بنگەهێ لالش د ٢٧ سالیا دامه‌زراندنا خۆ‌دا: ئه‌م ئێزدیاتیێ و كوردایه‌تیێ پێكرە موكم دكەین
بنگەهێ لالش د٢٧سالیا دامه‌زراندنا خۆ‌دا:ئه‌م ئێزدیاتیێ و كوردایه‌تیێ پێكرە موكم دكەین
_ئەزمونێن بۆری بۆ مە ئاشكرا كر كو رێبازا بارزانیێ نه‌مر كۆكا ئه‌مانه‌تێ یه بۆ گه‌لێ كوردستانێ و مه ئه‌ڤ رێبازه گرتیه
بیره‌وه‌ریا 27ێ یا دامه‌زراندنا بنگه‌هێ مه یێ ره‌وشه‌نبیری و كۆمه‌لایه‌تی ده‌رباز دبه، ئه‌م دره‌وشه‌كا ناله‌بار دا ده‌رباز دبن جودا ژ سالێن هێرشا هۆڤێن داعشێ و رۆژا ره‌ش بۆ سه‌ر ده‌ڤه‌رێن ئێزدیان ب جوداهیێن مه‌زن ب هه‌ر ئاوایه‌كی دناڤبه‌را رۆژانێن داعش یێن وێران و دناڤبه‌را په‌تایا كۆرۆنایێ و كاریگه‌ریێن وێ و گڤاشتنێن ئابووری یێن زۆر لسه‌ر هه‌رێما كوردستانێ دا،دهه‌مان ده‌م دا هێشتا ب هه‌زاران ژ خه‌لكێ مه دناڤ كه‌مپێن ئاواره‌بوونێ دا ل هه‌رێما كوردستانێ و ب تایبه‌ت ل پارێزگه‌ها دهۆكێ ژیانەكا زەحمەت دبۆرینن ،كو چه‌ندین هۆكار هه‌نه رێگرن لبه‌رده‌م ڤه‌گه‌را وان بۆ سه‌ر جی و وارێن وان ل شنگالا بریندار و وێران بووی.
ئه‌م دووپات دكه‌ین و ل هه‌لكه‌فتێن بۆری ب رۆنی مه گۆتیه كو دامه‌زراندنا بنگه‌هێ لالش پێتڤیەكا دیرۆكی یە بۆ كوردێن ئێزدی،خەبات وان یا سالێن بۆری ئه‌ڤ چه‌نده سه‌لماند كو ڤی بنگه‌هی ب شێوه‌كی كارا كار كریه وكەلتۆر و كەڤناریا ئێزدیان پاراستیە،هه‌روەسا رۆله‌كێ به‌رچاڤ هه‌بوویه بۆ دانه‌نیاسینا راستیا ئایینێ ئێزدیان بۆ جیهانێ وده‌وروبه‌ران ، پشتی كو ئالیێن به‌رنیاس بزاڤ كرین ب شێوه‌كی شاش و نه راست سیمایێ ڤی ئایینی بده‌نه دیاركرن كو بۆ جیهانێ سه‌لماندیه كه‌سێن ئاشتیخوازن و دڤێن ب ئاشتیانه بژین و نابنه جیێ مه‌ترسیێ بۆ كه‌سی ، سه‌رەرای هندێ باب و باپیرێن مه د درێژاهیا دیرۆكێ دا تووشی فەرمانێن رەش وهه‌وێن قركرنێ بووینه، و داوی هه‌وا كۆمكوژیا بكۆم لسه‌ر ده‌ستێ چه‌كدارێن بناڤێ رێكخراوا ده‌وله‌تا ئیسلامی یا تیرۆری (داعش) بوو كو هه‌موو جیهانێ تاوان و دره‌نداتیا وان ب چاڤێ خۆ دیت نه‌ك ته‌نها دژی ئێزدیان به‌لكو دژی هه‌ر ئێكی دژی هزرێن وان یێن گه‌نی بن،كو ئه‌وا بسه‌رێ ئێزدیان دا هاتی ب شێوه‌كی هه‌ره دروندانه بوو.
بنگه‌هێ لالش ب تایی و نڤیسینگه‌هـ و جه‌ماوه‌ر و هه‌ڤال و دۆستێن خۆڤه كێمتر خه‌م نه‌بووینه دكه‌د و خه‌بات و خزمه‌ت و ئارمانجێن بۆرە هاتینە دانان لژێر دروشمێ (لالش كانیەكا زەلالە دهورتە درووبارێ رەوشەنبیریا كوردی دا)،هه‌ر ل رۆژا دامه‌زراندنێ و هه‌تا ئیرۆ درێغی نەكریە دكار خەباتا خۆ یا ئێزدیاتیێ و كوردایه‌تیێ دە و لسه‌ر رێبازا قوتابخانا بازانیێ نه‌مر د به‌رده‌وامین ، چنكو رێبازا وی كۆكا ئه‌مانه‌تێ یه بۆ گه‌لێ كوردستانێ، و ئەزمونێن ده‌مێ بۆری دا دیتنا بارزانیێ نه‌مر بۆ بوویه‌ران سه‌لماندیه، و ئه‌م لسه‌ر هه‌مان رێبازێ دێ دبه‌رده‌وام بین ژبۆ كوردستانه‌كا ئازاد وپێكڤە ژیانەكا موكوم دا گه‌لێ كوردستانێ ب سه‌رفه‌رازی و ئارامی بژیت.
ل هه‌ر هه‌لكه‌فته‌كێ ئه‌م داخوازا پێكۆلێن زێده‌تردكه‌ین بۆ ئاشكه‌راكرنا چاره‌نڤیسێ دۆرێن سێ هه‌زار گرتیێن ئێزدی ل ده‌مێ هێرشا رێكخراوا داعش یا تیرۆرستی ل ته‌باخا 2014ێ بۆ سه‌ر شنگالێ كه‌فتنه د ده‌ستێ تیرۆرستان دا و داخواز دكن كه‌سو كارێن گرتیان بێنه قه‌ره‌بووكرن و مووچه‌ك بۆ بێته ته‌رخانكرن و زێده‌تر گرنگیێ ب خێزانێن رزگاربوویێن ژ ده‌ستێ داعشێ بده‌ن ، وه‌ك جڤاكێ ئێزدی پێشوازی ل هه‌موو رزگاربوویان كر لدوڤ نه‌ریتێ ئێزدیاتیێ و دلێ خۆ بۆ وان ڤه‌كرن و هەر زوو تێكەلی جڤاكی بوون، به‌لێ هیڤیخوازن جڤاكێ نێڤ ده‌وله‌تی پشته‌ڤانیا كه‌سوكارێن رزگاربوویان بكەت وهەڤكاربن بۆ زانینا مەصیرێ بێ سه‌ر و شوونان ژ خه‌لكێ شنگالا وێرانبووی.
سلاڤ بۆ هه‌ر كه‌سه‌كێ پەیڤەك ژی د ده‌رهه‌قێ بنگه‌هێ لالش دا نڤیسایی و رۆناهیه‌ك دایه كار و خه‌باتا وی ل 27سالێن بۆری دا، و سلاڤ بۆ هه‌ر ئێكی هه‌ڤكار بووی بۆ به‌لاڤكرنا ئاشتیێ نه‌ك ته‌نها ل ده‌ڤه‌رێن ئێزدیا یێن كو تایی و نڤیسینگه‌هێن لالش لێ هه‌ین، به‌لكو ل هه‌موو جڤاكێن ئه‌م دناڤ دا و دگه‌ل دا دژین.
بڤێ هه‌لكه‌فتا پیرۆز لبه‌ر دلێ مه، و بناڤێ هه‌موو كادر وكارمه‌ندێن بنگه‌هێ لالش و تایی و نڤیسینگه‌هێن خۆڤه،سوپاسی و پێزانینێن خۆ ئاراسته‌ی سه‌ركردایه‌تیا هه‌رێما كوردستانێ دكه‌ین بۆ پشته‌ڤانیا بەردەوام بۆ بنگه‌هێ مه،و دووپات دكه‌ین ئه‌گه‌ر ئه‌ڤ پشته‌ڤانی نه‌با بنگه‌هێ مه نه‌دگه‌هشته ئه‌وا ئیرۆ رۆژ گه‌هشتیێ، و بنگه‌هێ مه ل هه‌موو ئاستان پشته‌ڤانیا بزاڤا ره‌وشه‌نبیریا كوردی دكه‌ت، و دێ پرێن پێكڤه‌ژیان و ئاشتی و برا‌تیێ ئاڤا كن ژبۆ كوردستانەكا ئازاد وسەربەخۆ ئەوا خەونا مە هەمووانە
سالا وه خێر و خۆشی به..
ده‌سته‌یا بلندا بنگه‌هێ لالش یێ ره‌وشه‌نبیری و كۆمه‌لایه‌تی/دهۆك
11/5/2020
تعليقات