بارزانی: به‌غدا دانوستاندنان ره‌تبكه‌ت دێ ده‌وله‌تێ راگه‌هینین
WAAR-دهۆك:
سه‌رۆكێ هه‌رێما كوردستانێ راگه‌هاند؛ گه‌ر پشتی رێفراندومێ به‌غدا ئه‌نجامان ره‌تبكه‌ت، دێ ده‌وله‌تا كوردستانێ راگه‌هینن و دوپات ژی كر وه‌زیرێ به‌رگرییا ئه‌مریكا ب ئاشكرایی گۆتییه وی واشنتۆن دژی رێفراندومێ نینه.
مه‌سعوود بارزانی سه‌رۆكێ هه‌رێما كوردستانێ د هه‌ڤپه‌یڤینه‌كا رۆژنامه‌یا شه‌رقولئه‌وسه‌ت دا گۆت: گه‌لێ كوردستانێ هیڤیخوازه حكومه‌تا ئیراقێ ئه‌نجامێن رێفراندومێ قه‌بوول بكه‌ت و پشتی رێفراندومێ به‌غدا بهێته پێش و دانپێدانێ ب ئه‌نجامێن وێ بكه‌ت، لێ گه‌ر ب گه‌ف و خوه دووركرنێ ئه‌نجامان ره‌تبكه‌ت، سه‌ركردایه‌تییا كوردستانێ ئێكسه‌ر دێ ده‌وله‌تا كوردستانێ راگه‌هینیت.
بارزانی دا زانین ژی، د سه‌ره‌دانا خوه‌یا هه‌ولێرێ دا وه‌زیرێ به‌رگرییا ئه‌مریكا ب ئاشكرایی گۆتییه ئه‌مریكا دژی رێفراندوما هه‌رێمێ نینه، لێ تنێ ئه‌و د ترسن رێفراندوم كاریگه‌ریێ ل شه‌رێ دژی داعشێ بكه‌ت، لێ وان واشنتۆن پشتراستكرییه رێفراندوم ناهێته پاشخستن و كاریگه‌ریێ ژی ل شه‌ڕێ داعشێ ناكه‌ت.
سه‌رۆك بارزانی جاره‌كا دی دوپاتكر رێفراندوما سه‌رخوه‌بوونا كوردستانێ ب چ ره‌نگان ناهێته پاشخستن و د ده‌مێ خوه دا دێ هێته كرن، ب تنێ د حاله‌ته‌كی دا دێ باس ل پاشخستنا وێ كه‌ن، ده‌ما پێگهۆره‌كێ باشتر ژ رێفراندومێ هه‌بیت، ب دیتنا وی ژی، تاكه پێگهۆر گه‌ره‌نتیه‌كا نێڤده‌وله‌تی یا نڤێسی یه كو ئیراق و جڤاكا نێڤده‌وله‌تی ل سه‌ر رازی ببن و تێدا رۆژا سه‌رخوه‌بوونا كوردستانێ بهێته دیاركرن.
سه‌رۆكێ هه‌رێمێ گۆت ژی: كه‌ركووك ب تنێ باژارێ كوردان نینه، به‌لكو باژارێ هه‌موو پێكهاته‌یێن جودا و كوردستانییانه و پشتی رێفراندومێ هه‌موو ئالی ب خوه‌شی و ئارامی و هه‌ڤپشكی دێ د وی باژاری دا ژین، ده‌رباره‌یی ده‌ستێوه‌ردانێن ئیرانێ ژی سه‌رۆك بارزانی دوپات كر گه‌له‌ك ب ئاشكرایی وی گۆتییه به‌رپرسێن ئیرانی، رێ ب هه‌وه ناهێته‌دان هین دناڤا كوردستانێ دا ببنه خودانێن بریارێ.
تعليقات