كونسلێ ئيماراتێ دێ داخوازيێن خه‌لكێ شنگالێ گه‌هينته‌ حكوومه‌تێ

ئێزديخان نيوز:

راشد ئه‌لمه‌نصورى،كۆنسلێ وه‌لاتێ ئيماراتێ ل هه‌ولێرێ دسه‌ره‌دانا خۆ ده‌ بۆ شنگالێ راگه‌هاند،داخوازيێن خه‌لكێ شنگالێ بۆ جهه‌تێن حكوومه‌تا ئيماراتێ دێ ئێنه‌ بلندكرن.

 

ل ده‌ڤه‌را سه‌رده‌شتى ئيرۆ 16/12قايممقامێ شنگالێ(مه‌حما خه‌ليل)پێشوازى ل(راشد ئه‌لمه‌نصورى)كۆنسلێ وه‌لاتێ ئيماراتێ ل هه‌ولێرێ و شانده‌كى دگه‌ل ده‌ كر. 

 

راگه‌هاندنا قايممقاميا قه‌زا شنگالێ دياركر،قايممقامێ شنگالێ و كۆنسلێ ئيماراتى ب هه‌ڤكارى دگه‌ل ده‌زگه‌هێ خێرخوازيێ بارزانى و رێكخراوا خاچا سۆرا ئيماراتى هاريكاريێن مرۆڤايه‌تى ل سه‌ر وان خێزانێن ل وێده‌رێ به‌لاڤكرن. 

 

 پشتى به‌لاڤكرنا هاريكاريان قايممقامێ شنگالێ و كۆنسلێ ئيماراتى و شاندێ دگه‌ل ده‌ چۆنه‌ باژێرێ شنگالێ و سه‌ره‌دانا خيڤه‌تا قايممقاميه‌تێ كرن و پاشى گه‌ريانه‌ك ل ناڤ باژێرى ده‌ كرن و سه‌ره‌دانا نه‌خۆشخانا شنگالێ ژى كرن و ئه‌و كارێن داعشێ يێن سۆتنێ و دزيێ و خرابكرنا نه‌خۆشخانێ ديتن،ئه‌وا ب سه‌رێ نه‌خۆشخانێ هاتى ژلايێ شاندى ڤه‌ هاته‌ ديكيۆمێنتكرن.

راشد ئه‌لمه‌نصورى،كۆنسلێ وه‌لاتێ ئيماراتێ گۆت:داخوازيێن خه‌لكێ شنگالێ بۆ جهه‌تێن حكوومه‌تا ئيماراتێ دێ ئێنه‌ بلندكرن.

 

قايممقامێ شنگالێ ژى داخواز ژ حكوومه‌تا ئيماراتى كر پشته‌ڤانيا خه‌لكێ شنگالێ بكه‌ت و پشكداريێ دئاڤه‌دانكرنا ئاڤاهيێن باژێرى ده‌ بكه‌تن. 

 

ژبال خۆڤه‌ خه‌لكێ شنگالێ سوپاسيا قايممقامێ شنگالێ و كۆنسلێ ئيماراتى و ده‌زگه‌هێ خێرخوازيێ بارزانى و رێكخراوا خاچا سۆرا ئيماراتى كرن،بۆ وان هاريكاريێن مرۆڤايه‌تى يێن پێشكێشى وان كرين.