سبه‌ى ئاڤاكرنا گوندێ نوو یێ کۆچۆ دێ ئێتە راگەھاندن
سبه‌ى ئاڤاكرنا گوندێ نوو یێ کۆچۆ دێ ئێتە راگەھاندن
گوندەکێ نوی ب ناڤێ کۆچۆ بۆ خەلکێ ئاوارە یێ وی گوندى دێ هێتە ئاڤاکرن و گوندێ کەڤن ژی دێ وەک شوینوار مینیت.
سەلاح حەسەن، نوینەرێ نادیا مورادێ ل شنگالێ تایبەت بۆ گاڤ نیوز راگەھاند؛ ب دەستپێشخەريا ناديا موراد و ب هەڤکاريا رێکخراوا IOM و ب پشتەڤانی و پارەپێدانا ئاژانسا USAID یا ئەمريكی سوباهی ئاڤاكرنا گوندێ نوی یێ کۆچۆ دێ ھێتە راگەھاندن ب ناڤێ كۆچۆ یێ نوی.
هەروەسا راگەهاند؛ گوندێ نوی ژ ژمارەکا خانیان ل گەل خزمەتگوزاريێن پێدڤی یێن لادانا مینان، قوتابخانه، نەخۆشخانه، یاریگەھ و جادە پێک دهێت و ئەڤ پرۆژە دێ د دو سالان دا ب دوماهی هێت و ل دەمەکێ نێزیک دێ دەست ب ئاڤاکرنێ ھێتە کرن .
ل گۆرەی زانیاریان، هێشتا ئێک خێزان ژی نەڤەگەريايه گوندێ كۆچۆ یێ کەڤن، پتریا وان ل کەمپا قادیا ل سنوورێ پارێزگەها دھۆکێ دژین .
سەلاحى زێدەتر ژی گۆت: گوندێ کەڤن ناهێتە ئاڤاکرن و دێ وەک شوینوار مینیت و یێ نوی دێ ب دووراتیا 4 كيلومتران ل باكوورێ گوندێ كۆچۆ يێ كەڤن هێتە ئاڤاکرن.
گوندێ کۆچۆ یێ کەڤن ب 32 كم دکەڤیته باشوورێ چیایێ شنگالێ و ل 15/8/2014ێ داعشێ هێرشى گوندى كر و کۆمکوژیێن مه‌زن كرن.
تعليقات