كۆمكرنا به‌لگه‌يان بۆ جينۆسايد ناساندنا ئێزديان يا گرنگه‌

ئێزديخان نيوز:خانكێ

 به‌رپرسێ رێكخراوا مافێ مرۆڤى ل هه‌ولێرێ راگه‌هاند،كو ئه‌م دێ به‌رده‌وام بين بۆ پێشكێشكرنا هاريكاريان بۆ ئاواره‌يان و كێماسى و ده‌نگێ وان ژى دێ گه‌هينه‌ نه‌ته‌وه‌يێن ئێكگرتى و گۆت:كۆمكرنا به‌لگه‌يان زۆر يا گرنكه‌ ژبۆ جينۆسايد ناساندنا ئێزديان.

 دچارچۆڤه‌يێ سه‌ره‌دانه‌كێ دا بۆ بنگه‌هێ لالش تايێ خانكێ،به‌رپرسێ رێكخراوا مافێ مرۆڤى ل هه‌ولێرێ (سيد افتخار على ) ل گه‌ل سه‌رۆكێ بنگه‌هێ ناڤبرى(عنتر كلۆ) و رێڤه‌به‌رێ كه‌مپا خانكێ(پير ده‌يان) ب درێژى به‌حسا چاوانيا هاتنا ئاواره‌يان بۆ كۆمه‌لگه‌هێ و چاوانيا گه‌هاندنا هاريكاريان ژلايێ ده‌سته‌يا رێڤه‌به‌ريا بنگه‌هى و چه‌ندين هه‌ڤالێن خۆبه‌خش بۆ نێزيكى 65هه‌زار كه‌سا كر،دته‌وه‌ره‌كى دى دا ژى  به‌حسا رۆلێ رێكخراوێن نێڤ ده‌وله‌تى ژى كرن،بۆ گه‌هاندنا هاريكاريان بۆ ئاواره‌يێن ل خانكێ دئاكنجى. 

ژلايه‌كى ديڤه‌ به‌رپرسێ رێكخراوا مافێ مرۆڤى ل هه‌ولێرێ ،رۆلێ بنگه‌هێ لالش تايێ خانكێ و لژنا خۆبه‌خش بلند نرخاند و گۆت: كو ئه‌م دێ به‌رده‌وام بين بۆ پێشكێشكرنا هاريكاريان بۆ ئاواره‌يان و كێماسى و ده‌نگێ وان ژى دێ گه‌هينه‌ نه‌ته‌وه‌يێن ئێكگرتى،ته‌كه‌ز ژى كر كو كۆمكرنا به‌لگه‌يان زۆر يا گرنكه‌،ژبۆ جينۆسايد ناساندنا ئێزديان،هه‌روه‌سا دێ هه‌موو شيانێن خۆ مه‌زێخين،ژبۆ هاريكاريكرنا وان كچێن ژ ده‌ستێن تيرۆرستێن داعش رزگار دبن.

سيد افتخار دووپات ل وێ چه‌ندێ ژى كر كو ئه‌و دێ به‌رده‌وام بت ل سه‌رڤان جۆره‌ سه‌ره‌دانا،ژبۆ بهێزكرنا په‌يوه‌ندييا دناڤبه‌را بنگه‌هێ لالش و رێكخراوا مافێ مرۆڤى ل هه‌ولێرێ.

ژبال خۆ ڤه‌ ژى به‌رپرسێ بنگه‌هێ لالش تايێ خانكێ(عنتر كلۆ) بۆ مالپه‌رێ ئێزديخان نيوز گۆت:ل 10ڤێ هه‌يڤێ،به‌رپرسێ رێكخراوا مافێ مرۆڤى ل هه‌ولێرێ سه‌ره‌دانا بنگه‌هى دابوو.