گرۆپێن توندره‌و دانعه‌مره‌كا ئێزدى ب زۆرى ژمالێ ده‌رێخست و گيانێ خۆ ژ ده‌ست دا
 |
| وێنێ نازليا عومه‌ر شه‌ره‌ف |
ئێزديخان نيوز:
گرۆپێن توندره‌وێن بناڤ له‌شكه‌رێ ئازاد به‌رده‌وامن لسه‌ر پێشلكاريان ده‌رهه‌قێ سڤيلان ل باژێرێ عه‌فرينێ ژ ده‌مێ كۆنترۆلكرنا سه‌ر عه‌فرينێ دگه‌ل سوپايێ توركيا ل ناڤه‌راستنا هه‌يڤا ئادار بۆرى.
ژێده‌ره‌كى ناڤخۆيى ژ گوندێ باسوفان بۆ مالپه‌رێ(ئێزدينا)راگه‌هاند:" كۆمه‌كا چه‌كدارێن ڤى گرۆپى ده‌ست بسه‌ر مالا" نازليا عومه‌ر شه‌ره‌ف" دا گرت ل گوندێ باسوقان و داخواز ژێكر ژ مالێ ده‌ركه‌ڤت،دا خێزانێن خۆ ل مالا وێ دا ئاكنجى بكه‌ن".
ژێده‌رى رۆنكر: " ئه‌و ژن رازى نه‌بوون ژ مالا خۆ ده‌ركه‌ڤت و هنده‌ك خه‌لكێ گوندى داخواز ژ چه‌كدارێن گرۆپى كر لسه‌ر بريارا پاشڤه‌بزڤرن،به‌لێ چه‌كداران ره‌تكر و 24ده‌مژمێر ده‌رفه‌ت دانێ ب ده‌ركه‌ڤت،خوياكر ژى جيرانان ئه‌و ژن رازى كر ده‌ركه‌ڤت دا تووشى ئێشانا نه‌بت،به‌لێ ئه‌وێ هه‌ر نه‌دڤيا و دگۆت مالا وێ يا كورێن وێ يه يێن تێدا ژياين".
هه‌مان ژێده‌ر دووپاتكر: " پشتى رۆژه‌كێ ل شه‌ڤا سێ شه‌مبوويێ ئه‌و ژن تووشى جه‌لتێ بوو و گيانێ خۆ ژ ده‌ست دا".
ئاماژه‌كريه ژى كو ب زۆرى ده‌رێخستنا وێ ژ مالێ ئه‌و ئه‌گه‌ر بوو گيانێ خۆ ژ ده‌ست بده‌ت،هه‌روه‌سا ژێده‌ره‌كى دياركر،كورێن وێ ژنا دانعه‌مر نه‌چاربوون ژ گوندى ده‌ركه‌ڤن پشتى ڤان گرۆپا گوند كۆنترۆلكرين،هنگى وى ژنێ نه‌ڤيا ده‌ركه‌ڤت و ما ل مالا خۆ.
بۆ زانين سوپايێ توركى و گرۆپێن توندره‌و يێن بناڤ له‌شكه‌رێ ئازاد هه‌موو گوندێن ئێزديان ل ده‌ردۆرێن عه‌فرينێ كۆنترلكرينه و چه‌ندين پێشلكارى ده‌رهه‌ق سڤيلان دا ئه‌نجام داينه.
تعليقات