كار لسه‌ر پرۆژێ ئینسكلۆپیدیا"جینۆسایدا ئێزيدیان" دئێته‌ كرن

تۆرا لالش يا راگه‌هاندنێ/شاريا

ل كۆمه‌لگه‌ها شاريا پرۆژێ ئینسكلۆپیدیا "جینۆسایدا ئێزيدیان" هاتە گەنگەشەكرن.

 ئيرۆ رۆژا پێنج شه‌مبوويێ 12ى نيسانا2018ێ ل هۆلا لالش ئێك ب ئامادەبوونا ژمارەکا کەسایەتیێن حکومی و نڤیسەر و رۆژنامەڤان و رەوشەنبیرێن ئێزيدی، بنگەهێ لالش تایێ شاریا روونشتنەکا ڤەکری بۆ نڤیسەرێ ئێزيدی "داود موراد خەتاری" ئه‌نجام دا،لدۆر پرۆژێ پەرتۆکا وی یا بناڤێ "جینۆسایدا ئێزدی" کو ب زمانێ ئەرەبی کار لسەر دئێتە کرن و چاڤەرێ دئێتە کرن ل داهاتەکی نێزیک تەمام ببت و بکەفتە بەردەستێ خووندەڤانا.

پەرتۆکا"جینۆسایدا ئێزدی" ژ شەش بەرگا پێک دئێت و تێدا ب درێژی بەحسێ جینۆسایدا ئێزيدیان دکت ب تایبەت خەلکێ شنگالێ هەر ژ دەستپێکا کارەساتێ ل ۳/٨/۲۰۱٤ تا ئيرۆ رۆژ. 

هه‌روه‌سا پشتی نڤیسەرێ ناڤبری بەحس ل پەرتۆکا خۆ کری ب درێژی دەرگەهێ گەنگەشێ لدۆر پەرتۆکێ هاتە ڤەکرن. 

ژلایێ خۆڤە ئامادەبوویان چەندین رەخنێن ئاڤاکەر و پێشنیارێن باش ئاراستەی ناڤبری کرن و ژبال خۆڤە خەتاری ب دلەکی فرەهـ و ب سوپاسی ڤە ئەو رەخنە و پێشنیار وەرگرتن.

ئەڤ روونشتن تایبەت هاتە ئەنجام دان،ژبۆ وەرگرتنا رەخنە و پێشنیاران لسەر پرۆژێ پەرتۆکا ناڤبری.