مامۆستا سه‌مير خدر وه‌كو سه‌رۆكێ ئێكه‌تيا مامۆستایێن کورد ل ئه‌ورۆپا هاته هه‌لبژارتن
مامۆستا سه‌مير خدر وه‌كو سه‌رۆكێ ئێكه‌تيا مامۆستایێن کورد ل ئه‌ورۆپا هاته هه‌لبژارتن
ئێزديخان نيوز:
یه‌کیتیا مامۆستایێن کورد ل ئه‌ورۆپا ب ڕێیا پرۆگرامێ زۆمێ ۱۷. کۆنگره‌یا خوه ل دار خست.
ل ڕۆژا شه‌مبوویێ 15/01/2022 ب ئاماده‌بوونا پرانیا ئه‌ندامێن یه‌کیتیا مامۆستایێن کورد ل ئه‌ورۆپا (یەمەک) و چه‌ندین سازی و مێڤانان، یه‌کیتیا مامۆستایێن کورد ل ئه‌ورۆپا ب ڕێیا زۆمێ ۱۷. کۆنگره‌یا خوه ل دار خست.
د ده‌مژمێر ۱۷:۳۰ ڕوونشتنا کۆنگره‌یێ ب ئاخاڤتنا بەرێز ئه‌مین ئه‌کباش هاته ده‌ستپێکرن.
پاشی سه‌رۆکێ یەمەکێ بەرێز عەبدولقادر ئولوماسکان ئاخاڤتنا ڤه‌کرنا کۆنگره‌یێ پێشکێش کر.
مامۆستا ئولوماسکان، ب گه‌رمی ب خێرهاتنا هه‌موو به‌شداران کر و ب کورتی ل خه‌باتێن یەمەکێ و گرنگییا کارێ سازیێ ئانی زمان.
د دوو ڕه دیوانا کۆنگره‌یێ هاته هەلبژارتن:
۱. ئه‌مین ئه‌کباش (سه‌رۆک)
۲. مونه‌ڤه‌ر ئازۆگلو-بازان (پرۆتۆکۆلگەر)
۳. سەمیر خدر عەبدی (به‌رپرسێ ته‌کنیکێ)
پشتی پەسەندکرنا ڕۆژه‌ڤێ، په‌یامێن سازی و که‌سایه‌تیان هاتن خوه‌ندن و پێشکێشکرن. وه‌ک سازی په‌نا کورد، ئه‌نسیتویا کوردی یا ئالمانیایێ، ناڤه‌ندا ژ بۆ لێکۆلینێن کوردی، یه‌کیتیا مالباتێن ژ کوردستانێ یه‌کمال، کۆمه‌له‌یا هنده‌کاریا کوردی یا سویسرا و په‌یامێن هنده‌ک که‌سایه‌تیان هاتن پێشکێشکرن.
پشتی پێشکێشیا په‌یامان کورته ڤیدیۆیه‌ک کو د ده‌ربارێ چالاکیێن یه‌کیتیا مامۆستایێن کورد ل ئه‌ورۆپا یێن پێک هاتین ژ ئالیێ بەرێز سه‌میر خدر ڤه هاته نماییشکرن.
پاشی ڕاپۆرتا خه‌باتێ یا کۆمیته‌یا ڕێڤه‌به‌ر ژ ئالیێ بەرێز عەبدولقادر ئولماسکان ڤه هاته خوه‌ندن.
د ڕاپۆرتێ ده ب درێژی به‌حسێ کار و چالاکیێن د سێ سالێن ده‌رباسبوویی ده هاته کرن. سه‌ره‌رایی پاندێمیا کۆرۆنایێ ڕێڤه‌به‌ریا یەمەکێ کاریه چه‌ندین خه‌باتێن هێژا ئه‌نجام بدەت. ژ هه‌موویان گرنگتر سازیا مه ۷ پەرتۆک ژ بۆ ده‌رسێن زمانێ کوردی ئاماده کرنه ژ وان ژی ٤ پەرتۆک هاتنه چاپکرن. کارێ ڕه‌ده‌کسیۆنا ۳ پەرتۆکان ژ ئالیێ کۆمسیۆنێ ڤه بدوماهیک هاتییە و ئه‌ڤ هه‌ر سێ پەرتۆک ژ بۆ چاپێ دئاماده‌نه. هه‌ر وه‌ها هه‌ول و خه‌باتێن مه یێن به‌رده‌وام ژ بۆ ڤه‌کرنا به‌شێ زمانێ کوردی ل زانکۆیەکا ئەلمانی. و ڤه‌کرنا کۆرسێن په‌روه‌رده‌یی ژ بۆ مامۆستایان و کۆرس و ده‌رس ژ بۆ زارۆکان.
پشتی پێشکێشکرنا ڕاپۆرتا خه‌باتێ، ڕاپۆرتا دارایی ژ ئالیێ ژمێریار بەرێز یوسوف بلگج ڤه هاته پێشکێشکرن. پشتی هەلسەنگاندن و گه‌نگه‌شه‌یان هه‌ردوو ڕاپۆرت، ب ته‌ڤایا ده‌نگێن ئه‌ندامێن کۆنگره‌یێ هاتن پەسەندکرن.
ژ به‌ر که‌د و خه‌باتا هه‌ردو بەرێزان د. زه‌رده‌شت حاجۆ و مامۆستا فەوزی د ناڤ یەمەکێ ده، پشته‌ڤانیا به‌رده‌وام و خزمه‌تا وان یا زمانێ کوردی، به‌شدارێن کۆنگره‌یێ پێشنیارا ژ بۆ ئه‌ندامەتیا ڕوومه‌تێ یا هه‌ردو ڕێزداران ب یه‌کده‌نگی پەسەندکرن.
به‌رده‌وامی دان ب خالێن ڕۆژه‌ڤێ یێن دی وه‌ک داخوازی و پێشنیار و بریار هاتن گه‌نگه‌شه کرن. ب یه‌کده‌نگیا به‌شداران، ئه‌ڤ کۆنگره‌یا یەمەکێ ژ بۆ مامۆستا زارا مەحەمەدی ل ڕۆژهەلاتێ کوردستانێ ژ به‌ر کو ده‌رسێن زمانێ کوردی ددان، هاتبوو سزادان و د هه‌فته‌یا بۆری ده که‌تبوو زێندانێ. ژ بۆ پشتگریا وێ کۆنگره‌یێ بریاردا کو دێ هاریکاری و پشتگری لێ هێتە کرن.
دیسا د کۆنگره‌یێ ده بریارا پشتگریا کەمپانییا ژ بۆ زمانێ کوردی هاته کرن.
پاشی ب ئاوه‌یێ ئۆنلاین هەلبژارتنا کۆمیته‌یا ڕێڤه‌به‌ریا نوو هات چێکرن. ل گۆری ئه‌نجامێن هەلبژارتنێ ئه‌ندامێن کۆمیته‌یا ڕێڤه‌به‌ر وه‌ها نه:
۱. سەمیر خدر عەبدی (سه‌رۆک)
۲. عەلیشێر سایان (جیگرێ یه‌که‌م)
۳. ئیلیاس ئەسه‌ن (جیگرێ دویه‌م)
٤. مەحمود ئایدن (سکرتێر)
٥. یوسف بلگج (کاسه‌دار)
٦. نالین هاجکا (ئه‌ندام)
۷. حەیدەر دەنیز (ئه‌ندام)
۸. نه‌سرین میرۆ (ئه‌ندام) نەسرین حەمۆ (هاریکار)
۹. یوجه‌ل ده‌مرتاش (ئه‌ندام)
۱۰. عەبدولقادر ئولوماسکان (ئه‌ندامێ یەدەک)
۱۱. هه‌سه‌ن هوسه‌یین ده‌نیز (ئه‌ندامێ یەدەک)
د کۆنگره‌یێ ده بریار هاتە دان کو بەرێز مونه‌ڤه‌ر ئازۆگلو-بازان نوونه‌راتیا یەمەکێ یا بێمه‌نێ بکه‌ت.
پێشنیارێن پلانسازیا ده‌ما بێ ژ بۆ ڕێڤه‌به‌ریا نوو ژ ئالیێ مامۆستا عەبدولقادر ڤه هاتن خوه‌ندن و ئه‌ڤ پێشنیار هاتن پەسەندکرن.
ل سه‌ر ناڤێ ئه‌ندامێن ڕوومه‌تێ، بەرێز فەوزی ب ناڤێ خوه و یێ بەرێز د. زه‌رده‌شت حاجۆ، ئاخافتنه‌ک کر. ژ به‌شدارێن کۆنگره‌یێ ڕه سوپاسیا خوه یا ژ بۆ ئه‌ندامه‌تیا ڕوومه‌تێ ئانی زمان و ژ ڕێڤه‌به‌ریا نوو ڕه سه‌رکه‌فتن خوه‌ست.
د داویێ ده سه‌رۆکێ یەمەکێ یێ نوو بەرێز سه‌میر خدر عەندی ئاخافتنا کۆنگره‌یێ یا دوماهیێ پێشکێشکر. بەرێز سه‌میری د په‌یڤا خوه ده سوپاسییا هه‌موو ئاماده‌بوویی و دیوانا کۆنگره‌یی کر و ڕۆلا وان به‌رز نرخاند. هه‌روه‌ها سوپاسییا ئه‌ندام و مێڤانان، یا کۆمیته‌یا ڕێڤه‌به‌ریا که‌ڤن کر و سوپاسیێن خوه ژ بۆ که‌د و خه‌باتا وان یا مه‌زن و ب تایبه‌تی ڕۆلا سه‌رۆکێ به‌رێ بەرێز عەبدولقادر ئولوماسکان یا گرنگ ئانی زمان.
تعليقات