سه‌يدۆ چه‌تۆ: شنگاليێن خانيێن وان تاپۆ ژى نه‌بن دشێن سولفا ئاڤاهيان وه‌رگرن
ئه‌ڤرۆ نيوز:
سه‌رۆكێ جڤاتا پارێزگه‌ها نه‌ينه‌وا راگه‌هاند كو نها بڕياره ده‌ركه‌فتيه كو ئه‌و وه‌لاتيێن ده‌ڤه‌را شنگال يێن خانيێن وان هاتينه خرابكرن، دشێن سولفا ئاڤاهيان وه‌ربگرن هه‌كه خانيێن وان تاپۆ ژى نه‌بن.
سه‌يدۆ چه‌تۆ، سه‌رۆكێ جڤاتا پارێزگه‌ها نه‌ينه‌وا د داخۆيانيه‌كێ دا بۆ ئه‌ڤرۆ نيوز گۆت: “ب ره‌نگه‌كێ گشتى هه‌موو وه‌لاتى دشێن سولفا ئاڤاهيان وه‌رگرن ب ره‌نگه‌كى هه‌كه يا بێ مفا بيت 30 مليۆن دينار و هه‌كه مفايه‌كێ بچووك ل سه‌ر بيت 50 مليۆن دينار، به‌لێ مه‌رجێ ئێكێ ئه‌وه ئه‌رد يێ تاپۆ كرى بيت”.
زێده‌تر گۆت: “ژ به‌ر كو ئه‌ردێ پتريا خه‌لكێ شنگال نه‌يێ تاپۆ كريه و ل سه‌ر ناڤێ وان نينه، تايبه‌تمه‌نديه‌ك بۆ وان هاتيه دان و ئه‌و دشێن بێ تاپۆ ژى سولفا ئاڤاهيان وه‌ربگرن”.
سه‌رۆكێ جڤاتا پارێزگه‌ها نه‌ينه‌وا ئاشكه‌را ژى كر كو هه‌ر وه‌لاتيه‌كێ ده‌ڤه‌را شنگال بڤێت ڤه‌گه‌ريته جهێ خوه و خانيێ خوه نووژه‌ن بكه‌ت دشێت مفاى ژ وان قه‌ران وه‌ربگريت خوه هه‌كه خانيێ وى تاپۆ ژى نه‌بيت، ب رێيا وه‌رگرتنا په‌سه‌نده‌كێ ژ موختارێ تاخێ خوه و قايمقامێ شنگال يێ شه‌رعى يان ژى رێڤه‌به‌ريا ناحيێ.
ب ره‌نگه‌كێ گشتى خانى ل ده‌ڤه‌را شنگال يێن قه‌زا و ناحيه و كۆمه‌لگه‌هـ و گۆندانن، پتريا وان ژى تاپۆ پێ نينن، ژ به‌ر هندێ ژى به‌رى نوكه نه‌دشيان مفايى ژ وێ سولفێ وه‌ربگرن.
تعليقات