ئێزدى خۆپيشاندانه‌كا مه‌زن دێ ئه‌نجام ده‌ن
ئێزدى خۆپيشاندانه‌كا مه‌زن دێ ئه‌نجام ده‌ن
وەکیلی میری ئێزدیان بۆ کاروباری پەیوەندییەکان ئاشکرای کرد، هەڵمەتێکی فراوان لەناو ئیزدییاندا دەستی پێکردووە کە فشار بخرێتە سەر حکوومەتی عێراق و نەتەوە یەکگرتووەکان و هەموو ڕێکخراوە مرۆییەکان تاکوو چارەنووسی ئێزدییە ڕفێندراوەکان یەکلا بکرێتەوە.
میر جەهوەر عەلی بەگ، وەکیلی میری ئێزدیان بۆ کاروباری پەیوەندییەکان بە (باسنیوز)ی ڕاگەیاند: "کوردانی ئێزدی کار بۆ ئەوە دەکەن لەم نزیکانە لە گۆڕەپانی فیردەوسی بەغدا خۆپیشاندانێکی زۆر مەزن ڕێک بخەن و تێیدا داوای ڕزگارکردنی ئێزدییە ڕفێندراوەکان لە حکوومەتی عێراق و ڕێکخراوی نەتەوە یەکگرتووەکان و هەموو ڕێکخراوەکانی تایبەت بە مافی مرۆڤ بکەن".
ئاماژەی بەوەش کرد: "لەو خۆپیساندانەدا هاوکات داوا لە حکوومەتی عێراقی دەکەن کە لەباتی گەڕاندنەوەی خێزانی چەکدارانی داعش با ڕفێندراوە ئێزدییەکان ڕزگار بکات کە تاکوو ئێستاش٥٠٠ ڕفێندراوی کوردی ئێزدی پێکهاتوو لە ژن و منداڵ لەناو کەمپی "هول"دا ماون و هێشتا دیار نییە بۆچی ڕزگاریان ناکەن".
وەکیلی میری ئێزدیان ڕاشی گەیاند: "ئێستا بۆ ئەم مەبەستە لەناو کوردانی ئێزدی دەست کراوە بە چالاکی تاکوو بە جیدی لەو خۆپیشاندانەدا داوای ڕزگارکردن و دۆزرانەوە ئەو ئێزدییانە بکرێت کە تاکوو ئێستا چارەنووسیان ناڕوونە و فشار بخرێتە سەر حکوومەتی عێراق".
خەیری بۆزانی، سەرپەرشتی دۆسیەی ڕزگارکردنی ڕفێندراوانی ئێزدی و بەڕێوەبەری گشتیی کاروباری ئێزدیان لە وەزارەتی ئەوقاف و کاروباری ئایینیی حکوومەتی هەرێمی کوردستان بە (باسنیوز)ی ڕاگەیاند: "لە هێرش و پەلاماری داعش و جینۆسایدی شنگالدا لە ساڵی ٢٠١٤، سەرجەم شەش هەزار و ٤١٧ کوردی ئێزدی لە سنووری شنگال لەلایەن چەکدارانی داعشەوە ڕفێندران و پاشان لە لایەن حکوومەتی هەرێمی کوردستانەوە نووسینگەیەک بۆ ڕزگارکردنی ڕفێندراوانی ئێزدی دامەزرا و هەتا ئێستا سێ هەزار و ٥٤٥ کەس لە هەردوو ڕەگەزی نێر و مێ ئازاد کراون، بەڵام هێشتا چارەنووسی دوو هەزار و ٧٦٨ کەس لە ڕفێندراوە ئیزدییەکان دیار نییە".
تعليقات