(ئۆمێد خۆشناو)سه‌رۆكێ فراكسيۆنا پارتى ل په‌رله‌مانێ كوردستانێ و (شێخ شامۆ) ئه‌ندامێ په‌رله‌مانێ كوردستانێ و سه‌رۆكێ ده‌سته‌يا بلندا بنگه‌هێ لالش،دوهى 26كانوونا دوويێ 2016، ل هه‌ولێرێ پێشوازى ل شانده‌كى كۆمه‌لا دۆستايه‌تيا كوردستان_ژاپۆن ب سه‌رۆكاتيا(ئه‌كينۆ بۆكينۆشيتا)كه‌سايه‌تيێ ناڤدارێ ژاپۆنێ و دۆستێ گه‌لێ كورد دگه‌ل(ئيشينا هيزۆياكى)رێڤه‌به‌رێ ئيكۆپلانێت ل نه‌ته‌وه‌يێن ئێكگرتى كرن.
راگه‌هاندنا ده‌سته‌يا بلندا بنگه‌هێ لالش ئاشكه‌راكر:دهه‌ڤديتنێ دا ب درێژى دانوستاندنا ل سه‌ر ره‌وشا هه‌رێما كوردستانێ ب گشتى و كوردێن ئێزدى ب تايبه‌تى هاته كرن و ده‌ڤه‌را شنگال و خه‌لكێ وێ ته‌وه‌رێ سه‌ره‌كيێ هه‌ڤديتنێ بوو،ژبال خۆڤه(شێخ شامۆ) به‌حسێ هێرشا تيرۆرستێن داعشێ كر و گۆت جيهان هه‌موو شايتحالێ وێ زۆرداريا داعش ل ئێزديان كريه و جينۆسايده‌ك دژوار بوو،به‌لێ به‌داخه‌وه هێشتا ب جدى گه‌له‌ك وه‌لاتێن جيهانێ نه‌هاتينه سه‌رخه‌تێ ژبۆ ناڤبرنا تيرۆرستێن داعشێ،تانۆكه ژى ب هه‌زاران كچ و ژن و زارۆكێن ئێزديا ل ژێر ده‌ستێ وان تيرۆرستان دا ماينه،بال كشانده سه‌ر وێ چه‌ندێ كو هێزێن پێشمه‌رگه‌ى تاكه هێزه كارى هێز و هه‌يبه‌تا داعش ژ ناڤ ببه‌ت و ب هيڤينه هه‌موو ده‌ڤه‌رێن مه ل سه‌ر ده‌ستێ پێشمه‌رگه‌ى بێنه رزگاركرن.
هه‌روه‌سا ل سه‌ر داخوازا شاندێ ژاپۆنى(شێخ شامۆ) دوو راپۆرت پێشكێشى وان كرن،ژبۆ كو بزانن چ ب سه‌رێ شنگال هاتيه و چه‌ند زه‌ره‌رێن گيانى و مادى و مه‌عنه‌وى گه‌هشتيه خه‌لكێ شنگال و چ پێدڤيه بۆ ئاڤه‌دانكرنا ڤێ ده‌ڤه‌رێ بێته كرن،هه‌تا كو ژيان ل ڤان ده‌ڤه‌را بزڤره،دگه‌ل دا ژى كۆمه‌كه وێنه و ڤيديۆيێن وێرانكارى و ئازارێن خه‌لكێ مه نيشاندان.
ژلايه‌كى ديڤه(شێخ شامۆ) سه‌رۆكێ شاندێ ناڤبرى ب ئارمێ بنگه‌هێ لالش خه‌لاتكر و گۆت ئه‌ڤ خه‌لاتكرن نيشانه‌كه بۆ وێ يه‌كێ ون نه ژبير نه‌كه‌ن و مه پێدڤى ب هاريكاريكرنا وه‌لاتێن مينا ژاپۆنێ هه‌يه،چنكو ئاڤاكرنا شنگال ب زه‌حمه‌ته و ژ كارينێن حكوومه‌تا مه ب زۆرتره.
هه‌ر دچارچۆڤه‌يێ سه‌ره‌دانا خۆ دا شاندێ ژاپۆنى دێ سه‌ره‌دانا كه‌مپێن ئاواره‌يان ل هه‌رێمێ كه‌ت،قه‌وله ل وه‌خته‌كى نێزيك ئه‌ڤ شانده جاره‌كا دى سه‌ره‌دانا كوردستانێ بكه‌ت و ژ نێزيك ڤه شنگال و ده‌ڤه‌رێن وێرانكرى ببينن.
دڤێ هه‌ڤديتنێ دا هه‌ر ئێك ژ(د.سيروان زهاوى) راوێشكار ل نڤيسينگه‌ها سه‌رۆكێ جڤاتا وه‌زيران و (سيروان سرينى)ئه‌ندامێ په‌رله‌مانێ عێراقێ يێ به‌رێ و ئه‌ندامێ كۆمه‌لێ و (نورى ره‌شيد)سه‌رۆكێ كۆمه‌لا كوردستان_ژاپۆن دئامادبوون.
هه‌مان شاند ل رۆژا دووشه‌مبوويێ(25/1/2016)سه‌ره‌دانا په‌رله‌مانێ كوردستانێ كربوو،دگه‌ل جێگرێ سه‌رۆكێ په‌رله‌مانى و هنده‌ك ئه‌ندامێن په‌رله‌مانى جڤين پێك ئانى بوون.
