(مه‌سعود بارزانى)سه‌رۆكێ هه‌رێما كوردستانێ سه‌ره‌دانا هه‌رسێ به‌ره‌يێن باشيك و خازر و ناوه‌ران كر و بۆ فه‌رمانده و پێشمه‌رگه‌يان راگه‌هاند،پاراستنا وه‌لاتى پێدڤى قوربانيدانێيه و كوردستان بوويه ب نرخه،چنكو خوون و قوربانى پێ دايه.
مالپه‌رێ پارتى ديموكراتى كوردستان راگه‌هاند،ل رێككه‌فتى 19/12/2015(مه‌سعود بارزانى)سه‌رۆكێ هه‌رێما كوردستانێ ب مه‌ره‌ما ژ نێزيك هايداربوون ل سه‌ر ره‌وشا به‌ره‌يێن شه‌رى و بارودۆخێ پێشمه‌رگه‌يى،سه‌ره‌دانا سه‌نگه‌رێن پێشمه‌رگه‌ى ل به‌ره‌يێن شه‌ر ل به‌ره‌يێ باشيكێ كر و ژنێزيك ڤه چاڤ ب فه‌رمانده و پێشمه‌رگه‌يێن هه‌رسێ به‌ره‌يێن خازر و باشيك وناوه‌ران كه‌ڤت.
دڤێ سه‌ره‌دانێ ده سه‌رۆك بارزانى په‌يڤه‌ك بۆ فه‌رمانده و پێشمه‌رگه‌يێن هه‌ر سێ به‌ره‌يێن باشيك و خازرو ناوه‌ران پێشكێشكر و تێدا ده‌ست خۆشى ل قاره‌مانى و سه‌ركه‌فتنێن هێزێن پێشمه‌رگه‌ى ل ڤان سێ به‌ره‌يان كر و سه‌ره‌خۆشى ل كه‌س و كارێن وان پێشمه‌رگه‌يێن كر يێن ل شه‌رێ دژى تيرۆرستان ده گيانێ خۆ به‌خت كرن و شه‌هيد بووينه و داخوازا سلامه‌تيێ بۆ برينداران خواست.
سه‌رۆك بارزانى ددرێژيا ئاخفتنێن خۆ دا به‌حسێ په‌له‌مارا چه‌ند رۆژێن بۆرى يا تيرۆرستێن داعشێ كر و بۆ وان سێ به‌ره‌يان راگه‌هاند،كو زێده‌تر ژ هه‌يڤه‌كێ يه تيرۆرستان خۆ بۆ ڤێ په‌له‌مارێ ئاماده‌كربوو و په‌له‌ماره‌كا مه‌زن بۆ سه‌ر سه‌نگه‌رێن پێشمه‌رگه‌ى ئه‌نجام دا،به‌لێ شكستنه‌كا مه‌زن خوارن.
سه‌رۆك بارزانى به‌حسێ قوربانيدانا پێشمه‌رگه‌ى كر و گۆت:پاراستنا وه‌لاتى پێدڤى قوربانيدانێيه و كوردستان بوويه ب نرخه،چنكو خوون و قوربانى پێ دايه و ماده‌م كوردستان خودان پێشمه‌رگه‌يه هه‌ر دێ سه‌ركه‌ڤت و ئه‌و چه‌نده ژى خسته‌روو كو جيهان ب چاڤێ رێز و ستايش سه‌يرى قوربانيدانا گه‌لێ كوردستانێ و هێزێن پێشمه‌رگه‌ى دكه‌ن و پێشمه‌رگه جێگه‌يێ شانازى كوردستان و دۆستێن كوردستانه.
سه‌رۆك بارزانى ئاماژه ب شه‌رێ ڤێ داويێ هێزێن پێشمه‌رگه‌ى و تيرۆرستێن داعشێ دا و راگه‌هاند،ئه‌و شه‌رنه وانه‌يه‌كا نوو بوون بۆ خۆراگرى هه‌موويان و پێدڤيه خالا لاوازێن خۆ نه‌هێلين و خالێن بهێزێن مه پته‌وتر بكه‌ين.
هه‌ر دڤێ سه‌ره‌دانێ ده سه‌رۆك بارزانى لگه‌ل فه‌رمانده و ئه‌ڤسه‌ر و پله‌دارێن هه‌رسێ به‌ره‌يێن باشيك و خازر و ناوه‌ران كۆمبوو و گوه ل راى و بۆچۆن و تێبينيێن وان گرت ل ڤى بارودۆخێ مه‌يدانى يێ به‌ره‌يێن شه‌رى و پێدڤيێن پيِمه‌رگه‌ى،هه‌روه‌سا ئه‌و پلان و به‌رهه‌ڤيێن سه‌ربازى به‌حسكرن كو بۆ داهاتى ل ڤان به‌ره‌يان ل ئارادان.
