رێكخراوا رۆژا شنگال بەرهەڤیێن ئەنجام دانا كۆنفرانسەكێ زانستی ئەكادیمی دكەت
ئێزیدخان نیوز:
رێكخراوا رۆژا شنگال بۆ مافێن مرۆڤی ل هەولێرێ،بەرهەڤیان دكەت ب هەڤكاری دگەل بنگەهێن لێكۆلێنێ بۆ ئەنجام دانا كۆنفرانسەكێ زانستی ئەكادیمی،سەر ژیان و ماف و پاشەرۆژا زارۆك و ژنێن رزگاربووی.
رسالە شەركانی،سەرۆكا رێكخراوا رۆژا شنگال بۆ مافێن مرۆڤی د داخویانیەكێ دا بۆ مالپەرێ(ئێزیدخان نیوز) راگەهاند:"رێكخراوا رۆژا شنگال بۆ مافێن مرۆڤی ل داویا سالا 2016هاتە دامەزراندن و ل سالا 2017دەست بكارێ خۆ كریە پشتی تەمامكرنا پێرابوونێن كارگێری".
زێدەتر گۆت:"راستە كو دەستەكا دامەزرینەر كۆمەكە ژ گەنجێن ئێزدیان و راستە كو هزرا دامەزراندنا وێ هاتیە ژ ئازار و زۆرداریێن ئێزدی تووشبووینێ،بەلێ وەك پراكتیك رێكخراوا مە بۆ مافێن مرۆڤی یە ب واتایا مرۆڤی یا بەرفرەه و نەك تنێ بۆ ئێزدیایە و ژ ئارمانجێن مە بەرەڤانیكرن ژ مافێن مرۆڤی یە و دیسان ناڤەشێرن و وەك ئەوا دیار دپەیرەوێن تایبەت ب ئارمانجێن رێكخراوا مە ئەولەویەتا مە ل دەمێ نهۆ دا گرنگیدان ب دۆزا رزگاربوویان ژ دەستێ داعشێ یە ئەو ژی ژن و زارۆك و پاش ئێخسیر و گرتیێن هەتا نهۆ مایین د دەستێ داعش دا و كاركرن لسەر دۆزا وان لسەر ئاستێ كوردستانێ و نێڤ دەولەتی و دووڤچوونا چارەنڤیسێ وان".
ئەو چەندە ژی خویاكر:"رێكخراوێ ب پلا ئێكێ تەكەز لسەر مافێن مرۆڤی دانایە،لێ دقۆناغا نهۆدا ئەولەویەت گرنگیدانە ب دۆزا رزگاربوویان و گرتیان،دبینن كو ژنێن ئێزدی یێن رزگاربووی و زارۆكێن وان پێدڤی گرنگیدانەكا بەرفرەه و مەزنن و ژئالیێن مرۆڤایەتی و دەروونی وجڤاكی و ئابووری و خێزانی،هەروەسا ئەو پێدڤی نە بكەڤنە دخۆلێن دووبارە پێگەهاندنێ دا پشتی ب نەچاری ژیاین و بۆ ماوەیەكی درێژ لگەل كەسێن دژی مرۆڤان و گرنگیێ نادەن مافێ مرۆڤی و دەربازبووین دژیانەكا ب زەحمەت دا و تووشی زۆرداری و تاوانان بووین".
شەركانی دا زانین ژی رێكخراوێ دسالا بۆری دا دەست بكاری كر ب رێیا كارێ خۆبەشخانە یێن ئەندامان و پشتەڤانێن كارێ مرۆڤی و بێ چوو شیانێن دارایی،ئێك ژ كارێ وێ چاپكرن و بەلاڤكرنا پەرتۆكا نڤیسكار و ڤەكۆلەر خالد تەعلو قائیدی بوویە یێ چیرۆكا ئازارێن رزگاربووی لەیلا تەعلو دكیۆمێنتكرین،هەروەسا رێكخراوا مە ب هەماهەنگی دگەل چەند جیێن دیتر هاریكاری ب شێوێ پێدڤی و دیاری و چارەسەری بۆ نەخۆشێن پێدڤی لسەر ژمارەكا رزگاربوویان و ئاوارەیان بەلاڤكرینە،ژبیر نەكەن رێكخراوێ ل دەستپێكا كارێ خۆ دا چوو دەرمالە یان هاریكاری ژ چوو جهان هەتا نهۆ وەرنەگرتینە.
رۆنكر ژی پرۆژێن داهاتی یێن دێ لسەر كار كەین ئەو ژی چاپكرن و بەلاڤكرنا دوو پەرتۆكایە كو چیرۆكێن دۆرێن 20كچێن رزگاربوویێن ئێزدی دكێۆمێنت دكەن،هەروەسا بەرهەڤیێ دكەین و ب هەڤكاری دگەل ئێك ژ بنگەهێن لێكۆلێنێ بۆ ئەنجام دانا كۆنفرانسەكێ زانستی ئەكادیمی سەر ژیان و ماف و پاشەرۆژا زارۆك و ژنێن رزگاربووی و چاوانیا كاركرنێ لسەر دۆزا گرتیان ل راگەهاندنێ و نێڤ دەولەتی،دووپات دكەین مە هزر و پرۆژە هەنە بەلێ پێدڤی هەماهەنگی و هاریكاریا هەڤپشكا و پەرەپێدانێ یە ژ رێكخراوێن خێرخوازی و مرۆڤایەتی یێن كوردستانی یان دەولی.
سەرۆكا رێكخراوا رۆژا شنگال دیاركر:"كارێ رێكخراوێ زێدەباری كارێ خۆبەخشانە ژ ئەندامان پێدڤی پشتەڤانیا رێكخراوان و جهێن نێڤ دەولەتی یە یێن كارێ وان مافێن مرۆڤی و هاریكاریا قوربانیێن شەری و تیرۆرێ دكەن".
ئاشكەراكر ژی وەك ل دەستپێكێ من ئاماژەكری كو هزر و ئارمانجا رێكخراوێ هاتیە ژ ئازار و زۆرداریێن ئێزدیا یێن تووشی هەوێن كۆمكوژیێن بكۆم بووین،و یێن دەستپێشخەر بووین بۆ دامەزراندنا رێكخراوێ پتریا وان ئێزدی بووینە،بەلێ كارێ رێكخراوێ و ئارمانجێن وێ نە تەنها سەر ئێزدیانە،لەوا ئەندامێن نە ئێزدی ژی هەنە و وەك رێكخراوەكا مرۆڤایەتی ل دەستپێكێ و داویێ گرنگیێ ب ئالیێ مرۆڤی ددەین.
دبێژت ژی بەلێ ژمارەكا كچێن رزگاربووی ئەندام و خۆبەخشن د رێكخراوێ دا،ئەرێ بۆچی؟چنكو ئەو نێزیكی ئارمانجێن رێكخراوێ نە ژبەركو ئەو ئێكەم قوربانیێن بنپێكری یێن مافێن مرۆڤی نە.
ل داویێ گۆت:"پرۆژێن رێكخراوێ هەموو دەڤەرێن هەرێما كوردستانێ بخۆ ڤە دگرت و بارەگایێ سەرەكی یێ رێكخراوێ ل هەولێرێ یە كو ئەو پایتەختە".
تعليقات