نەتەوەیێن ئێكگرتی:كار لسەر دۆسەیا جینۆسایدا ئێزدیان بەردەوامە و گەهشتیە قۆناغێن پێشكەفتی
ئێزدیخان نیوز:
ب مەرەما گەهاندنا داخوازی و رەوشا ئێزدیان یا دەردەسەری،پشتی روودانێن شنگالێ و كارەساتا ئێزدیان بۆ جیێن نێڤ دەولەتی،شاندەكێ ئێزدیان لگەل جێگرێ ئەمیندارێ گشتی یێ نەتەوەیێن ئێكگرتی بۆ كاروبارێن مرۆڤایەتی و جێگرێ نوونەرێ ئەمیندارێ گشتی یێ نەتەوەیێن ئێكگرتی ل عێراقێ كۆمبوو.
راگەهاندنا جڤاتا رۆحانی یا ئێزدیان دراگەهاندنەكێ دا ئاشكەراكر:دڤێ كۆمبوونێ دا بەحسێ گەلەك بابەتان هاتە كرن و یا گرنگتر پرسا پشتەڤانیكرنا دەڤەرێن ئێزدیان یێن رزگاركری ل شنگال و باشیك و بەحزانێ و پشتەڤانی و پێگەهاندن و چارەسەركرنا رزگاربوویان ژ دەستێ داعشێ ل دەرڤەی عێراقێ و پێشكێشكرنا خزمەتكاریان بۆ ئێزدیان ل كەمپان دا،دووپات لسەر گرنگیا هاریكاریا ئێزدیان هات كرن كو ئەو پتر زەرەرمەندن ژ هێرشا داعشێ.
ژ لایێ خۆڤە شاندێ نەتەوەیێن ئێكگرتی دووپات كر كو كاركرن لسەر دۆسەیا جینۆسایدا تایبەتا ب ئێزدیان ڤە بەردەوامە و گەهشتیە قۆناغێن پێشكەفتی.
ل دووڤ شاندی كو نەتەوەیێن ئێكگرتی لگەل حكومەتا فیدرال ل بەفدا و حكومەتا هەرێما كوردستانێ رێككەفتیە،بۆ دابینكرنا پاراستنێ بۆ كێمینەیان ل شنگال و دەشتا نەینەوا.
تعليقات