دەست ب قۆناغا پێنجێ یا نووژەنکرنا په‌رستگه‌ها لالش ھاتە کرن
ئەڤرۆ نیوز:
سەرپەرشتێ خزمەتکاری ل پەرستگەھا لالش بۆ ئەڤرۆ نیوز دیار کر، د دەمێ ھاتنا رێکخراوا تیرۆرستیا داعش بۆ سنوورێن ھەرێَما کوردستانێ، کارێ نووژەنکرنا پەرستگەھا لالش ھاتبوو راوەستاندن و دبێژیت: نوکە کارەکێ باش د پەرستگەھێ دا ھاتیە کرن و کار یێ ل سەر قووناغا پێنجێ دھێتە کرن.
بابە چاویش، سەرپەرشتێ خزمەتکاری ل پەرستگەھا لالش خویا کر، ماستەرپلانا پەرستگەھا لالش ژ لایێ کۆمپانیەکا ئەلمانی ڤە ھاتبوو دانان کو حوکمەتا ھەرێکا کوردستانێ پەرستگەھێ ل دووڤ وێ ماستەرپلانێ و ب کوژمێ ١٧ ملیۆن دۆلاران نووژەن بکەت، لێ دەمێ رێکخراوا تیرۆرستی یا داعش ل سالا ٢٠١٤ ھێرشکریە سەر شەنگالێ و سنوورێن ھەرێما کوردستانێ ئەڤ پرۆژە ھاتە راوەستاندن و گۆت: “ئەم نەچاربووین ل سەر کیسێ خێرخوازێن ئێزدی و سندۆقا میری بەردەوامیێ بدەینە کارێ نووژەنکرنا پەرستگەھا لالش، سوپاس بۆ ھەر کەسێ ل گەل مە ھاریکاربی، ئەڤە دو سالە قووناغێن باش ھاتینە نووژەنکرن و د نھا دا کار یێ ل سەر قووناغا پێنجێ دھێتە کرن”.
ناڤھاتی ئاشکرا کر، ئەو داخوازێ ژ حکومەتێ دکەن ڤی کارێ ھوسا یێ مەزن رابن، ژ بەرکو ئێزدی نەشێن جھەکێ وەکو لالش یێ مەزن نووژەن بکەن، ژ بەرکو رۆژانە ل ھەموو جیھانێ خەلک سەرەدانا ڤێ پەرستگەھێ دکەن و گۆت: “ئەم ھیڤی دکەین حکومەت ژی بھێتە دەنگ بۆ دوبارە نووژەنکرنا پەرستگەھێ، ھەرچەندە سەرۆکێ حوکمەتێ دو پرۆژێن گرنگ بۆ مە ئەنجام داینە، مینا: پرۆژێ جووتسایدێ لالش و پرۆژێ ئاڤا ڤەخوارنێ بۆ چارەکرنا ئاریشا کێم ئاڤیێ”.
بابە چاویش ئاماژە ب وێ چەندێ ژی کر کو دەمێ حوکمەتا ھەرێما کوردستانێ بڕیار دای پەرستگەھا لالش بھێتە نووژەنکرن، ماستەرپلانەک بۆ ھاتە دانان کو ئەو جھێن بھێنە نووژەنکرن کەڤناتیا وان یا بەری چەندین سالە ڤەگەڕینن و مادێ چیمەنتویێ تێدا نەھێلن، ئەو کەڤرێن کەڤنار بھێنە بکارئینان و ئەو خانیێن خەلکی دروستکرین یێن کەڤن دێ ھێنە خرابکرن و گۆت: “ھەکە حکومەت ھاریکاریا مە نەکەت دێ نووژەنکرنا پەرستگەھێ ب سالان ڤەکێشیت”.
ئەندازیار خەیری گدی، سەرپەرشتێ پرۆژەی بۆ ئەڤرۆ نیوز گۆت: “ل دووڤ وێ ماستەرپلانا حکومەتێ بۆ پەرستگەھێ دانای، د نھا دا ئەم یێ بەرەڤ قووناغا پێنجێ دچین یا نووژەنکرنا پەرستگەھا لالش، رۆژانە زێدەتری ٢٠ کەسێن شەھرەزا د وارێ نووژەنکرنا کەڤنار ب سەرپەرشتیا چار ئەندازیاران کارێ نووژەنکرنا پەرستگەھێ دکەن”.
تعليقات