كۆنگره‌يێ رۆژنامه‌ڤانيێ شاندێ ئێزديان و ئێكه‌تيا زانايێن ئۆلا ئيسلامێ ل كوردستانێ
ئێزديخان نيو:نێچيرڤان شێخ شامۆ
ل هه‌ولێرێ ئێكه‌تيا زانايێن ئۆلا ئيسلامێ ل كوردستانێ ئيرۆ17/11/2015پێشوازى ل شانده‌كى ئێزديان كر،ئه‌ڤ شانده ژ (حازم ته‌حسين به‌گ)جێگرێ ميرێ ئێزديان و(شێخ شامۆ)ئه‌ندامێ په‌رله‌مانێ كوردستانێ و سه‌رۆكێ بنگه‌هێ لالش و (كه‌ريم سلێمان)شيره‌تكارێ جڤاتا رۆحانيا ئێزديان و (خێرى بۆزانى)رێڤه‌به‌رێ گشتيێ كاروبارێن ئێزديان ل وه‌زاره‌تا ئه‌وقافا هه‌رێما كوردستانێ پێكهاتبوو.
دكۆمبوونه‌كێ دا هه‌ردوو ئاليان باس ل ره‌وش و قۆناغا نۆكه كوردستان تێرا ده‌رباس دبت و هشياريا پێكهاتێن كوردستانێ و خورتكرنا گيانێ پێكڤه‌ژيانا ئاينى و رێگريكرن ل وان ده‌ست و پلانێت دوژمنا،يێن دخوازن ئاگرێ فتنێ ل ناڤ ئێزدى و موسلمانان هلكن و ره‌وش و ئاراميا كوردستانێ تێك بده‌ن كر.
دئاليه‌كى دى يێ كۆمبوونێ دا(د.عبدالله)سه‌رۆكێ ئێكه‌تيا زانايێن ئۆلا ئيسلامێ ل كوردستانێ به‌حس ل كاره‌ساتا شنگال كر و ئه‌و كارێن دژى مرۆڤايه‌تيێ يێن كو دژى ئێزديان هاتى كرن ب تايبه‌ت كوشتنێن ب كۆم و ئێخسيركرنا كچ و ژنێن كوردێن ئێزدى وگۆت:ئه‌م وان ب ده‌يك و خوشكێن خۆ دزانن و داعش درنده و تيرۆرسته و ئاينێ ئيسلامێ يێ دووره ژ ره‌وشت و كارێن داعش و درۆژێن ده‌ستپێكێ دا مه كارێن وان ئيدانه كرينه.
پشتى ب داوى هاتنا كۆمبوونێ،كۆنگره‌يه‌كى رۆژنامه‌ڤانى هاته سازكرن،ژبۆ به‌لاڤكرنا دوو فه‌توايێن مفتيێت ئاينێ ئيسلامێ كو سه‌باره‌ت كارێن داعش ل دژى ئێزدى و مه‌سيحيا،ئێك ژوان خانا فه‌توايا وه‌لاتێ مسرێ و ياديتر ژى خانا گشتى يا فه‌توايا وه‌لاتێ ئوردنى ده‌رێخستينه لسه‌ر داخوازا ئێكه‌تيا زانايان ل كوردستانێ،كو دوو نه ژمه‌زنترين خانێت فه‌توا ل جيهانا ئيسلامى و دڤان دوو فه‌توا دا ب توندى ئيدانا تاوانێن داعش ل دژى ئێزديا ب تايبه‌تى و مه‌سيحيا ب گشتى هاتبوو كرن.
سه‌رۆكێ ئێكه‌تيا زانايێن ئۆلا ئيسلامێ ئه‌و چه‌نده ژى خوياكر،سوپاسيا دام و ده‌زگه‌هێن ب دكيۆمێنتكرنا كاره‌ساتێ رابووين دكه‌ين و دياركر ب هه‌موو پيوه‌ران ئه‌وا ل دژى ئێزديان هاتى كرن جينۆسايده،ل به‌رانبه‌ردا شاندێ ئێزديان سوپاسيا ڤێ پێنگاڤا ديرۆكى يا ئێكه‌تيا زانايێن ئۆلا ئيسلامێ كر،كو ته‌كه‌ز ل ئێكرێزى و پيكڤه‌ژيانا ئولى و نه‌ته‌وه‌ى كرن.
