بێریڤان سه‌ليم:قەدەرا ئێزدیان لگه‌ل عێراقێ ب تنێ كاره‌سات و ده‌ربه‌ده‌رى بوویە
بێریڤان سه‌ليم:قەدەرا ئێزدیان لگه‌ل عێراقێ ب تنێ كاره‌سات و ده‌ربه‌ده‌رى بوویە
باسنيوز:
جێگرا سه‌رۆكێ ئه‌نجوومه‌نێ پارێزگه‌ها دهۆكێ راگه‌هاند، چاره‌نڤیسێ ئێزدیان ل گه‌ل عیراقێ ب تنێ كاره‌سات و ده‌ربه‌ده‌رى بووینه و 74 فه‌رمانێن ب سه‌ر ئێزدیان دا هاتین به‌رهه‌مێ په‌یوه‌ندیا ئێزدیانه ل گه‌ل عیراقێ و په‌كه‌كه ژى ئه‌گه‌رێ دى یه هه‌تا نوكه كچ و ژنێن ئێزدى ئه‌وێن هاتینه ره‌ڤاندن نه‌هاتینه رزگاركرن.
بێریڤان سه‌لیم شه‌مۆ، جێگرا سه‌رۆكێ ئه‌نجوومه‌نێ پارێزگه‌ها دهۆكێ بۆ (باسنیوز) دیار كر، چه‌ندین ساله هژماره‌كا زۆر یا ئێزدیان ژلایێ ئیداره‌یى ڤه سه‌ر ب حكوومه‌تا عیراقا فیدرال ڤه‌نه و ئه‌ڤ كاره‌سات و فه‌رمان و ده‌ربه‌ده‌ریێن ب سه‌رێ كوردێن ئێزدى ژى هاتینه به‌رهه‌مێ وێ په‌یوندیا ئێزدیانه ل گه‌ل عیراقێ و گۆت: زێده‌بارى هندێ كو زێده‌ترى 300 هزار كوردێن ئێزدى ل سالا 2014 ده‌ربه‌ده‌ربوون، لێ عیراقێ پشتا خوه دا وان و هه‌رێما كوردستانێ ئه‌و حه‌واندن و هه‌تا نوكه هه‌ر هه‌رێما كوردستانێ چاڤێ خوه دده‌ته وان و عیراق چو بۆ وان ناكه‌ت و بۆ وان خه‌م ژى نینه.
ل گۆره‌ى زانیاریێن ئه‌ڤرۆ رۆژا ئێكشه‌مبى 31/1/2021 (باسنیوز) ژ نڤیسینگه‌ها رزگابوویێن كچ و ژنێن ئێزدى ل پارێزگه‌ها دهۆكێ وه‌رگرتین، هه‌تا نوكه هێشتا (3543) كچ و ژنێن ئێزدى د ده‌ستێ داعشێ دا ماینه و نه‌هاتینه رزگاركرن.
بێریڤان شه‌مۆ زێده‌تر گۆت: پتریا وان كچ و ژنێن هه‌تا نوكه نه‌هاتینه رزگاركرن ل ده‌ڤه‌رێن بن كۆنترۆلا داعش و حه‌شدا شه‌عبى و په‌كه‌كێ دانه و هه‌روه‌سا ل كه‌مپا هۆلێ و سۆریایێ نه و ل گه‌له‌ك جهان ژى په‌كه‌كه بوویه رێگر كچ و ژنێن رزگاربووى نه‌شێن ب ڤه‌گه‌رنه ناڤ مال و خێزانا خوه.
تعليقات