بارزانی: دڤێت گه‌لێ كورد بگه‌هیته سه‌روه‌رییا خوه
WAAR – دهۆک:
سه‌رۆكێ هه‌رێما كوردستانێ په‌یامه‌ك ب هه‌لكه‌فتا جه‌ژنا نه‌وروزێ به‌لاڤكر و تێدا راگه‌هاند؛ پێدڤییه گه‌لێ كورد بگه‌هیته سه‌روه‌رییا خوه و خودان بریار و چاره‌نڤیس و ژیانا خوه بیت و هه‌ر ئه‌ڤه ژی، باشترین به‌رسڤ و بلندترین وه‌فایه بۆ شه‌هیدان.
مه‌سعوود بارزانی سه‌رۆكێ هه‌رێما كوردستانێ، د وێ په‌یامێ دا، پیرۆزباهیێن جه‌ژنا نه‌ته‌وه‌یی و سه‌رسالا كوردی، ل مالباتێن شه‌هیدان و هه‌موو گه‌لێ كورد و پێكهاته‌یێن ئۆلی و نه‌ته‌وه‌یی كرییه و دیاركرییه كو ئادار و نه‌وروز، هێمایێ شكاندنا زولمێ و ده‌ركه‌ڤتنا روناهی و ژیانێ نه بۆ گه‌لێ كورد و ب وێ رامانێ دهێن كو خه‌بات و قوربانیدانێ، دێ به‌رهه‌م هه‌بیت.
دایه زانین ژی كو نابیت قۆربانیدانا بێ ژماره یا گه‌لێ كورد، هه‌ر ژ به‌رگریكرن و ژ مان و ناسنامه‌یا خوه تا شكاندنا تیرۆرستێن داعش، یا بێ ئه‌نجامبیت و پێدڤییه گه‌لێ كورد بگه‌هیته سه‌روه‌رییا خوه و خودان بریار و چاره‌نڤیس و ژیانا خوه بیت و هه‌ر ئه‌ڤه ژی، باشترین به‌رسڤ و بلندترین وه‌فایه بۆ خوینا شه‌هیدان.
سه‌رۆكێ هه‌رێمێ ئاماژه‌كرییه ژی، قۆربانیدانا گه‌لێ كورد و قاره‌مانییا پێشمه‌رگه‌ی و ئه‌و فه‌رهه‌نگا زه‌نگینا پێكڤه ژیانێ، د چاڤێن جیهانێ دا ڤه‌شارتی نینن، به‌لكو نها هه‌موو جیهان شانازیێ ب پێشمه‌رگه‌ی و گه‌لێ كوردستانێ دبه‌ت، هیڤی خواستییه ژی كو خه‌لكێ سه‌ربلندێ كوردستانێ، ل سه‌ر خوراگرییا خوه به‌رده‌وامبن و گوهدارییا چو ده‌نگێن نه‌شاز نه‌كه‌ن كو بخوازن، باوه‌ریبخوه‌هاتن و خوراگریێ ژ هه‌وه بستینن.
تعليقات