تیرۆرستێن داعشێ ل فەللوجە تاوان ل دژی ئێزدیان ئەنجامداینە
ئێزدیخان نیوز:
ئیرۆ 18تەموزا 2016،دبەیاننامەیەكێ دا،"ڤیان دەخیل"نوونەرا كوردێن ئێزدی ل ئەنجوومەنێ نوونەرێن عێراقێ،داخواز ژ"حەیدەر عەبادی" سەرۆك وەزیرێن عێراقێ كر دووڤچوونێ بكەن ل سەر تاوانێن ل دژی ئێزدیان هاتینە ئەنجامدان ب تایبەت ل فەلووجە ل سەر دەستێ رێكخراوا داعشێ،پشتی دانپێدانا شایتحالان یێن داین ژناڤ فەللوجە.
دەقێ بەیاننامێ:
ل دەستپێكێ پیرۆزباهیێ ل وە دكەم بۆ ب دەست ڤە ئینانا سەركەفتنان ل سەر گرۆپێن داعش یێ تیرۆرستی ل فەللوجە و ئەنبار،ل ڤێدەرێ داخوازێ ژ وە دكەم وەك سەرۆك وەزیرێن حكوومەتا فیدرال یا عێراقێ و سەركردێ گشتی یێ هێزێن چەكدار دووڤچوونێ بكەن ل سەر تاوانێن ل دژی ئێزدیان ب تایبەت ل فەلووجە ل سەر دەستێ رێكخراوا داعشێ پشتی دانپێدانا شایتحالان یێن داین ژناڤ فەللوجە و ل ڤیدیۆیەكێ دا دكیۆمێنتكرینە،ژ دەولەتا وە دخوازین دووڤچوونێ لگەل تاوانباران ڤەكەن یێن هەڤكاری لگەل داعشێ كرین و سزازا بێتە ئیمزاكرن ل سەر هەر ئێكێ تاوان ل دژی سڤیلان و بوویە ئەگەرێ سەبیكرن و گرتنا ئێزدیان.
