سبه‌ى نادیا موراد دێ ب بالیۆزا تایبەتا نەتەوێن ئێکگرتى ئێتە هەلبژاردن
ئێزديخان نيوز:
سوبەهی ئێنێ، نادیە موراد وەکی بالیۆزا تایبەتا نەتەوێن ئێکگرتی ژبۆ نیەت پاقژیێ د بیاڤێ مافێن ژنان دا دێ هێتە هەلبژاردن.
مالپەرێ نڤیسینگەها نەتەوێن ئێکگرتی ژبۆ مادەیێن هشبەر و تاوانان (UNODC) بەلاڤکریە، نادیە موراد بەربژێرا خەلاتا ئاشتی کو ئێکە ژ ئێزدیێن رزگاربوویێن دەستێ داعشێ وەکی بالیۆزا نیەت پاقژ بۆ رێزلێنان ژ رزگاربوویێن بازرگانیکرن ب مرۆڤان دێ هێتە هەلبژاردن "ئەڤەژی ئێکەمین جارە رزگاربوویا دەستێ توندوتیژیێ وی پۆستی وەردگریت".
بریارە سوبەهی دەمژمێر ٣ی پشتی نیڤرۆ ب دەمێ ئەمریکا د مەراسیمەکا تایبەت دا ب ناڤێ 'رۆژا ئاشتیا ناڤدەولەتی' ل ژۆرا ئەنجومەنا راسپاردی یا نەتەوێن ئێکگرتی کو بنگەهێ وێ ل نیویۆرکا ئەمریکایە ئەو پۆست ب نادیە مورادێ بهێتە دان.
دهێتە چاڤەرێکرن سامانسا پاوەر، بالیۆزێ ئەمریکا ل نەتەوێن ئێکگرتی و بان کی مون، سکرتێرێ گشتیێ نەتەوێن ئێکگرتی و ئەمەل کلونی، پارێزەرا نادیە مورادێ و داکۆکیکارا مافێ مرۆڤان یا ناڤدەولەتی بەشداریا وێ مەراسیمێ بکەن.
هەروەسا هژمارەک ژ چالاکڤانێن ئێزدی ل عێراقێ و پارتێن ئێزدی و کوردی و عێراقی و ٥ رزگاربوویێن دەستێ داعشێ و ئەنجومەنا رحانی و تەڤایا سەرکردێن هێزێن ئێزدی ل شنگالێ و هژمارەک کەسێن دی کو رۆل د کەیسا ئێزدیان دا هەبووینە ژلایێ نەتەوێن ئێکگرتی ڤە هاتینە ڤەخاندن بۆ وێ مەراسیمێ.
نادیە موراد بەرێ ژی ژلایێ نەتەوێن ئێکگرتی ڤە بۆ باژێرێ جنێڤ هاتبوو گازیکرن و ل هەمبەر کۆمسیۆنا مافێ مرۆڤان یا نەتەوێن ئێکگرتی بەحسا وی هەیامی کر کو ژلایێ داعشێ ڤە هاتبوو دەستەسەرکرن و بەحسا ڕەوشا ئێزدیان کر.
هەروەسا ئێکە ژ "١٠٠ کەسێن ب باندۆرێن ساڵا ٢٠١٦ێ".
نادیە موراد، کچە ئێزدیا رزگاربوویا دەستێ داعشێ یە ئێکەمین کچ بوو کو چیرۆکا خوە دەمێ کو داعشێ دەستدرێژی بۆ سەر وێ کربوو ل هەمبەر ئەنجومەنا ئاسایشێ ل نەتەوێن ئێکگرتی بەحس کر.
ژێده‌ر:ئێن ئارتى
