ل كۆمه‌لگه‌ها شاريا ساليادا دامه‌زراندنا بنگه‌هێ لالش هاته ساخكرن
ئێزديخان نيوز:
ب ئاماده‌بوونا چه‌ندين كه‌سايه‌تيێن حكوومى و كادرێن حزبى و رۆژنامه‌ڤان و چالاكڤانێن بوارێ راگه‌هاندنێ و مامۆستا و قوتابيان،ل رێككه‌فتى 11ئه‌يارێ 2016،بنگه‌هێ لالش تايێ شاريا ب هه‌ڤكارى دگه‌ل نڤيسينگه‌هێن لالش گرعزێر و بير ئاده‌م،رابوون ب ساخكرنا بيره‌وه‌ريا دامه‌زراندنا بنگه‌هێ لالش ب گێرانا چه‌ندين برگێن جۆرا وجۆر ل هۆلا لالش 1ل كۆمه‌لگه‌ها شاريا.
پشتى خۆله‌كه‌كا رێزگرتنێ بۆ گيانێ پاكي قوربانيێن كوردستانێ و كاره‌ساتا مه‌زنا شنگالێ و سه‌ر كاروانێ شه‌هيدا،رێ و ره‌سمێن ئاهنگێ ده‌ستپێكرن،ل ده‌ستپێكێ په‌يڤا ب خێرهاتنێ ژئاليێ(دلگه‌ش سه‌ليم) به‌رپرسێ بنگه‌هێ لالش تايێ شاريا ڤه هاته خووندن و تێدا به‌حسێ رۆلێ بنگه‌هى كر و دا خوياكرن كو داعش و ديڤه‌لانكێن وان نكارن ببن رێگر درێيا گێرانا رێ و رسمێن ئۆلى و نه‌ته‌وايه‌تى،پاشى چه‌ندين وێنێن چالاكيێن بنگه‌هێ لالش هاتنه نيشاندان،جهێ ئاماژێ هه‌ر دڤێ بيره‌وه‌ريێ دا چه‌ند هۆزان هاتن خووندن ژئاليێ هۆزانڤان(داود قيرانى) و كچا وى يا به‌هره‌مه‌ند(نيهاد قيران)ڤه.
ژلايه‌كێ ديڤه خه‌لاتێن رێزگرتنێ ل سه‌ر كارگێريێن قوتابخانێن شاريا هاتنه به‌لاڤكرن پێخه‌مه‌ت خزمه‌تا وانا به‌رده‌وام ژبۆ قوتابيێن ده‌ڤه‌رێ،پاشى سميناره‌ك هاته پێشكێشكرن ژئاليێ(جه‌عفه‌ر سمۆ)به‌رپرسێ راگه‌هاندنا ده‌سته‌يا بلندا بنگه‌هێ لالش، ل دۆر رۆلي راگه‌هاندنا لالشێ ل ده‌ستپيكا دامه‌زراندنا وێ و تا ئيرۆ و تێدا به‌حسێ كارتێكرنا وان كاودانێن كو رووبه‌روى ده‌ڤه‌رێن ئێزديان دبن ل سه‌ر راگه‌هاندنا لالشێ كر.
ژلايێ خۆڤه هۆنه‌رمه‌ندێ مه‌زن(ده‌خيل ئۆصمان)ب ده‌نگێ خۆ يێ زه‌لال رابوو ب گۆتنا سترانه‌كێ ل سه‌ر شنگالێ،ئه‌ڤ ئاهنگه ب هه‌لكرنا چرايێ 24ێ و شكاندنا كيكا ئاهنگێ ب داوى هات.
