نێچیرڤان بارزانی: نه‌ورۆز جه‌ژنا ڤه‌ژاندنا گیانێ نشتیمانپه‌روه‌رییه
WAAR – دهۆک:
سه‌رۆكێ حكومه‌تا هه‌رێما كوردستانێ په‌یامه‌ك ب هه‌لكه‌فتا جه‌ژنا نه‌وروزێ و سه‌ر سالا نوو یا كوردی پێشكێشكر و تێدا راگه‌هاند: نه‌ورۆز جه‌ژنا ڤه‌ژاندنا ب هێزبوونا گیانێ نشتیمانی یێ نه‌ته‌وه‌یێ كورد و هه‌می گه‌لێ كوردستانێ یه.
نێچیرڤان بارزانی ، سه‌رۆكوه‌زیرێن هه‌رێما كوردستانێ د په‌یاما خوه یا پیرۆزكرنا جه‌ژنا نه‌ورۆزێ دا، پیرۆزباهی ل خێزانێن سه‌ر بلندێن شه‌هیدان كر و راگه‌هاند: ب خوین و قاره‌مانییا وان شه‌هیدان، نوكه كوردستان یا جه‌ژنا سه‌ركه‌فتنێ و ژناڤبرنا داعشێ دگێریت. هه‌وره‌سا پیرۆزباهی ل پێشمه‌رگه‌یێن قاره‌مان و هێزێن ئاساییش و نافخوه و خوەبه‌خشان ژی كر ئه‌وێن سه‌قامیگرییا كوردستانێ پاراستی. دیسان ل فه‌رمانبه‌رێن كوردستانێ ژی پیرۆز كر ئه‌وێن خوەراگرییا وان، هێز دایه گه‌ل و حكومه‌تا هه‌رێمێ.
د په‌یامێ دا هاتییه ژی: نه‌ورۆز رۆژا نووبوونا گیانێ نشتیمانپه‌روه‌رییا كوردییه، ژ به‌ركو خوه‌رست نوو دبیت، له‌ورا نه‌ورۆز بۆ كورد و كوردستانێ جه‌ژنا نووبوونێ یه.
بارزانییێ سه‌رۆك وه‌زیر ئاشكه‌را ژی كر: ئیراده‌یا خه‌لكێ كوردستانێ و كاركرنا به‌رده‌وام یا حكومه‌تا هه‌رێمێ سه‌خمه‌راتی رێكخستنا كاروبارێن حكومه‌تێ و پشكداریكرن ل گه‌ل سازییێن نێڤده‌وله‌تی، هیڤییه‌كا بهێزه ژبۆ ب داوی ئینانا قه‌یران و كێشه‌یان.
سه‌رۆكێ حكومه‌تێ د په‌یاما خوه دا هیڤی خواستن خه‌لكێ هه‌رێمێ دوستایه‌تی و خوه‌شڤیانا خوه ل هه‌مبه‌ری خوه‌رستێ جوانێ كوردستانێ نیشان بده‌ن و پاقژییا ژینگه‌هێ بلند راگرن
تعليقات