ئێكه‌مين دادگه‌ها نێڤ ده‌وله‌تى بريار ل سه‌ر جينۆسايدا ئێزديان دايه
ئێكه‌مين دادگه‌ها نێڤ ده‌وله‌تى بريار ل سه‌ر جينۆسايدا ئێزديان دايه
نێزيكه 10ساڵ بسه‌ر جينۆسايدا ئێزديان ل سه‌ر ده‌ستێ داعشێ ده‌رباز ببن،تا نۆكه 12وه‌لاتان ل سه‌رتاسه‌رى جيهانێ دانپێدان ب ڤى كه‌يسى كريه و ئێكه‌مين دادگه‌هه‌كا فه‌رمى يا نێڤ ده‌وله‌تى برياردايه ڤه‌كۆلينێ ل سه‌ر تاوانێن داعشێ دژى ئێزديان بكه‌ت.
ل ڕۆژا 3ى ته‌باخا 2014ێ فەرمانه‌كا دى يا ڕەش بسەر ئێزدیاندا هات و کارەساته‌كا ديتر چوو ل ديرۆكا گەلێ کوردستانێ دا،كو چوو كه‌سان باوه‌ڕ نه‌د‌كر ل چه‌رخێ 21ێ دا تاوانێن بڤى ئاوايێ يێن دڕه‌ندانه دژى مرۆڤان بێنه ئه‌نجامدان،جينۆسايدا ڤێ جارێ زۆر ناخهەژێن بوو.
حه‌سو هورمى،ڕێڤه‌به‌رێ سازيا ئێزديان يا ناڤنه‌ته‌وه‌ى ژبۆ به‌رهنگاريكرنا جينۆسايدێ بۆ(ئێزديخان نيوز)دبێژت:هه‌لبه‌ت ئه‌م يێ به‌ره‌ف 10 ساڵيا جينۆسايدكرنا ئێزديان دچين ل سه‌ر ده‌ستێ ڕێكخراوا داعش يا تيرۆرستى ،ئه‌و كارێن هاتينه كرن ل سه‌ر ئاستێ ناڤده‌وله‌تى 12وه‌لاتان دانپێدان ب جينۆسايدا ئێزديان كريه و تشتێ گرنگ هاتيه كرن ئه‌و بوو ل ڕێككه‌فتى 3/11/ 2021دادگه‌هه‌ك ل ئه‌لمانيا هاتيه دامه‌زراندن بريار يا داى ل سه‌ر جينۆسايدێ و ئه‌ڤه ئێكه‌مين پێرابوونا دادوه‌رى بوو كو دادگه‌هه‌كا فه‌رمى يا ده‌ولى ڤه‌كۆلينێ ل سه‌ر تاوانێن داعشێ بكه‌ت.
ڕێڤه‌به‌رێ سازيا ئێزديان ئاشكه‌راكر:ب به‌رده‌وامى كار ل سه‌ر كه‌يسا جينۆسايدێ يێ دئێته كرن،وه‌ك سازيا ئێزديان يا ناڤنه‌توه‌يى ژبۆ به‌رهنگاريكرنا جينۆسايدێ مه كورسى و شێوه‌رمه‌ندى ل يوئين دا هه‌يه و ل هه‌موو ڕوونشتنان دا به‌رهه‌ڤ دبين و په‌يڤ و ڕاپۆرتان ل سه‌ر ڤى كه‌يسى پێشكێش دكه‌ين.
هورمى ئه‌و چه‌نده ژى ڕۆنكر،ئه‌م يێ به‌ره‌ف ساخكرنا 10 هه‌مين ساڵڤه‌گه‌ڕا جينۆسايدێ دچين و هێش دادمه‌نديا قوربانيان نه‌هاتيه كرن و ئاواره‌يێن شنگالێ نه‌هاتينه قه‌ره‌بووكرن و ڤه‌گه‌ڕاندن و خه‌مسارى ژلايێ حكومه‌تا عيراقێ ڤه هه‌يه.
ب دڕێژاهيا ديرۆكێ ئێزدى تووشى 74فه‌رمان و مه‌رگه‌ساتان بووينه،كو ئێك ژێ دره‌نده‌ترين هۆڤێن داعشێ بوون،دوێ تاوانێ دا خه‌لكێ شنگالێ ب تايبه‌ت ئێزدى هاتنه گرتن و سه‌بيكرن و ده‌ربه‌ده‌ركرن و ئاواره‌بوون،زێده‌بارى مال و حالێ وان هاتنه تالانكرن.
تعليقات