بنگەهێ لالش:هۆشداریێ ددەینە هەر كەسێ بازرگانیێ ب كێشا ئێزدیان بكت و خەلكێ مە بەرەف شەرەكێ تایفگەری ببەت
چ شاندێن ئێزدیان ماف نینە نوونەراتیا هەموو ئێزدیان بكت نە ل جڤینێن هەرێمی نە ژی ل یێن نێڤ دەولەتی
پشتی كارەساتا شنگال ل 3 تەباخا 2014 روودای مە وەكو بنگەهێ لالش سەرەرایی وێ پەریشانیا مە هەمووان دیتی مە هەموو شیانێن خۆ مەزاختن پێخەمەت هاریكاریا خەلكێ خۆ یێ ئاوارە بكەین ژهەر كنارەكی و دەرنجامدا مە كاری پالپشتیەكا فەرمی ب دەستڤە بینن چ ژئالیێ هاریكاریان چ ژی ژئالیێ لوجستی ڤە ژبال حكومەتا هەرێما كوردستانێ ، ب تایبەت ژی ل ڤێ داویێ دەزگایێن مە یێن پەیوەندیدار ل هەرێمێ كاری دەزگایێن ئاینێ ئیسلامێ ل وەلاتێ ئوردن و كۆمارا مسرێ قایل بكن كو كریارێن داعش هەمبەر ئێزدیان كرین شەرمەزار بكن و ئارمانجێن وان بنبربكن، و ئەم وەك بنگەهێ لالش كارێ ڤان دەزگەهان بلند دنرخینن كو دخزمەتا هەموو پێكهاتێن گەلێ كوردستانێ دابوو ب تایبەت كوردێن ئێزدی.
مە دڤێت ئەم دیاربكەین كو هەر جارا شاندەكێ فەرمی ژجڤاتا رۆحانیا ئێزدیان سەرەدانا هەر مەرجەعیەتەكا سونەیان یان شیعەیان بكت چ ل ناڤخۆ چ ژی ژدەرڤە بۆ هندێ بكارن پشتەڤانیەكێ پەیداكەن كو كریارێن داعش شەرمەزار بكن و فشارێ بێخنە سەر وان مەرجەعیەتان كو فتوایان دژی داعش دەربێخن و خەلكێ مە ژ تیرۆرستان پشتراست بكن ب هەموو شیان ئەم پشتەڤانن ،لێ هەگەر چار كەس یاریا ب پێشەرۆژا ئێزدیان بكن پێخەمەت بەرژەوەندیێن خۆ یێن سیاسی و سەرەدانا كۆمارا ئیرانێ بكن و هەڤدیتنان ل گەل مەزنە بەرپرسێن وان بكن و دیاربكن كو ئەو نوونەرێن ئێزدیانە ئەڤ چەندە نائێتە قەبوولكرن و نابت كورێ ئۆلدارەكی مەزن یێ ئێزدیان ب ناڤێ بابێ خۆ پاخڤت و نوونەراتیا وی بكت ئەڤ چەند ل ناڤ جڤاكا ئێزدیان بخۆ ژی نائێتە قەبوولكرن.
چ وەسا كر كو ئەڤ شاندە كۆم ببەت كو دئەنجامدا هندەك دناڤا ڤی شاندی دانە باوەریێ ب كوردیاتیا ئێزدیان نائینن، گەلۆ كانێ ئەوێ ب كۆتایا ئێزدیان 13 هزار دەنگێن ئێزدیان برین و ئەڤە دوو سال دەربازبوون نە دناڤا خەلكێ خۆدا.. چ بۆ وان كریە یێن دەنگێن خۆ داینێ؟و ئەو كی بوون دەنگێ خۆ داینێ؟بێ گۆمان ئەو چ ژچارەنڤیسێ وان ژی نزانت، چنكو ئەڤە دوو سالە دبەغدایێ دا ئی ڤەشارتی وپاشان چاوا چێتبت هەڤپەیمانیێ ل گەل شوفینیێن سنە یێن بەرێ بكت و هەڤپەیمانیێ شیعایێ نۆكە بت ،ئەرێ ئەڤە بەرژەوەندێن كەسۆكی ومادی نینن؟هەروەسا نابت كو كەسەكی یاسایی كو پەسەندا وی هاتبتە كرن ژبال جڤاتا رۆحانیا ئێزدیان وژبال كەسەكی سەركردە دپارتی دیموكراتی كوردستان دا پێخەمەت دامەزراندنا وی ل وەزارەتا دەرڤە یا عێراقێ كو بێژت ئەز نوونەراتیا وەزارەتا ناڤبری و جڤاكا ئێزدیان دكەم،هەردیسان نابت كەسەكی تا نۆكە دۆسەیا وی یا گەندەلیێ ل رێڤەبەریا دەستپاكیێ‌َ بت كو دئەنجامدا گوژمەكێ مەزن ئی دراڤی ب ناڤێ پێكئینانا حەشدا شەعبی ل شنگالێ وەرگرت بت و خۆ ب هەژمێرت نوونەرێ ئێزدیان.
هەروەسا چاوا چێدبت كو كەسەك نوونەراتیا پارتەكا دەرڤەی سنورێن عێراقێ بكت و بڤێت گهۆرینا دجوگرافیەتا ئێزدیان دا بكت و كانتۆنا چێكت و ناڤمالیا ئێزدیان جودا بكت نوونەراتیا ئێزدیان بكت؟ئەڤێن خەلكێ مە ب دروشمان دخاپاندن راستیێن وان دیاربوون پشتی ژناڤچۆنا داعش چنكو دیاربوو ئەو نەهاتینە ئێزدیان قورتال بكن بەلكو هاتینە ئێزدیان ژهەڤ جودا بكن و شنگال بكەنە كانتۆن لەورا نۆكە ئاسێ ماینە و دیاردكن كو هەگەر ئەو ڤەگەرن دێ تەر و هشك پێكڤە شەوتینن.هنگی گەلۆ كی دێ باجا مەزن دەت ژبلی جڤاكا مە یا ئێزدیان.ئەڤێن كو ئەڤ شاندە ب هەڤرا كۆمكرین بتنێ بەرژەوەندیا كەسایەتیە و مەرەم ژێ كۆمكرنا دراڤی وبازرگانیكرنە ب رەوشا پەریشانا خەلكێ مە.
باش یە خویایە بۆ هەموویان كو ئەڤێن چووینە تەهران دڤێن ئێزدیان ب خاپینن و بەرەف شەرەكێ تایفگەری و مەزهەبی ببەن ، ئەرێ كا رۆلێ حەشدا شەعبی ل قەزا شنگال؟ ئەم هەموو دزانن كێ شنگال ئازادكرو كی نۆكە دپارێزت؟ و چ هەبوونا حەشدا شەعبی ل وێدەر نینە و نابت بمینن ژی بێ كو رێكەفتنەكا سیاسی هەبت دناڤبەرا هەولێر و بەغدا دا.
چاڤدێرێن سیاسی باش دزانن كی ئەگەرێ پەیداكرنا ئالۆزیایە ل شنگال؟ لەوا نابت ئەو كەسێ ل ئالۆزی و فتنەیان بگەرت ببتە فاكتەرێ بەرقراربوونێ،چنكو ئەو بخۆ ل سەر قەیرانان دژیت.وئەڤ چەندە بخۆ ل بال ڤان كەسان خۆیان دبت ئەڤێن كو ئەڤ شاندە پێكئینایی یێن كو دڤێن ئارمانجێن خۆ یێن كەسۆكی ب دەستڤە بینن پێخەمەت پەیداكرنا گوژمەكێ دراڤی بێ كو هزر دراستیا ئێش و ژانێن ڤی خەلكی و پێشەرۆژا وان دا بكن
ئەم هەموو دزانن كێ شنكال ئازادكر و كێ قوربانی دان ئەم رێزێ ل هەر كەسێ قوربانی داین دگرن، دیسان خویایە ئەڤە دووسال ونیڤ دەربازبوون كێ هەمبێزا ڤی َخەلكێ مە كر و هاریكاری پێشكێشی وان كرن.
ئەم دبینن كو پێشەرۆژا ئێزدیان ب تایبەت ل شنگال خەلكێ وێ بخۆ دێ خودان بریار بن ب رێیا راپرسینەكا راستەقینە و ئەڤێ یەكێ جەنابێ سەرۆك بارزانی ژی گەلەك جاران داكۆكی لێ كریە و ئەم بخۆ ژی پشتگیریا جەنابێ وی دكن بۆ ڤێ یەكی چنكو چ لایەنێن سیاسی نە یێن حزبی نەژی میلیشیاتان ماف نینە بریارێ ژبال خەلكێ دەڤەرێ بدەن.
ل داویێ ژی ئەم پشتەڤانیا هەلویستێ میر تەحسین بەگ و سەماحەتا بابا شێخ دكەین سەبارەت هەلویستێ وان یێ ئاشكرا هەمبەر ڤی شاندی كو خۆ كریە نوونەرێ ئێزدیان ، لێ دراستی دا ئەو بتنێ نوونەراتیا خۆ دكن ، و چەند دەزگایێن بەغدایێ و تەهران خاپاندی نە پێخەمەت ب دەستڤەئینانا هندەك بەرژەوەندیان ل سەر كیستێ رەوشا پەریشانا خەلكێ مە و ئێش وژانێن وان.
دەستەیا بلندا بنگەهێ لالش
دهوك 26/1/2017
تعليقات