412 زه‌ڤیێن مینرێژكرى ل شنگال هاتینه پاقژكرن
باسنيوز:
تیرۆرستێن داعش رێژه‌یه‌كا مه‌زن یا مین و ته‌قه‌مه‌نیان ل شنگالێ چاندینه و هه‌تا نها تیمێن رامالینێ د پاقژكرنا وان مینان دا د به‌رده‌وامن و 412 پارچه زه‌ڤیێن مینرێژكرى ل شنگال رامالینه.
مه‌سعود مه‌لا شه‌فیق، رێڤه‌به‌رێ گشتیێ كارۆبارێن مینا ل پارێزگه‌ها دهۆكێ، بۆ (باسنیوز) دیار كر، ل سالا 2014 و سالا ل دووڤ را ده‌مێ شنگال د ده‌ستێن تیرۆرستێن داعش دا، هژماره‌كا مه‌زن یا بێ سنوور یا مین و ته‌قه‌مه‌نیان ل شنگال چاندینه و هه‌تا نها ژى هه‌موو نه‌هاتیه پاقژكرن و 20 هاوولاتیێن شنگال ژى ژ ئه‌گه‌رێ په‌قینا وان مین و ته‌قه‌مه‌نیان گیانێ خوه ژ ده‌ست دایه.
ئاشكرا ژى كر، كو تیمێن رامالین و پاقژكرنێ د به‌رده‌وامن ل سه‌ر راكرنا مین و ته‌قه‌مه‌نیان د ماوێ سالا بۆرى دا تیمێن وان 412 زه‌ڤیێن مینرێژكرى و خانیێن هاوولاتیان دناڤا شنگالێ دا ژ مین و ته‌قه‌مه‌نیان رامالینه و داینه ده‌ستێن خودانێن وان.
مه‌سعود مه‌لا شه‌فیق، رێڤه‌به‌رێ گشتیێ كارۆبارێن مینا ل پارێزگه‌ها دهۆكێ خویا كر، هوشداریێ دده‌ینه هاوولاتیێن كوردێن ئێزدى یێن خه‌لكێ شنگالێ زوو ب زوو سه‌ره‌دانا شنگال نه‌كه‌ن، چونك هێشتا گه‌له‌ك مال ماینه نه‌هاتینه پاقژكرن و مه‌ترسیا په‌قینا مین و ته‌قه‌مه‌نیان هه‌یه و گۆتیشى: هه‌تا نها باشوورێ شنگالێ ژ مینان نه‌هاتیه پاقژكرن.
تعليقات