ئه‌نجومه‌نێ وه‌زيرێن هه‌رێمێ ل سه‌ر ڤه‌گۆهاستنا قوتابيێن ئێزدى رازى بوو
ئێزديخان نيوز:
جڤاتا وه‌زيرێن هه‌رێما كوردستانێ رازى بوونا خۆ ل سه‌ر ڤه‌گۆهاستنا 700قوتابيێن ئێزدى يێن قۆناغا ئێكێ يێن سالا بۆرى دا،لژنه‌يا ڤه‌گۆهاستنا قوتابيان ژى ل بنگه‌هێ لالش رادگه‌هينت،كو دماوێ داهاتى دا دێ قوتابيان ل سه‌ر زانكۆ و په‌يمانگه‌هێن هه‌رێمێ دابه‌ش كه‌ن.
رێكخه‌رێ لژنه‌يا ڤه‌گۆهاستنا قوتابيان ل بنگه‌هێ لالش(رعد تارق)ب ئێزديخان نيوز راگه‌هاند،پشتى (شێخ شامۆ) ئه‌ندامێ په‌رله‌مانێ كوردستانێ و سه‌رۆكێ ده‌سته‌يا بلندا بنگه‌هێ لالش ئه‌نجومه‌نێ وه‌زيران و سه‌رۆكاتيا ديوانا ئه‌نجومه‌نێ وه‌زيرێن هه‌رێمێ و شيره‌تكارا ئه‌نجومه‌نێ وه‌زيران بۆ كاروبارێن قوتابيان ل سه‌ر ڤى بابه‌تى ڤه‌كرين و پشتى دووڤچۆنه‌كا به‌رده‌وام بۆ ده‌مێ دوو هه‌فتيان،رازى بوونا ئه‌نجومه‌نى ل سه‌ر ڤه‌گۆهاستنا 700قوتابيێن ئێزدى يێن قۆناغا ئێكێ يێن سالا بۆرى هاته دان.
سه‌باره‌ت دابه‌شكرنا قوتابيان(رعد تارق) گۆت:سه‌ره‌راى وان رازيبوونێن شيخ شامۆ ب ده‌ست ڤه ئيناين،مه ديداره‌ك دگه‌ل شيره‌تكارا ئه‌نجومه‌نێ وه‌زيران بۆ كاروبارێن قوتابيان و رێڤه‌به‌را وه‌رگرتنا مه‌ركه‌زى و به‌رپرسێ دۆسه‌يا قوتابيێن ئێزدى ل وه‌زاره‌تێ ئه‌نجام دا،سه‌باره‌ت ئالياتا فه‌رز و دابه‌شكرنا قوتابيان ل سه‌ر زانكۆ و په‌يمانگه‌هێن هه‌رێمێ،ديسان ئه‌م ژى وه‌كو لژنه‌يا ڤه‌گۆهاستنا قوتابيان دێ ب رۆلێ خۆ رابين و ل ماوێ داهاتى ب هه‌ماهه‌نگى دگه‌ل وه‌زاره‌تێ و فه‌رمانگه‌ها وه‌رگرتنا مه‌ركه‌زى دێ كار ل سه‌ر دابه‌شكرنا وان كه‌ين و ئه‌ڤ ساله دێ ب ئاشئێخستى بت بۆوان و دێ وه‌رگرتنا وان ب شێوه‌يه‌كى راسته‌وخۆ بت ل سه‌ر سالا خوندنێ يا سالا (2015_2016).
رێكخه‌رێ لژنه‌يا ڤه‌گۆهاستنا قوتابيان دا زانين ژى كو ئه‌ڤ ليسته ژ نێزيكى 700قوتابيێن كچ و كور پێك دئێت.
