گەنجێن ئاوارێن ئێزدی كۆمەلەكا خێرخوازی پێك دئینن
ئێزدیخان نیوز:
كۆمەلا شنگال یا خێرخوازی ل كەمپا مام رەشان هاتیە پێك ئینان،كو دچەندین بیاڤان دا خزمەتا ئاوارا و رزگاربووی و هەژار و گەنجان دكەت.
عومەر خرمش،بەرپرسێ كۆمەلا شنگال یا خێرخوازی بۆ مالپەرێ(ئێزدیخان نیوز)گۆت:"كۆمەل ژبال تەخەكا گەنجان ڤە یێن گەنجێن كەمپا مام رەشان ژ هەردوو رگەزان هاتیە پێك ئینان،ب ئارمانجا پشتەڤانیكرنا كەسێن پێدڤی ژ خەلكێ مە ل كوڤە بن و نەیا گرێدایی چوو جهانە ب فەرمی،ئەو پشت بەستنێ ل سەر بەخشینێن كۆبوونێن ئەندامان و خێرخوازان دكەت ژ خەلكێ مە و ب تایبەت ل وەلاتێ ئەلمانیا".
خرمش ئەو چەندە ژی خویاكر:"مە گەلەك ئارمانج هەینە وەك پشتەڤانیكرنا كەسێن پێدڤی و چاڤدێریكرنا وان و پشتەڤانیكرنا رزگاربوویان و تەخا گەنجان و هشیاربوون ل سەر،دیسان هاریكاریكرنا ئێتیمان و چاڤدێریكرنا وان و پشتەڤانیا هەر چالاكیەكێ ئارمانج هاریكاریكرنا كەسێن پێدڤی و هەژاران بت ژ خەلكێ مە،هەماهەنگی كرن بۆ ئاڤاكرنا پرۆژێن بچووك بۆ هەژار و كەسێن پێدڤی و پشتەڤانیكرنا وان ژ لایێ مادی و مەعنەوی ڤە".
ب گۆتنا خرمش كۆمەلێ چ ئارمانج و هیڤیەكا سیاسی نینە و تنێ ئارمانجا وێ ئەوە وەك دخالێن ل سەری دا هاتینە دیاركرن و ب هەموو پێكۆلێن خۆ كار دكەین و تایێ مە یێ سەرەكی ل كەمپا مام رەشانە،هەول ددەین ل ماوەیێ داهاتی تایێن دی ڤەكەین،هەر ژ دەستپێكێ و هەتا نۆكە تووشی گەلەك بەربەستان بووینە،دگەل هندێ بەردەوامین ل سەر كارێ خۆ و دروشمێ مە ئەوە(خەلكێ مە ئۆمێدا مەنە،ب پشتەڤانیا وە كارێ مە بەردەوام بت).
تعليقات