گوندێ كۆچۆ دێ بتە ناحیە
باسنيوز:
سەرۆكێ جڤاتا پارێزگەها مووسل دیاركركو ل سەر داخوازیا خەلكێ گوندێ كۆچۆ، یێ سالا 2014ێ لسەر دەستێن تیرۆرستێن داعش هاتیە وێرانكرن و تووشی مەزنترین كارەساتا مرۆڤی بووی،دبیتە ناحیە.
سەیدۆ چەتۆ، سەرۆكێ جڤاتا پارێزگەها مووسل بۆ (باسنیوز) دیار كر: "كار لسەر ناحیەبوونا گوندێ كۆچۆ دەستپێكریە دێ هەموو هەولدان هێنە كرن دووڤ وێ كارەساتا بسەرێ خەلكێ گوندی هاتی، بریارەك بهێتە دان ببیتە ناحیە. رەنگە ژی بریارەكا تایبەت بۆ ڤی گوندی بهێتە دان هەتا بیتە ناحیە. نۆكە خەلكێ گوندێ كۆچۆ بتایبەتی ژی موختارێ گوندی زۆر هەولدانان دكەت وداخواز كریە گوندێ وان ببیتە ناحیە."
خویا ژی كر: "داخوازیا خەلكێ لێقەومایێ گوندێ كۆچۆ بۆ ناحیەبوونا گوندی گەهشتیە پارێزگارێ مووسل. ئەم ژی وەكو جڤات پشتەڤانن بۆ ئەنجامدانا هەر تشتەكێ ل گوندێ كۆچۆ چونكو ئەڤ گوندا تووشی مەزنترین كارەسات بوویە سالا 2014ی".
هەتا 1750 كەسان دناڤ گوندێ كۆچۆ دا ژیان ل كارەساتا گوندێ كۆچۆ دا تیرۆرستێن داعش هەتا 1250 كەس دەستەسەركرن ، پتریا زەلامان هاتنە گولەبارانكرن دناڤ 17 گۆرێن بكۆمدا. هەتا نۆكە 16 گۆرێن بكۆم ل كۆچۆ یێن هاتینە ڤەكرن و روفاتێن 235 كەسان یێن ژناڤ وان گۆرێن بكۆم هاتینە دەرئێخستن.
تعليقات