سۆزدار ره‌شيد: یا ۷٥ێ بدەستێ ئێزدیانە
یا ۷٥ێ بدەستێ ئێزدیانە
ئێزدیاتی ئایینەكێ كەڤنێ كوردستانێ یە ئەگەر پرانیا كوردستانیا ئێزدی نەبن ژی كەڤنترین ئایینە ل كوردستانێ ،بدرێژیا دیروكێ ئەف ئایینە راستی چەندین كومكومكوژیا هاتیە هەتا بویە كەمینەیەكا ئایینی د وەلاتێ خو دا ،ئەو فرمانێن د دیروكێ دا هاتینە توماركرن هژمارا وان دبنە ( ۷٤ ) فرمان هەتا كو ئێزدی بوینە هژمارەكا گەلەكا كێم ژی هێشتا چاڤێن نەحەز و نەیاران ژێ ڤەنەبویە و بەردەوام یێ دهەولا نەهێلانا وان دا ، ڤێ چەندێ ژی دوو ئەگەرێن سەرەكی یێن هەین یا ئێكێ كو ئەم ئایینەكێ سەربەخوینە نە كەسێ دناف خو دا دحەبینین و نە دهێلین كەس ژ ناف مە دەركەڤت و ئەگەر هات و كەسەكێ ئێزدی ئێزدیاتیا خو هێلا بێ كو چ زوری لێ بهێتە كرن ئەو كەس نەما ڤەگەرێتە سەر ئایینێ ئێزدیان بەلێ ئەگەر بزوری ژ ئێزدیاتیێ هاتبتە دووركرن دەریێ لالشا نورانی بورا یی ڤەكریە دا جارەكەدی بێتە موركرن ، ئەف چەندە بخو هندێ دگەهینت كو ئێزدیاتی نە ئایینەكی فراوانخوازی و شەرانگیزە ،ئەگەرێ دووێ و هەری بهێز ئەوە كو ئێزدی كوردێن رەسەنن و هەر ئێزدی بوینە چاند و كلتور و زمانێ كوردی پاراستی ، لەورا هەردەم ئێزدیاتی یا د مەترسیا قركرنێ و ژناڤبرنێ دا بو ڤێ مەرەمێ ژی دوژمنێن ئێزدیاتێ و كوردایەتیێ بەردەوام یێ د هەولا قركرنا ئێزدیان دا و دوركرنا ئێزدیان ژ نەتەوا وان یا كوردی ، و ئەف هەولە یا نوی نینە بەلكو لسەر دەمێ رژێما سەدامێ گور بگور ژی ئەف هەولە هەبوینە و د بەردەوام بوینە هەتا پشتی كەفتنا رژێما بەعس و وەرگرتنا دەسەلاتێ ژلایێ شیعان ڤە بەلێ ئەو هەولە هەتا وی رادەی نە د مەترسیدار بون بەس روژ بو روژێ ئەف هەولە یێ مەترسیدارتر دبن ب دیاربونا هندەك سەر و چاڤێن بەری نوكە و نها ژی د جڤاكێ ئێزدیا دا نە د مەرغوبن بتنێ بو فتنە و دووبەرەكیێ بەردەوام دخەبتن داكو بگەهنە وێ مەرەمێ یاكو سەدام نەگەهشتیێ بهاندانا هندەك كەسانێن شیعی یێن نە بەرپرس و پڤدانا بن چەنگێن وان بهندەك خوشخوشك و دەستكەفتێن تاكەكەسی ،دبت پسیار بهێتە كرن بوچی ئەو هەولە دكەڤن دا سەر نەگرتیە نها زەنگا مەترسیێ بورا تێتە لێدان د بەرسڤێ دا دبێژین ئێزدی دابەشی چەندین بەرەیان بوینە ژ وان بەرەیان ژی بەرەیێ كورد و كوردستانی كو یا راست و دروست ئەوە و دهەمان دەم دا حەشدا شیعی یا بناڤێن جوراوجور حەشدا ئێزدی یا دامەزراندی و ل وێ چەندێ نە راوهستیاینە بەلكو یێ رێ بخو خوش دكەن كو ئێزدیا ب شیعاتیێ ڤە گرێدە برێكا پرچەككرنا هژمارەكە زێدەتر یا ئێزدیان ل شنگالێ و لڤێ ژی نە راوەستیاینە بەلكو هەولا دانانا مەزارێ ئێمام حسێنی ددەن لشنگالێ ، دانانا مەزارەكی ئاریشە نینە بەلكو راكرنا وی مەزنترین ئاریشە یە ، ئەڤە ژبلی هێزێن نە عراقی یێن وەكی پەكەكێ كو وان ژی هژمارەكا ئێزدیان پرچەك كرینە و حكومەتێن خوجهی بناڤێ كانتونا داناینە ژ بو ئالوزیا دەڤەرێ و مەزنتركرنا ئاریشێ ،بو چارەسەریا ڤێ كێشەیا هێدی هێدی مەزن دبت مە پێتڤی ب هەولێن سەركردایەتیا كوردستانێ و هیمەتا جەنابێ رێبەرێ كوردستانێ ( مەسعود بارزانی ) هەیە داشنگالێ كو ئاخا كوردستانێ یە و ئێزدیان كو كوردێن رەسەنن بپارێزت ئەگەر نە دێ جینوسایدا ۷٥ ێ یا ئێزدیان هەر دێ بدەستێ ئێزدیا بت.
تعليقات