وه‌زاره‌تا ره‌وشه‌نبيرى و لاوان پشته‌ڤانيا ده‌رهێنه‌ره‌كى كوردێ ئێزدى دكه‌ت
ئێزديخان نيوز:
درێورسمه‌كێ دا ل رێككه‌فتى 25/11/2015ب ئاماده‌بوونا (خالد دۆسكى) وه‌زيرێ ره‌وشه‌نبيرى و لاوێن حكوومه‌تا هه‌رێما كوردستانێ و(د.سالار عوسمان)بريكارێ وه‌زاره‌تا ره‌وشه‌نبيرى و (خه‌ليل عه‌بدولا)رێڤه‌به‌رێ گشتيێ ديوانا وه‌زاره‌ت و ژماره‌يه‌كا هۆنه‌رمه‌ند و هونه‌ردۆستان و رۆژنامه‌ڤانان،وه‌زاره‌تا ره‌وشه‌نبيرى و لاوێن هه‌رێمێ خه‌لاتێ رێزلێنانێ ب ده‌رهێنه‌رێ سينه‌مايى يێ كوردێ ئێزدى(نه‌وزاد شێخانى)په‌خشى.
هه‌ر دڤێ رێورسمێ دا بۆ رێزگرتن ل كارو به‌رهه‌مێن هونه‌ريێن ده‌رهێنه‌ر نه‌وزاد شێخانى و ئه‌ز خزمه‌تا ل بوارێ سينه‌مه‌يا كوردى دا كرى،خالد دۆسكى وه‌زيرێ ره‌وشه‌نبيرى و لاوان خه‌لاتێ رێزلێنانێ و چه‌پكه گول پێشكێشى شێخانى كرن و ده‌ست خۆشى ل كار و به‌رهه‌مێن سينه‌مايێن وى ئاراسته كر و هيڤيا سه‌ركه‌فتن و به‌رده‌واميا كارێن باشتر بۆ را خواست،بۆ ڤێ مه‌به‌ستێ پالپشت و هاريكاريا وه‌زاره‌تا ره‌وشه‌نبيرى بۆ را دووپاتكر.
ژلايێ خۆڤه هونه‌رمه‌ند نه‌وزاد شێخانى سه‌ره‌راى سوپاسيێ بۆ وه‌زاره‌تا ره‌وشه‌نبيرى ل پاى خه‌لاتكرنێ و رێزگرتن ل كارێن هونه‌رى و سينه‌مايى،خۆشحاليا خۆ نيشان دا ل پێدانا وى خه‌لاتێ رێزلێنانێ و راگه‌هاند،ئه‌ڤ رێزلێنانه فاكته‌ره‌كى ب هێزه بۆ به‌رده‌وام و كاركرن بۆ فلم و پرۆژێن هونه‌رى يێن زێده‌تر و باشتر،دووپاتكرژى ل چه‌ندين ڤيسته‌ڤالێن جيهانى خه‌لاتێ رێزلێنانێ وه‌رگرتيه،به‌لێ رێزلێنانا ژلايێ وه‌زاره‌تا ره‌وشه‌نبيرى و لاوان ب نرختر دزانم،ژبه‌ركو ژلايێ خه‌لك و حكوومه‌تا خۆ رێز ل كار و به‌رهه‌مێن وى هاتيه كرن.
