رۆژنامەڤانەكێ ئێزدی نووترین زانیارییان ل سەر رەوشا شنگالێ ئاشكەرا دكەت
ئێزدیخان نیوز:
رۆژنامەڤانەكێ شنگالێ رادگەهینت،كو هندەك جهێن نەیاسایی ل قەزایێ دا بووینە ئاستەنگ و بەربەست بەرامبەر ڤەگەریانا خەلكێ و هەم ژی ئاڤەدانكرنێ و جینۆساید كرنا شنگالێ،هەروەسا پشتی وەلاتێ توركیا راگەهاندی كو دێ دەست ب ئۆپەراسیۆنەكا سەربازی ل دژی پەكەكێ ل شنگالێ كەت،خەلكێ ناوچەدارییا سنوونێ ب تایبەتی بەرهەڤیێن خۆ دكەن ب رەڤن و جارەكا دی ئاوارەی دەڤەرێن هەرێما كوردستانێ ببن، ئەگەر هاتوو توركیا شنگال تۆپبارانكر.
رۆژنامەڤانێ ئێزدی"رائد غانم"خەلكێ شنگالێ یە بۆ مالپەرێ(ئێزدیخان نیوز)گۆت:"ل رێككەفتی 7/4/2017ێ،من سەرەدانا باژێرێ شنگالێ كر و بۆ ماوێ سێ رۆژان ل وێدەرێ مام،دڤێ سەرەدانێ دا ئاگەهداری رەوشا ئاواران ل سەنتەرێ شنگالێ و سنوونێ و سەردەشتێ بووم كو رەوشەكا پەریشان و ب زەحمەت دان،ژبەر نەبوونا سیستەما خزمەتكارییان و خزمەتكاری ب گشتی ل دەڤەرێ نە ل ئاستێ پێتڤی دان و نەبوونا بنگەهێن ساخلەمیێ و قوتابخانا هەر تشتەكێ ب ژیانا وان ڤە گرێدایی بت ل دەڤەرێ دا دكێمن و پێتڤیێن ژیانێ لبەر دەسێ خەلكێ نینن و حكومەتا هەرێما كوردستانێ هاریكاریا خەلكێ دكەت و حكومەتا عێراقێ شنگال پشتگوهاڤێتیە و رێكخراوێن نێڤ دەولەتی یێن ل سنوونێ كاردكەن دچەندین بواران دا هاریكاریێ ناكەن".
غانم ئەو چەندە ژی راگەهاند:"ل ناوچەدارییا سنوونێ خەلك داخوازا چێكرنا جاددەیان و دروستكرنا بنگەهێن ساخلەمیێ و قوتابخانان دكەن و هەر تشتەكێ گرێدایی ب ژیانا وان ڤە بت،دیسان دڤیا رێكخراوێن نێڤ دەولەتی سەرەدانا شنگالێ بكەن بۆ ئاڤەدانكرنا وێ".
ناڤهاتی راگەهاند ژی هندەك جهێن نەیاسایی ل قەزایێ دا بووینە ئاستەنگ و بەربەست بەرامبەر ڤەگەریانا خەلكێ و هەم ژی ئاڤەدانكرنێ و جینۆساید كرنا شنگالێ،تشتێ بالكێش د هەر دەڤەرەكا شنگالێ دا گۆرێن بكۆم تێدانە و ئەگەر بێدەنگی ل سەر ڤان گۆران بمینت باوەرم هەتا سالەكا دی هەستیكێن ڤان قوربانیان بەر ئاڤا بارانێ بچن و تنێ سیم ل دۆرا ڤان گۆران هاتینە دانان،دخوازین وەزارەتا شەهید و ئەنفالكریان ڤەكۆلینێ ل سەر گۆرێن ئێزدیان بكەت و پێشبینی دكەین ل دەردۆرێن مووسلێ ژی هەبن".
رۆژنامەڤانی ئاشكەراكرژی رەوشا ئێمناهیێ ل دەڤەرێ یا ئارامە و باشە،بەلێ پشتی خەلكێ شنگالێ زانی كو دبت سوپایێ توركیا ئۆپەراسیۆنەكا سەربازی ل شنگالێ ئەنجام بدەت، بەری دەست ب وێ ئۆپەراسیۆنێ بێتە كرن خەلكێ سنوونێ ب تایبەتی بەرهەڤیێن خۆ دكەن ب رەڤن و جارەكا دی ئاوارەی دەڤەرێن هەرێما كوردستانێ ببن، ئەگەر هاتوو توركیا شنگال تۆپبارانكر.
ژلایەكێ دیڤە تەكەزكر كو سەنتەرێ شنگالێ پتر ژ 80%وێرانبوویە،بەلێ سەرەرای ڤێ وێرانیێ هندەك خەلك ڤەگەریایە ناڤ سەنتەرێ قەزایێ،هەروەسا خەلكێ شنگالێ دخوازن شنگال ببتە پارێزگەه و سەر ب هەرێما كوردستانێ ڤە بت،داكو بكارن ژیانا خۆ وەكی هەموو دەڤەرێن دی یێن كوردستانێ ببنە سەری.
تعليقات