شەریف سلێمان: پێدڤییە عێراق دوو تریلیۆن دیناران بۆ ئاواران تەرخان بکەت

 شەریف سلێمان: پێدڤییە عێراق دوو تریلیۆن دیناران بۆ ئاواران تەرخان بکەت
ئێزديخان نيوز:

سەرۆکێ لیژنا کۆچ و کۆچبەران ل پەرلەمانێ عێراقی دیار کر، عێراق ٣٥٤ ملیار دینار بۆ وەزارەتا کۆچ و کۆچبەران تەرخان کرییە، ئەڤ پارە بۆ ئاواران گەلەک کێمە، ئەم ھەول دەن بھێتە زێدەکرن، چوو پارە بۆ زڤرینا ئاواران نەھاتییە دەستنیشانکرن و پێدڤییە دوو تریلیون دینار بۆ زڤرینا ئاواران بھێتە تەرخانکرن.

شەریڤ سلێمان، سەرۆکێ لیژنا کۆچ و کۆچبەران ل پەرلەمانێ عێراقی بۆ (باسنیوز) راگەھاند کوو: "بودجەیا عێراقی ٣٥٤ ملیار دینار ھاتییە تەرخانکرن، ئەڤ پارە بۆ وەزارەتا کۆچ و کۆچبەران ھاتییە تەرخانکرن نە بۆ زڤرینا ئاواران، بەرچاڤ نەبوویە بەرنامێ حکومەتێ بۆ زڤرینا ئاواران دێ چەوا بیت، دگەل وەزێرا کۆچ و کۆچبەران گەنگەشە ھاتییە کرن، ئەوژی چاڤەرینە دەست بەرنامێ زڤرینا ئاواران بکەن لێ پارە یێ کێمە، ھەتا نوکە پتر ژ ٤٥٠ ھزار خێزان یێن زڤرینە سەر مالێن خۆ ھیشتا ھەموو نەھاتینە قەرەبووکرن و ھیشتا مینحە زڤرینی نە وەرگرتینە ئەوژی گوژمێ ملیۆنەک و ٥٠٠ ھزار دینارن، پێدڤیە حکومەتا عێراقی مینحە زڤرینا ئاواران ب مەزیخت ".

ئاشکەرا کر کوو: "دەمێ حکومەتا عێراقی بەرنامێ خۆ بجە دئینت پێدڤیە بۆ ھەر خێزانەکێ گوژمەکێ پارە وەربگریت ھەتا بشێت ڤەگەریت ب تایبەتی ژی خەلکێ بن خێڤەتاندا ھەموو تشتێن خۆ سالە ٢٠١٤ێ ژ دەستداینە، پێدڤیە دەستپێکی رێکەفتنا شنگال بجە بھیت ئەڤە باشترین رێکا بۆ زڤرینا ئاواران ".

زێدەتر گۆت: "خەلکێ شنگال گەلەک خانیێن خەلکێ ئاخێ بوون نوکە نەماینە ژئەگەرێ بارینا بارانێ گەلەک خانیی خرابووینە خەلکێ جە نەمایە دەمێ ڤەگەرن بچن ناڤدا بژێن مە پیشنیاز کریە بۆ ھەر خێزانەکێ گوژمێ پێنچ ملیۆن دیناران بھێتە تەرخانکرن ھەتا خەلک بشێن خانیی خۆ چێ کەن، ژبلی مینحە ملیۆنەک و ٥٠٠ ھزار دیناران ".

سەرۆکێ  لیژنا کۆچ و کۆچبەران ل پەرلەمانێ عێراقی، تەکەز کر کوو: "پێدڤییە عێراق پتر ژ دوو تریلیۆن دیناران تەرخان بکەت بۆ ئاواران و قەرەبوویا خەلکێ زەرەرمەند نابیت، مانا ئاواران بن خێڤەتاندا یا بەردەوام بیت، ئەڤە نیزیکێ نەهـ سالانە خەلکێ ئاوارە پێدڤیە حکومەتا عێراقی بەرنامەکێ دروست دانیت بۆ زڤرینا ئاواران نوکە ٩٠% ئاوارێن ل دھۆکێ دژین ئێزدینە ".