چار رێكخراوێن مه‌ده‌نى ل پارێزگه‌ها دهۆكێ ب هه‌لكه‌فتا رۆژا پاراستنا مافێ مرۆڤى ل جيهانێ،به‌ياننامه‌يه‌ك به‌لاڤكرن.
ده‌قێ به‌ياننامه‌يێ:
ل ده‌هى مه‌ها(كانونا ئێكێ)ل سالا (1948)وه‌كى ئه‌ڤرۆ نوونه‌رێن نه‌ته‌وه‌يێن ئێكگرتى دكۆمبوونا خۆ دا ل باژێرێ پاريس رازيبوون ل سه‌ر ده‌رێخستنا ئێكه‌م به‌لگه‌نامه ژبۆ پاراستنا مافێ مرۆڤى ل جيهانێ.
راگه‌هاندنا جيهانى يا مافێ مرۆڤى ده‌ستووره‌كێ گشتى يه بۆ پاراستنا مافێن وه‌كهه‌ڤى و ئازادى وسه‌ربه‌ستيا هه‌موو مرۆڤان بێ جوداهى و دژى هه‌ر تووندوتيژيه‌كا بێته كرن،هه‌روه‌سا هه‌ر كه‌سه‌كى ماف هه‌يه رێيێن ئاشتيانه و ل دووڤ ياسايێ داخوازا مافێن خۆ بكه‌ت و ل گۆر به‌ندێن(29_30) ێ راگه‌هاندنا جيهانى يا مافێن مرۆڤى به‌لێ جهێ داخێ يه پشتى(67)سالان ژ ده‌رچۆنا ئه‌ڤى ده‌ستوورى ئه‌ڤرۆ ل رۆژهه‌لاتا ناڤه‌راست گرۆپه‌كا تيرۆرستان ل بن هنده‌ك ناڤان هێرش كريه سه‌ر ده‌وله‌تا عێراقێ و سووريێ ب گشتى و هه‌رێما كوردستانێ ب تايبه‌تى و كوردستان كه‌فتيه بن گه‌ڤێن مه‌زنێن داعش و ب هه‌زاران خه‌لك ئاواره و ده‌ربه‌ده‌ربوويه و ب ساخى هاتينه بن ئاخكرن و مالێن كوردان هاتينه تالانكرن و پێشمه‌رگه به‌ره‌ڤانيێ ژ ئاخا كوردستانێ دكه‌ن و شه‌هيد و بريندار دبن كو مه هه‌موويان پێكڤه پێدڤيه‌كا مه‌ز نب هه‌ڤدوو هه‌يه و دڤێت پێكڤه كاربكه‌ين تاكو كوردستان ژئه‌ڤێ قۆناغا هه‌ستيار و مه‌ترسيدار ده‌رباز دبيت.
ئه‌م ب ناڤێ وان رێكخراوێن مه‌ده‌نى ل پارێزگه‌ها دهۆكێ ئه‌وێن ناڤێن وان ل خوارێ هاتينه دياركرن بڤێ هه‌لكه‌فتا پيرۆز كارين تيرۆرێ ريسوا و مه‌حكوم و شه‌رمه‌زار دكه‌ين،چنكو جڤاكێ كوردستانێ هه‌ده‌م جڤاكێ پێكڤه‌ژيانا ئايينى و نه‌ته‌وه‌يى يه ودژى هه‌ر كاره‌كى تيرۆرى و خوين رێتن و توندوووتيژيێ يه،و مێژوويێ ژى يا سه‌لماندى كو ب تووندووتيژيێ چاره‌سه‌ريا هيچ ئاريشه‌يه‌كێ نائێته كرن ،ئانكوب رێيا دانوستاندنێ هه‌موو ئاريشه دئێنه چاره‌سه‌ركرن.
داخوازێ ل جڤاكێ نێڤ ده‌وله‌تى دكه‌ين هاريكار بن ل گه‌ل هه‌رێما كوردستانێ كو ئه‌و كه‌سێن سڤيل يێن ژ ئاليێ داعش ڤه هاتينه ره‌ڤاندن ب زووترين ده‌م بێنه ئازادكرن و كريارێن وان ب ته‌ڤكوژى و جينۆسايد بێنه هژمارتن.
يا ژ هه‌موويێ كرنگتر ئێك ريزى و ئێك هه‌لويستيا نه‌ته‌ويا كورده ل هه‌ر چوار پارچێن كوردستانێ داكو ب رێيێن ئاشتى و دادپه‌روه‌ريێ ل سه‌ر روويێ ئه‌ردى بژين.
دگه‌ل رێزگرتنێ:
ئنستتيوتا دهۆك بۆ ره‌وشه‌نبيريا گشتى رێكخراوا مافێن مرۆڤى ل كوردستانێ_دهۆك
رێكخراوا كوردس يا گه‌شه‌پێدانێ رێكخراوا پرۆژێن بچووكێن گوندان_زاخۆ
رێكخراوا هاريكار يا نه‌حكوومى رێكخراوا ده‌نگێ پيران و خێزانێ
