ڤيان ده‌خيل:رۆژانه‌ 100ئێزدى به‌ره‌ڤ ئه‌وروپا دچن

ئێزديخان نيوز:

ڤيان ده‌خيل،په‌رله‌مانتارا كوردا ئێزدى ل په‌رله‌مانێ عيراقێ راگه‌هاند كو دماوێ چه‌ند هه‌فتيێن بۆرى دا پێلا ئاواره‌بوون و كۆچكرنێ يا گه‌نجان و خێزانێن ئێزدى ب چه‌ند ئالاڤان ده‌ستپێكريه‌،كو رۆژانه‌ بترى 100كه‌سێن ئێزدى ب رێيا توركيا به‌ره‌ڤ ئه‌وروپا ڤه‌ دچن.   

نڤيسينگه‌ها په‌رله‌مانتارا كوردا ئێزدى دراگه‌هاندنه‌كێ دا به‌لاڤكريه‌،كو ڤيان ده‌خيل هۆشدارييا مه‌ترسييا كۆچكرنا ئێزديان ژ ده‌ڤه‌رێن وان يێن ديرۆكى ل عيراقێ دايه‌،دياركريه‌ ژى كو ئه‌و پشته‌ڤانيا كه‌سى ناكه‌ن كو كۆچبكه‌تن يان ل دژى ئێكى ب سه‌كنن ده‌ما برياره‌كێ سه‌باره‌ت پاشه‌رۆژ و ژيانا خۆ دده‌ت. 

ده‌رباره‌ى ئه‌گه‌رێن  كۆچكرنا ئێزديان (ده‌خيل ) ئاشكه‌راكريه‌،داگيركرنا ده‌ڤه‌رێن ئێزديان ژلايێ رێكخراوا داعش يا تيرۆرستى و سه‌ره‌ده‌رييا وه‌حشيانه‌ دگه‌ل وان دا ژبال ڤان تيرۆرستان ڤه‌ بگره‌ ژ كوشتنێ و سبى و بازرگانيێ و گيرۆبوونا رزگاركرنا ده‌ڤه‌رێن شنگال و باشيكێ و كێميا گه‌هاندنا خزمه‌تكارييان بۆ ده‌ڤه‌رێن ئێزديان يێن هاتينه‌ ئازادكرن،هه‌روه‌سا خرابيا ره‌وشا ئاواره‌يێن ئێزدى ل كه‌مپێن كوردستانێ هه‌موو بووينه‌ ئه‌گه‌رێ هندێ ئێزدى كۆچ بكه‌ن. 

 ڤێ په‌رله‌مانتارا كوردا ئێزدى ئه‌و چه‌نده‌ ژى دياركريه‌ كو ئه‌و داخوازێ ژ لايه‌نێن شۆله‌ژێ دكه‌تن له‌زێ درزگاركرنا ده‌ڤه‌رێن ئێزديان دا بكه‌ن ئه‌وێن هێشتا دبن كۆنترۆلا داعش دا،هه‌ڤده‌م له‌ز بێته‌ كرن بۆ ئاڤاكرنا ژێرخانه‌يا ده‌ڤه‌رێن هاتينه‌ رزگاركرن.

 ڤيان ده‌خيل ئاماژه‌كريه‌ كو دڤى وه‌ختى دا  ژ وان وه‌لاتان دخوازين يێن ئێزدى كۆچ دكه‌نێ،هاريكاريێن مرۆڤايه‌تى پێشكێشى وان بكه‌ن.

هه‌ر دڤێ راگه‌هاندنێ دا،ده‌خيل داخواز ژ هه‌موو ئێزديان كريه‌ هه‌دارێ بكێشن و ده‌ست ژ ده‌ڤه‌ر و ئه‌ردێن باب و باپيرێن خۆ به‌رنه‌ده‌ن.