیکردنی قوتابییەکان و ھاندانییان بۆ بەردەوامی بوونیان لە خوێندن و سەرکەوتنیان، جانتا و پێداویستی خوێندی ساڵێک بۆ قوتابییەکان دابین دەکرێت، جانتاکان بە دیزاینێکی جوانە بۆ قوتابییانی بنەڕەتی پۆلەکانی یەک تا شەش ئامادە کراون.

لە دەستپێکی ساڵی خوێندنی نوێوە دەزگای خێرخوازیی بارزانی لە قوتابخانەی رۆژھەڵاتی بنەڕەتی لە ھەولێر قۆناغێکی نوێی ھاوکارییەکانی خۆی لە سێکتەری پەروەردەدا ڕاگەیاند و لەم قۆناغەدا 50 ھەزار قوتابیی پۆلەکانی یەک تا شەشی بنەڕەتی سوودمەند دەبن.

ساڵانە دەزگای خێرخوازیی بارزانی لە سێکتەری پەروەردەدا چالاکیی جۆراوجۆر بەڕێوە دەبات، کە تا ئێستا بریتی بوون لە: (دروستکردن و نۆژەنکردنەوەی قوتابخانەکان و دابینکردنی پێداویستیی خوێندن بۆ قوتابخانەکان و قوتابییان و ھەروەھا خولی تایبەت بە فێرکردن و بەکارھێنان) کە ئەم چالاکییانە بە سپۆنسەری و ھاوکاریی ڕێکخراو و خێرخوازە ھەرێمی و جیھانییەکان بەڕێوە دەبرێن.