نێزيكى65 هه‌زار كۆچبه‌رێن ئێزدی ل وه‌لاتێن ئه‌وروپى داخوازا په‌نابه‌ریێ كریه
ئێزديخان نيوز:
هه‌تا نها نێزیكی 65 هزار كوردێن ئێزدی ل وه‌لاتێن ئورۆپی داخوازا په‌نابه‌ریێ كریه، ژێده‌ره‌كی ژی بۆ (باس) دیار كر، هژمارا كوردێن ئێزدی نێزیكی 550 هزار كه‌سانه و گۆت: پشتی هاتنا داعش نێزیكی 1280 ئێزدیان شه‌هید كه‌فتینه و 850 وه‌لاتی ژی بێ سه‌روشین بووینه و 12 گۆرێن ب كۆمی یێن ته‌رمێن ئێزدیان تێدا هاتینه ڤه‌دیتن.
پشتی رێژه‌كا مه‌زن یا خه‌لكی ژ به‌ر ڤان روودانێن دووماهیێ، مینا قه‌یرانا دارایی و كاره‌ساتا شنگالێ، كوردێن ئێزدی كۆچبه‌ری وه‌لاتێن ئه‌ورۆپی بوون و ب تایبه‌ت وه‌لاتێ ئه‌لمانیا نها ل وی وه‌لاتی بیزَار بووینه.
گه‌نجه‌كێ ئێزدی دیار كر، وی نێزیكی 10 هزار دۆلاران مه‌زاختن و گه‌هشتیه وه‌لاتێ ئه‌لمانیا، به‌لێ ئه‌و نه‌شیا ژ دوو هه‌یڤان پێڤه‌تر ل وێرێ بمینیت، چونكو ژیانا وان گه‌له‌ك یا نه‌خۆش بوو و خه‌لكێ ئه‌لمانیا گه‌له‌ك ب بێ رێزی ل گه‌ل په‌نابه‌ران دئاخفتن.
(ب) ناڤێ گه‌نجه‌كێ ئێزدیه، كۆژمێ 10 هزار دۆلاران مه‌زاختن هه‌تا ب كۆته‌كی گه‌هشتیه وه‌لاتێ ئه‌لمانیا و ماندیبوونه‌كا گه‌له‌ك مه‌زن دیت، ژ بلێ هندێ چه‌ند جاره‌كان ژی ژیانا وی كه‌فته د مه‌ترسیێ دا هه‌تا شیای بگه‌هیته بنه‌جهێ، به‌لێ ئه‌و نه‌شیا دوو هه‌یڤان پێڤه‌تر ل وی وه‌لاتی بژیت و ئێكسه‌ر ڤه‌گه‌ریا هه‌رێما كوردستانێڤه.
زێده‌تر گۆت: پشتی ئه‌م گه‌هشتینه وه‌لاتێ ئه‌لمانیا، ئێكسه‌ر چووینه دبن خیڤه‌تان ڤه و خوارن و ڤه‌خوارنا مه ژی گه‌له‌ك یا بێسه‌روبه‌ر بوو، یا ژ وێ نه‌خۆشتر ئه‌و بوو كو خه‌لكێ ئه‌لمانیا گه‌له‌ك بێ رێزی به‌رامبه‌ر په‌نابه‌ران دكر و هه‌ر جارا په‌نابه‌ر دیتبان گۆتنێن نه‌خۆش دگۆتنێ، له‌وما ئه‌ز جاره‌كا دی ڤه‌گه‌ریامه‌ڤه.
پێشوان شێراز كۆچبه‌ره‌كێ ئێزدییه نۆكه ل وه‌لاتێ ئه‌لمانیایه بۆ (باس) دیار كر، پشتی ئه‌م كۆچبه‌ری وه‌لاتێ ئه‌لمانیا بووین، مه حه‌ز دكر ژیانه‌كا خۆش ببه‌ینه سه‌ر، لێ نۆكه ژیانا مه ل ڤێرێ نه‌خۆشتر لێهاتیه، چونكو هه‌ر رۆژ مه ژ كه‌مپه‌كێ ڤه‌دگۆهێزنه كه‌مپه‌كا دی و هه‌تا نهۆ چو چاڤپێكه‌فتنێن دادگه‌هێ ل گه‌ل مه نه‌هاتینه كرنه و خوارنه‌كا بێ سه‌روبه‌ر دده‌نه مه و ئه‌م و پتریا كۆچبه‌ران د یاریگه‌هێن وه‌رزشی داینه و هه‌تا نۆكه پاره بۆ مه ژ عیراقێ دهێته ڤه‌گوهاستن بۆ ب رێڤه‌برنا ژیانا مه.
مه‌حما خه‌لیل قائیمقامێ شنگال دیار كر، مه‌ره‌ما سه‌ره‌كی یا داعش و هاتنا وان بۆ شنگال، وێرانكرنا ئێزدیان بوو، به‌لێ بلا ئه‌و باش بزانن جۆگرافیا شنگالێ چو جاران وێران نابیت، ئه‌م به‌رمایێن 74 فه‌رماناینه و ئه‌و هه‌می فه‌رمانێن ب سه‌ر ئێزدیان هاتینه نه‌شیاینه ئێزدیان وێران بكه‌ن هه‌تا داعش بشێت و گۆت: فه‌رمانا نها ب سه‌رێ كوردێن ئێزدی هاتی، به‌رێ نێزیكی 80 هزار كوردێن ئێزدی دایه ده‌رڤه‌ی وه‌لاتی و ل گه‌له‌ك وه‌لاتان هاتینه پارڤه‌كرن و هه‌ر هنده‌ك چووینه وه‌لاته‌كی، به‌لێ نزانین كا نها ئه‌و د چو ره‌وشدانه.
ژێده‌ر:باسنيۆز
