التخطي إلى المحتوى الرئيسي
بحث هذه المدونة الإلكترونية
رۆژنامه‌ڤانێن ئێزدى شونوارێن گۆرێن ب كۆم يێن هاتينه ديتن دكيۆمێنت دكه‌ن
ئێزديخان نيوز:
پشتى هێزێن پێشمه‌رگه‌ى ب سه‌رپه‌رشتيا راسته‌وخۆيا(سه‌رۆك بارزانى)شنگال رزگارى،چه‌ند گۆرێن ب كۆم يێن كوردێن ئێزدى ل ده‌ڤه‌رێن جواديێن شنگالێ هاتينه ديتن، رۆژنامه‌ڤانێن ئێزدى چۆينه شنگالێ بۆ دكيۆمێنتكرنا شونوارێن ڤان گۆران و دێ راده‌ستێ جهێن په‌يوه‌نديدار كه‌ن دا بگه‌هينه دادگه‌ها تاوانێن نێڤ ده‌وله‌تى.
سه‌عه‌د باپير،رۆژنامه‌ڤانه‌كى شنگالێ يه بۆ ئێزديخان نيوز دبێژت:رۆژنامه‌ڤانێن ئێزدى يێ كار دكه‌ن بۆ كۆمكرنا به‌لگه‌يان و دكيۆمێنتكرنا چيرۆكان بۆ دانه‌نياسينا كاره‌ساتا شنگالێ وه‌ك كۆمكوژييه‌كا ب كۆم،ديسان كۆمه‌كا رۆژنامه‌ڤانان هاتينه شنگالێ بۆ دكيۆمێنتكرنا شونوارێن گۆرێن ب كۆم ئه‌وێن ل پشتى رزگاركرنا شنگالێ هاتينه ديتن،هه‌تا نۆكه پێنج گۆر هاتينه ديتن و دێ ده‌ست ب دروستكرنا راپۆرتان كه‌ين به‌لگه و راستى تێدانه لسه‌ر وان تاوانێن ل دژى ئێزديان هاتينه ئه‌نجام دان،دێ راده‌ستى جهێن په‌يوه‌نديدار كه‌ين دا بگه‌هينه دادگه‌ها تاوانێن نێڤ ده‌وله‌تى.
فه‌لاح ره‌شۆكا رۆژنامه‌ڤانه‌كى دى يێ شنگالێ يه بۆ مالپه‌رێ ئێزديخان نيوز گۆت: ئه‌وا ئێزدى تووشبووينێ كاره‌سات و جينۆسايده ل دووڤ هه‌موو پيڤه‌ران،لسه‌ر رۆژنامه‌ڤانێن شنگالێ يا پێدڤى يه ئه‌وا رووداى دكيۆمێنت بكه‌ن وه‌كى گۆرێن بكۆم و مالێن مينرێژكرى و هه‌رفاندى ب شێوه‌يه‌كى ته‌مام و بگه‌هينه رۆژنامه‌ڤانيا جيهانى،هه‌تا بگه‌هته هه‌موويان بزانن چ ل شنگالێ روودايه،هه‌روه‌سا پشتى رزگاركرنێ سێ گۆرێن ب كۆم هاتينه ديتن،لسه‌ر رۆژنامه‌ڤانيێ فه‌ره بگه‌هينته جيهانێ.
پشتى هێزێن پێشمه‌رگه‌ى شنگال ب ته‌مامى ژ ده‌ستێن تيرۆرستێن داعشێ رزگاركرى،دلێگه‌ريانێن پێشمه‌رگه‌ى دناڤ شنگالێ دا چه‌ند گۆرێن ب كۆم يێن كوردێن ئێزدى هاتينه ديتن،چه‌ند به‌رپرسێن ئێزدى دخوازن ده‌ستكارى دڤان گۆران دا نه‌ئێته كرن و بێنه پاراستن هه‌تا لژنه‌يێن تايبه‌تمه‌ند ب كارێ راكرنا وان رادبن و ببنه به‌لگه بۆ دادگه‌ها تاوانێن نێڤ ده‌وله‌تى.
