سەرۆک بارزانی: ل داویێ گەلێ کوردستانێ دێ سەربکەڤیت

WAAR-دهۆك:

سەرۆک بارزانی د کۆمبوونەکێ د گەل ژمارەیەکا راگر و مامۆستایێن زانینگەھێن دھۆکێ راگەھاند؛ قوناغا نھا دێ دەربازبیت و گەلێ کوردستانێ ژی دێ سەربکەڤیت.

ئەڤرۆ سەرۆک مەسعوود بارزانی ل باژارێ دھۆکێ د گەل ژمارەیەکا راگر و مامۆستایێن زانینگەھێن دھۆکێ کۆمبوو، تێدا مامۆستایێن زانینگەھێ کۆمەکا پێشنیاز و پسیاران ل سەر رەوشا سیاسی و دەستووری یا ئیراقێ و پەیوەندیێن بەغدا و ھەولێر و رەوشا ژیانا خەلکی و قەیرانێن دارایی ئاراستەی بارزانی کرن.

ژ ئالیێ خوەڤە سەرۆک بارزانی ب رووھنی بەرسڤا پسیار و تێبینیێن بەرھەڤبوویان دا و د پەیڤەکێ دا بەحس ل رەوشا سیاسی یا کوردستانێ و ئیراقێ و ھەلوەستێ جڤاکا نێڤدەولەتی ل ھەمبەر بریارا رێفراندوما گەلێ کوردستانێ کر، ھەروەسا روودانێن شازدەیی ئکتۆبەرێ و قوناغا پشتی رێفراندۆمێ شرۆڤە کرن.

د ئالیەکێ دی یێ ئاخفتنا خوە دا سەرۆک بارزانی تەکەز کر، کو ب رێڤەچوونا ھەلبژارتنان باشترین بژاردەیە بۆ قەیرانێن ھەرێمێ و گۆت: قۆناغا نھا دێ ھێت دەربازکرن و ل داویێ گەلێ کوردستانێ دێ سەربکەڤیت، ژ بەر کو دۆزا وی یا رەوایە و زۆلم ژی ل کەسێ نەکریە.