لژنەك بۆ قەرەبووكرنا جانگۆری و بریندار و بێ سەروشوونان ل شنگال و شێخان و باشیكێ هاتە پێك ئینان
ئێزدیخان نیوز:
ب مەرەما خۆرتكرنا پەیوەندیێن دووقولی دناڤبەرا،جڤاتا رۆحانی یا ئێزدیان و دیوانا ئەوقافا مەسیحی و ئێزدی و سابئە مەندایین ل بەغدایێ،ل پەرستگەها پیرۆزا لالش بەرێز "عسمەت تەحسین بەگ"كورێ میرێ ئێزدیان میر تەحسین سەعید عەلی بەگ پێشوازی ل شاندەكێ هەر سێ ئایینان كر.
راگەهاندنا جڤاتا رۆحانی یا ئێزدیان دیاركر كو دانەیەك بۆ مالپەرێ(ئێزدیخان نیوز)هنارتیە،ئیرۆ چارشەمبوویێ 23تەباخا 2017ێ، شاندەكێ دیوانا ئەوقافا مەسیحی و ئێزدی و سابئە مەندایین ل بەغدایێ پێكهاتی بوو ژ"رەعەد كجكجە"سەرۆكێ دیوانێ و شاندەكێ دگەل دا سەرەدانا پەرستگەها پیرۆزا لالش كر،دهەڤدیتنێ دا كورێ سەماحەتا میری دگەل كجكجە چەند پرس و دۆزێن گرێدایی جڤاكێ ئێزدی گۆتۆبێژكرن،بەرێز عسمەت تەحسین بەگ دووپات ل پرسا گرنگیدان ب خزمەتكاریێن سەرەكی و پشتەڤانیكرنا باژێرێ شنگالێ كر ژ ئالیێ دروستكرنا نەخۆشخانان،ب مەرەما هاریكاریكرنا نەخۆشان چنكو شنگال گەلەك دوورە ژ پارێزگەها دهۆكێ.
هەر دهەڤدیتنێ دا عسمەت تەحسین بەگ لسەر شیانێن تەرخانكرنا دراڤی بۆ دروستكرنا زانكۆ یان پەیمانگەهان ل شنگالێ و پرسا قوتابیێن ئێزدی ل زانكۆیێن عێراقێ دگەل وەزیرێ خووندنا بلند و ڤەكۆلینێن زانستی ئاخڤی و بەحسێ دۆزا ڤەگۆهاستنا پۆلیسێن ئێزدی ئەوێن لسەر میلاكێ پاراستنا بەرهەمان ژبۆ پاراستنا مەزارگەهێن ئایینی یێن ئێزدیان ل دەڤەرێن،ژبۆ گەهاندنا وێ بۆ وەزارەتا ناڤخۆ.
ژبال خۆڤە سەرۆكێ دیوانا ئەوقافان دووپات كر:"كوژمێ دراڤی ژ بوودجا دیوانان ب دەست ڤە هاتیە و لسەر هەرسێ ئایینان هاتیە دابەشكرن،پێخەمەت ئاڤاكرنا مەزارگەه و كەنیسەیان".
هەروەسا كجكجە ئاماژە دا گرنگیا قەرەبووكرنا جانگۆری و بریندار و بێ سەروشوونان ژ وەلاتیان ژ ئۆپەراسیۆنێن سەربازی و تیرۆرستی،بۆ ڤێ چەندێ لژنەكا هەڤبەش ژ نوونەراتیا ئەوقافێ ل شنگال و شێخان و باشیكێ هاتیە پێكئینان بۆ وەرگرتنا مامەلێن تایبەت بڤی بابەتی ڤە.
تعليقات