ڤيان ده‌خيل،په‌رله‌مانتارا كوردا ئێزدى ل ئه‌نجوومه‌نێ نونه‌رێن عێراقێ دبه‌ياننامه‌يه‌كێ دا داخوازكر كو ئه‌و ئۆپه‌راسيۆنێن له‌شكه‌رى يێن هه‌وايى يێن ل دژى باره‌گايێن داعشێ دئێنه ئه‌نجامدان،پێدڤيه دئاگه‌هدار بن كو رێكخراوا داعش يا تيرۆرستى يا مه‌شقدانێ ب نێزيكى هه‌زار سنێله‌يێن ئێزدى ل سه‌ربازگه‌هێن خۆ دا دكه‌ت.
هه‌روه‌سا نڤيسينگه‌ها(ڤيان ده‌خيل) ئيرۆ 3/1/2016 ئاشكه‌راكريه،دبه‌ياننامه‌يه‌كێ ده(ڤيان ده‌خيل) بانگا خۆ ئارسته‌ى سه‌رۆكێ وه‌زيرێن حكوومه‌تا عێراقێ و وه‌زيرێن به‌ره‌ڤانى و نافخۆ و هه‌موو سه‌ركردايه‌تيێن له‌شكه‌رى يێن عێراقێ كريه و داخوازكريه كو پێدڤيه لێنێرينه‌ك هه‌بت لسه‌ر وان ئۆپراسيۆنێن سه‌ربازى يێن هه‌وايى يێن ب ئارمانجكرنا پێگه‌هێن داعشێ ژ باره‌گا و كۆگه‌هێن چه‌كى و سه‌ربازگه‌هێن مه‌شقدانێ دئێنه ئه‌نجامدان،پێدڤيه دئاگه‌هدار بن كو نێزيكى هه‌زار سنێله‌يێن ئێزدى يێ دئێنه مه‌شقدان ل سه‌ربازگه‌هێن داعشێ.
ئه‌م دگه‌ل هه‌ر هه‌وله‌كا شه‌رى نه بۆ ژناڤبرنا ڤێ رێكخراوا تيرۆرستى،ئه‌م دبينين دۆرێن 1060سنێله‌يێن ئێزدى كو ته‌مه‌نێ وان دناڤبه‌را 12هه‌تا 16سالان دانه يێ دئێنه مه‌شقدان ل سه‌ربازگه‌هێن گرێدايێ ڤێ رێكخراوا تاوانبار،پشتى ئه‌و ناچاركرين و مێشكێ وان شوشتين، يان ژى گه‌فێن سه‌رژێكرنێ ل خێزانێن وان كرين يێن دده‌ستێ ڤێ رێكخراوا تيرۆرستى دا،ل ده‌مێ ره‌تكرن نه‌چنه مه‌شقدانێ ل وان سه‌ربازگه‌هان.
ل سه‌ر كه‌سى نائێته ڤه‌شارتن ئه‌ڤ سنێلنه ئێزدينه ئه‌ون يێن هاتينه ره‌ڤاندن و ئێخسيكرن ده‌مێ رێكخراوا تيرۆرستى ده‌ست گرتيه سه‌ر قه‌زا شنگالێ،خێزانێن وان دده‌ستێ رێكخراوا توندره‌و دانه و هه‌تا نۆكه چ ل عێراقێ يان سوريا يان ده‌ره‌كا دى.
ئه‌م داخوازێ دكه‌ين ده‌ست ب وان ئۆپراسيۆنان بێته كرن كو ڤان گه‌نجان رزگاربكه‌ن و دووباره بێنه پێگه‌هاندن.
