رێڤه‌به‌رييا گشتيا كاروبارێن ئێزديان ل وه‌زاره‌تا ئه‌وقاف و كاروبارێن ئۆلى،يا حكومه‌تا هه‌رێما كوردستانێ دبانگه‌وازييه‌كێ دا ژ خه‌لكێ شنگال و ره‌خ و دۆرێن وێ هايدار دكه‌ت،هايدارى گۆرێن ب كۆم بن،چنكو ل پاشه‌رۆژێ كار پێ هه‌يه بۆ هندێ بكه‌نه دكيۆمێنت.
دڤێ بانگه‌وازيێ دا كو وێنه‌يه‌ك بۆ ئێزديخان نيوز هاتيه شاندن،رێڤه‌به‌رييا گشتيا كاروبارێن ئێزديان رادگه‌هينت،بۆ پاراستنا گۆرێن ب كۆم ودكيۆمێنتكرنا وان دناڤا ئه‌رشيفێ وان دا و بۆ هندێ ل جڤاتا نيڤ ده‌وله‌تى وه‌ك به‌لگه بێته بكارئينان،ده‌ستكاريێ دوان گۆران دا نه‌كه‌ن،هه‌ڤده‌م ژى ژهێزێن پێشمه‌رگه‌ى و شه‌رڤانان خواستيه،وان گۆران بپارێزن و چ ده‌ستكارييه‌ك تێدا نه ئێته كرن و به‌روڤاژى بلا چاڤدێريا وان بكه‌ن.
هه‌ر دبانگه‌وازيێ دا هاتيه داخوازێ ل خه‌لكێ ده‌ڤه‌رێ دكه‌ين كو راببن ب وێنه‌كرنا وان گۆرين ب كۆمه‌ل و تاك بۆ هندێ بكارين مفاى ژ وان به‌لگه‌يان وه‌رگرين بۆ هندێ بێنه پێشكێشكرن بۆ دادگه‌هێن نێڤ ده‌وله‌تى بۆ دياركرنا تاوانێن داعشان دژى كوردێن ئێزدى.
رێڤه‌به‌رێ كاروبارێن ئێزديان ل پارێزگه‌ها دهۆكێ راگه‌هاند،هه‌ر ل گه‌ل ئازادكرنا شنگالێ ئه‌و دێ ده‌ست ب دكيۆمێنتكرنا وان گۆران كه‌ن و دێ بزاڤێن به‌رده‌وام كه‌ن ئه‌و كار بێته ئه‌رشيفكرن و ب هاريكاريا هه‌موو سازييان كار بێته كرن بۆ ب جينۆسايد ناساندنا شنگالێ.
پێشتر رێڤه‌به‌رێ گشتيێ كاروبارێن ئێزديان خێرى بۆزانى راگه‌هاندبوو،ژماره‌يه‌كا مه‌زن يا كچ و ژنێن ئێزدى دده‌ستێن تيرۆرستێن داعشێ دانه و ب سه‌دان زارۆ و ژن و زه‌لام ژى دده‌ستێن وان دانه و دووپاتكرييه،ناڤێن وان هه‌موويان هاتينه تۆماركرن.
بۆزانى ئاماژه دايه هندێ چه‌ندين خێزان تانهۆ دبێ سه‌روشوون و ژماره‌يا وان نه‌دياره و گۆمانا هندێ هه‌يه هه‌موو ب كۆمكوژى هاتبنه كوشتن و ل ره‌خ و دۆرێن وان مينا شنگال و كۆچۆ و وان ده‌ڤه‌ران هاتبنه ڤه‌شارتن.
دا زانين ژى ژبلى كۆچۆ،كو هه‌موو هاتينه كوشتن ب تبلێن ده‌ستان ره‌ڤياينه و خۆ خلاسكرينه،چه‌ندين گۆرێن دى يێن بكۆم ژ لايێ داعشێ ڤه بۆ ئێزديان هاتينه چێكرن و هه‌موو تێدا كوشتينه.
هه‌ر ئێك ژ په‌رله‌مانێ كوردستانێ ب هه‌ڤكارى دگه‌ل هه‌موو سازى و رێكخراوێن سڤيل و كاروبارێن ئێزديان نهۆ كار ل سه‌ر هندێ دكه‌ن،ئه‌و كاره‌ساته ب جينۆسايد بێنه ناساندن و ل په‌رله‌مانێ كوردستانێ ژى خواندنا ئێكێ بۆ را هاتيه كرن.
