شنگالیا ئیدارا شەرعی دڤێت/بەختیار قادر
شنگالیا ئیدارا شەرعی دڤێت
بەختیار قادر
ئیدارا شەرعی یا قەزا شنگالێ ژلایێ ئەنجوومەنێ پارێزگەها مووسلێ ڤە بۆ رێڤەبرنا قەزایێ هاتیە هەلبژارتن و دانان،پشتی هاتنا حەشدا شەعبی ل رۆژا 17/10/2017ێ ل وی دەمی ئیدارا شەرعی ناچاربوو ل شنگال نەمینت و هاتە پارێزگەها دهۆكێ دەست ب خزمەتكرنا ئاواران و كارێ خۆ كر،هەر ل رێككەفتی 31/10/2018ێ ئیدارە ب فه‌رمى ڤەگەریا شنگال لێ هندەك لایەن و خەلكێ ل وێدەرێ ئاكنجی رێگری لێ كر و ئەڤە مەترسیە لسەر دەڤەرێ كو ل داهاتی هەڤركی رووبدەن و رەوش ئالۆزتر لێ بت،پشتی بۆرینا چار سالان بسەر كۆمكوژیا ئێزدیان لسەر دەستێ رێكخراوا داعش یا تیرۆرستی ل 3/8/2014ێ هێشتا نێزیكی 360هەزار خەلكێ شنگالێ ل ژیانا ئاوارەیێ دا ل بن خیڤەت و كەمپان ل سنوورێ پارێزگەها دهۆكێ و چەند دەڤەرێن دی یێن هەرێما كوردستانێ و چەند وەلاتان دا درەوشەكا سەخت و دژوار دا ژیانا خۆ دەرباز دكن،ئەو ل چاڤەرێ نە ب زووترین دەم ڤەگەرنە سەر جی و وارێن خۆ ڤە و ژ ژیانا ب زەحمەت یا ئاوارەیێ قورتالببن،ئەو تنێ ئیدار شەرعی ب خودانێ خۆ دبینن كو دەمێ ب زڤرت دێ رەوش ئاسایی ببت بۆ رێڤەبرنا شنگال و پاشی كارن دەست ب ڤەگەریانێ بۆ سەر مال وحالێ خۆ بكەنە ڤە،لەورا دڤێت رێز ل بۆچۆنا خەلكێ شنگال بێتە گرتن كو پرانیا وان دگەل دان هێزێن پێشمەرگەیێ كوردستانێ پاراستنا وان بكت و ئیدارا شەرعی ڤەگەرتە ڤە و دەست ب ئاڤەدانكرنا شنگال بێتە كرن و ژیان وەكی بەرێ بزڤرتە ڤە و ل بن سیبەرا ئالا و باوەشا هەرێما كوردستانێ دا بن.
تعليقات