ناديا مراد:هيڤيدارم وه‌لاتێن ئه‌ره‌بى وه‌كى كۆمارا مسرێ ده‌ليڤێ بده‌نه من
ئێزديخان نيوز:
ناديا مراد،كچا كوردا ئێزدى يا ژ ده‌ستێ تيرۆرستێن داعشێ رزگاربوويى،پشتى سه‌ره‌دانا خۆ بۆ وه‌لاتێ مسرێ ب داوى ئينايى،دووپاتكرهيڤيدارم ژ هه‌موو وه‌لاتێن ئه‌ره‌بى و ئيسلامى وێ ده‌ليڤێ بده‌نه من يا كو كۆمارا مسرێ دايا من،دا ناما من بگه‌هته وژدانا مرۆڤايه‌تيێ ل هه‌موو جيهانێ و تيرۆرێ ب ناڤێ ئايينى ژناڤ ببه‌ت.
ل رێككه‌فتى 29/12/2015(ناديا مراد) دبه‌ياننامه‌يه‌كێ ده راگه‌هاند،ب داوى هاتنا سه‌ره‌دانا من بۆ كۆمارا مسرێ،سوپاسيا مسرێ دكه‌م وه‌ك سه‌ركرده و گه‌ل و ب تايبه‌ت ژى سه‌رۆك كۆمارى عبدالفتاح ئه‌لسيسى كو ئه‌ز داخواز كريم و پێشوازى ل من كرين و پشته‌ڤانيه‌كا بێ سنوور پێشكێشى من كرى،هه‌روه‌سا سوپاسيا سه‌رۆك ئه‌لسيسى دكه‌م بۆ سه‌كنينا وى دگه‌ل كێشا ئێزديان وب ناڤێ گه‌لێ مسرێ دگه‌ل بن ده‌ستا بۆ به‌ره‌نگاربوونا شه‌رى و تيرۆرێ.
هه‌روه‌سا سوپاسيا شێخ شه‌لئه‌زهه‌ر و ئيمامێ مه‌زن ئه‌حمه‌د ئه‌لته‌يب دكه‌م بۆ پێشوازيا ل من كرين و دووپاتكرين ب ده‌رێخستنا به‌ياننامه‌يه‌كێ بۆ پشته‌ڤانيا ئێزديان و حه‌رامكرنا ده‌ست درێژيێ ل سه‌ر ئايينێ ئێزديان ب هه‌ر شێوه‌يه‌كى هه‌بتن. ل داويێ ژى يا گه‌له‌ك كارتێكرن ل من بوويى،ئه‌ز سوپاسيێن خۆ ئاراسته‌ى گه‌لێ مسرێ و راگه‌هاندنا مسرێ دكه‌م كو ل گه‌ل كێشا ئێزديان و ئازارێن ئێزديان و كێمينه‌يێن دى سه‌كنين.
هيڤيدارم ئه‌ز سه‌ركه‌فت بم بۆ ئاشكه‌راكرنا تاوانێن داعشێ يێن ب ناڤێ ئايينێ ئيسلامێ ئه‌نجامداين،ديسان هيڤيدارم سه‌ركه‌فت بم كو ئه‌ز باليۆز و كۆترا ئاشتيێ بم بۆ جڤاكێ خۆ،هه‌روه‌سا هيڤيدارم من ده‌نگێ ژنێ و زارۆكان گه‌هاندبت،ديسان من كارى بت ببمه ده‌نگێ يێن زۆردارى و زوولم لێ هاتيه كرن ژ هه‌موو كێمينه‌يان يێن بوسلمان و نه‌بوسلمان ئه‌وێن ژ شه‌رێ تيرۆرێ دنالن.
ناما من ژ مسرێ ده‌ستپێكر و دێ گه‌هته هه‌موو جيهانێ و هيڤيدارم ژ هه‌موو وه‌لاتێن ئه‌ره‌بى و ئيسلامى وێ ده‌ليڤێ بده‌نه من يا كو كۆمارا مسرێ دايا من،دا ناما من بگه‌هته وژدانا مرۆڤايه‌تيێ ل هه‌موو جيهانێ و تيرۆرێ ب ناڤێ ئايينى ژناڤ ببه‌ت و مرۆڤ ب هه‌موو هه‌مه‌جۆريا وان يا ئايينى ل هه‌موو جيهانێ ب ئێمناهى و ئاشتيێ بژين.
